উত্তৰ প্ৰদেশৰ ৮৫ বছৰীয়া এগৰাকী বৃদ্ধাই নিজৰ চাৰে বাৰ বিঘা কৃষিভূমি প্ৰধান মন্ত্ৰী নৰেন্দ্ৰ মোদীৰ নামত লিখি দিব খোজা কাৰ্যই দেশবাসীৰ দৃষ্টি আকৰ্ষণ কৰিছে।
প্ৰধান মন্ত্ৰী মোদীৰ কৰ্মশৈলীত প্ৰভাৱিত হৈয়ে এই ইচ্ছা প্ৰকাশ কৰা বুলি বিট্টন দেৱী নামৰ বৃদ্ধাগৰাকীয়ে জানিবলৈ দিয়ে।
বুধবাৰৰ পিছত আজিও বৃদ্ধাগৰাকীয়ে নিজৰ ভূমিখিনি প্ৰধান মন্ত্ৰীৰ নামত লিখি দিবলৈ মেনপুৰী জিলা তহচিলত উপস্থিত হৈছিল।
প্ৰধান মন্ত্ৰীৰ নামত নিজৰ কৃষিভূমি পঞ্জীয়ন কৰিব খোজা কাৰ্যত অধিবক্তা গৰাকীও আচৰিত হয়। ইয়াকে লৈ স্থানীয় লোকসকলে বৃদ্ধাগৰাকীক বুজাবলৈ চেষ্টা কৰে যদিও বৃদ্ধাগৰাকী নিজৰ সিদ্ধান্তত অলৰ অচৰ থাকে।
উল্লেখ্য যে বৃদ্ধাগৰাকীৰ এই সিদ্ধান্তৰ আঁৰত কিছু দুখ আৰু আবেগ জৰিত হৈ আছে।
বিট্টন দেৱীয়ে জনাই যে তেওঁৰ স্বামীৰ মৃত্যু হৈছে। তেওঁৰ দুই পুত্ৰ আৰু বোৱাৰীয়ে তেওঁৰ চোৱা চিতা নকৰে।
পৰিয়ালৰ মৰমৰ পৰা বঞ্চিত বৃদ্ধাগৰাকীয়ে এতিয়া চৰকাৰী আঁচনিৰ সহায়তেই জীৱন নিৰ্বাহ কৰি আছে।
এই কথা বতৰাত বিতুষ্ট হৈয়েই অৱশেষত ৮৫ বছৰীয়া বৃদ্ধা গৰাকীয়ে নিজৰ কৃষিভূমি প্ৰধান মন্ত্ৰী নৰেন্দ্ৰ মোদীৰ নামত লিখি দিয়াৰ সিদ্ধান্ত গ্ৰহণ কৰে।
বৃদ্ধাগৰাকীয়ে কয় যে চৰকাৰৰ পৰা লাভ কৰা বৃদ্ধ পেঞ্চনৰ সহায়ত তেওঁ ধুনীয়াকে নিজৰ জীৱন চলাই যাব পাৰিব। সেয়ে তেওঁ নিজৰ নামত থকা ভূমি প্ৰধান মন্ত্ৰীৰ নামত লিখি দিব বিচাৰে।
