পোহৰলৈ আহিছে কলিকতাৰ আৰ জি কৰ গোচৰৰ আন এক অধ্যায়। ধৰ্ষিতাৰ পিতৃয়ে উত্থাপন কৰিছে বিস্ফোৰক অভিযোগ।
আৰ জি কৰ হাস্পতালত চিকিৎসকক ধৰ্ষণ আৰু হত্যাৰ প্ৰতিবাদত বুধবাৰে নিশা ৰাজ্যৰ কনিষ্ঠ চিকিৎসক সন্থাই ‘বিচাৰ পতন আলো পাঠে’ নামৰ এক কাৰ্যসূচীৰ আহ্বান জনায়। ধৰ্ষিতাৰ পৰিয়ালৰ লোকেও এই কাৰ্যসূচীত অংশগ্ৰহণ কৰে।
এই কাৰ্যসূচীত অংশ লৈ কেইবাটাও বিস্ফোৰক দাবী উত্থাপন কৰে পৰিয়ালৰ লোকে।
ভুক্তভোগীৰ পিতৃয়ে কয়, “আৰজি কৰ আউট পোষ্টৰ আৰক্ষীয়ে পুৱা ১০.১০ বজাত এই ঘটনাৰ বিষয়ে জানিবলৈ পাইছিল। তাৰপিছত ১১ বজাত আমাক কোৱা হ’ল যে আমাৰ ছোৱালীজনীয়ে আত্মহত্যা কৰিছে, ১২:০০ বজাৰ ভিতৰত থানালৈ আহক। তাৰ পিছত আমাক থানাত তিনি ঘণ্টা বহাই ৰখা হ’ল। মাকে বাৰে বাৰে অনুৰোধ কৰাৰ পিছতো আমাক মৃতদেহ চাবলৈ দিয়া নহ’ল।”
লগতে পিতৃয়ে প্ৰশ্ন কৰি কয়, “মৰণোত্তৰ পৰীক্ষাত ইমান দেৰি কিয় কৰা হ’ল? সন্ধিয়া ৬:৩০ৰ পৰা ৭ বজাৰ ভিতৰত থানাত এফআইআৰ দাখিল কৰিলোঁ। কিন্তু সেই এফ আই আৰ পুৱা ১২:৩০ বজাত পঞ্জীয়ন হৈছিল। ইমান দেৰি কিয় কৰা হ’ল?”
পিতৃয়ে লগতে অভিযোগ কৰি কয়, “ আমি মৃতদেহটো ৰাখিব বিচাৰিছিলোঁ। কিন্তু আৰক্ষীৰ হেঁচাৰ বাবে সোনকালে সৎকাৰ কৰিবলগা হৈছিল। আমি বাধ্যত পৰিছিলোঁ।
তেওঁ কয়, “ছোৱালীজনীৰ মৃতদেহ আমাৰ ঘৰলৈ অনাৰ সময়ত উপায়ুক্তই মোক আন এটা কোঠালৈ লৈ গৈ টকা দিবলৈ চেষ্টা কৰিছিল। কিন্তু মই লোৱা নাছিলোঁ। মোক উকা কাগজত চহী কৰিবলৈ দিছিল। মই কাগজখন ফালি পেলাইছিলোঁ।”
এই কাণ্ডৰ ন্যায় নোপোৱালৈকে আন্দোলন অব্যাহত ৰাখিবলৈ আবেদন জনাইছে মাতৃয়ে। প্ৰতিবাদকাৰীসকলক তেওঁ কয়, “যেতিয়ালৈকে আমি ন্যায় নাপাম, আন্দোলন চলি থাকিব দিয়ক।”
