অসমসহ উত্তৰ-পূৰ্বাঞ্চলৰ নিবনুৱা যুৱক-যুৱতীক বঞ্চিত কৰি ভাৰতীয় ষ্টেট বেংক আৰু অসম গ্ৰামীণ বিকাশ বেংকৰ বৃহৎ সংখ্যক খালী পদত বহিঃৰাজ্যৰ প্ৰাৰ্থীক নিযুক্তি দিয়া কাৰ্যক ভাৰতৰ গণতান্ত্ৰিক যুৱ ফেডাৰেছন চমুকৈ ডি ৱাই এফ আইৰ অসম ৰাজ্যিক কমিটিয়ে তীব্ৰ প্ৰতিবাদ কৰিছে আৰু এয়া কেন্দ্ৰীয় আৰু ৰাজ্যৰ বিজেপি চৰকাৰে অসমসহ উত্তৰপূৰ্বাঞ্চলৰ প্ৰতি কৰা চৰম প্ৰতাৰণা বুলি আখ্যা দিছে। যোৱা ২৮ অক্টোবৰ তাৰিখে এক প্ৰতিবাদী কাৰ্যসূচীৰ মাজেৰে কেন্দ্ৰীয় চৰকাৰৰ অধীনৰ প্ৰতিষ্ঠানৰ তৃতীয় আৰু চতুৰ্থ বৰ্গৰ পদত স্থানীয় যুৱক-যুৱতীক নিযুক্তিৰ দাবী কৰি সংগঠনটোৱে প্ৰধান মন্ত্ৰীলৈ এই বিষয়ত স্মাৰক-পত্ৰ প্ৰেৰণ কৰিছিল।
ভাৰতীয় ষ্টেট বেংকৰ গুৱাহাটী চাৰ্কোলৰ ৬০০ টা তৃতীয় বৰ্গৰ পদৰ যোৱা এটা বছৰত ৩৬০ টা পদত অৰ্থাৎ ৬০% পদত বহিঃৰাজ্যৰ প্ৰাৰ্থীক ২০২৩-২৪ বৰ্ষত নিযুক্তি দিছে। একেদৰে অসম গ্ৰামীণ বিকাশ বেংকত ২০২৩ বৰ্ষত ১৪৮ টা পদৰ বিপৰীতে ৪২ জন বহিঃৰাজ্যৰ আৰু ২০২৪ বৰ্ষত ২৭৫ টা পদৰ বিপৰীতে ৭৭ টা পদত বহিঃৰাজ্যৰ প্ৰাৰ্থীক নিযুক্তি দিছে।
ৰাজ্যৰ ১২ হাজাৰ খালী পদত ৩২ লাখ নিবনুৱা যুৱক-যুৱতীয়ে আৱেদন কৰাৰ সময়তে এয়া অসম তথা উত্তৰপুবৰ নিবনুৱা যুৱক-যুৱতীৰ প্ৰতি ডাবল ইঞ্জিন চৰকাৰৰ ডাঙৰ অন্যায় আৰু প্ৰতাৰণা বুলি আখ্যা দি এই বিষয়ত মুখ্যমন্ত্ৰীয়ে মৌন হৈ থকাটো ৰহস্যজনক বুলি ডি ৱাই এফ আইয়ে মন্তব্য কৰিছে। এফালে প্ৰধান মন্ত্ৰীয়ে ডিঙিত গামোচা লৈ অসম প্ৰেমৰ বাৰ্তা দিব খুজিছে আনফালে অসমৰ নিবনুৱাক বঞ্চিত কৰি বহিঃৰাজ্যৰ যুৱক-যুৱতীৰ বাবে চাকৰি বৰপীৰা মুকলি কৰি দিছে।
ষ্টেট বেংকৰ উত্তৰ-পূৰ্বাঞ্চলক সামৰি লোৱা গুৱাহাটী চাৰ্কোলৰ ৬০০টা তৃতীয় বৰ্গৰ পদত নিযুক্তি দিয়া বহিঃৰাজ্যৰ প্ৰাৰ্থীসকলে ইতিমধ্যে চাকৰিত যোগদান কৰিছে। উত্তৰ-পূৰ্বাঞ্চলৰ বাহিৰৰ এই প্ৰাৰ্থীসকলক ২০২৩-২৪ বৰ্ষত ভাৰতীয় ষ্টেট বেংকে অসমকে ধৰি অৰুণাচল, মেঘালয়, মণিপুৰ, নাগালেণ্ড, মিজোৰাম, ত্ৰিপুৰাৰ বিভিন্ন শাখাত মকৰল কৰিছে। ছশটা পদৰ ভিতৰত পশ্চিমবংগ, বিহাৰ, দিল্লী, ঝাৰখণ্ড আদি ৰাজ্যৰ ৩৬০ গৰাকী প্রার্থীক ষ্টেট বেংকে ‘জুনিয়ৰ এছ’চিয়েট’ হিচাপে নিযুক্তি দিছে।
সততে খিলঞ্জীয়াৰ স্বাৰ্থ ৰক্ষাৰ বাবে আবেগিক ভাষণ দিয়া বিজেপি দলৰ আচল ৰূপ ইয়াতেই ওলাই পৰিছে।
অকল এয়াই নহয় কেন্দ্ৰীয় চৰকাৰৰ অধীনৰ প্ৰায়বোৰ বিভাগতে বহিঃৰাজ্যৰ প্ৰাৰ্থীয়ে ভৰি পৰিছে। এপিএছচিত অসমৰ বিষয়ে নজনা প্ৰাৰ্থীয়ে স্থান পাইছে। ৰাজ্য চৰকাৰৰ অধীনৰ প্ৰাথমিক শিক্ষা বিভাগৰ শিক্ষকতাৰ চাকৰিত বহিঃৰাজ্যৰ প্ৰাৰ্থীয়ে স্থান পাইছে।
ডিৱাইএফ আইয়ে দাবী কৰিছে বেংক, এলআইচি, পোষ্টেল, ৰে’ল, তৈল ক্ষেত্ৰকে ধৰি কেন্দ্ৰীয় চৰকাৰৰ অধীনৰ সকলো প্ৰতিষ্ঠানৰ তৃতীয় আৰু চতুৰ্থ বৰ্গৰ পদত ৰাজ্যৰ স্থানীয় যুৱক-যুৱতীক নিযুক্তি দিয়াৰ ব্যৱস্থা কৰক। স্থানীয় নিয়োগ বিনিময় কেন্দ্ৰৰ জৰিয়তে আৰু স্থানীয় বাসিন্দাৰ প্ৰমাণ পত্ৰ বাধ্যতামূলক কৰি স্থানীয় প্ৰাৰ্থীক নিযুক্তি দিয়াৰ ব্যৱস্থা কৰক।
