ব্যক্তিগতকৰণৰ গৰাহত অসম ৰাজ্যিক পৰিবহণ নিগম : পুঁজিপতিৰ হাতলৈ যাব বেতকুছিৰ আই এছ বি টি

এসময়ত অসমৰ ৰাজপথত দপদপাই থকা ৰাজ্যিক পৰিবহণ নিগমৰ পৰিচিত ‘ৰঙা বাছ’সমূহ এতিয়া যেন ইতিহাস হ’বলৈ গৈ আছে। ৰাজ্য চৰকাৰে উন্নয়নৰ দাবী কৰি থকাৰ সময়তে নিগমৰ বিত্তীয় আৰু আন্তঃগাঁথনিগত অৱস্থা দিনক দিনে শোচনীয় হৈ পৰিছে। স্বাৱলম্বী হোৱাৰ সলনি নিগমে এতিয়া ক্ৰমাৎ ব্যক্তিগতকৰণৰ পথ বাছি লৈছে। ৰাজ্যৰ বিভিন্ন প্ৰান্তত থকা নিগমৰ বহুমূলীয়া ভূ-সম্পত্তিসমূহ সুচাৰুৰূপে পৰিচালনা কৰাত চূড়ান্তভাৱে ব্যৰ্থ হোৱা কৰ্তৃপক্ষই এতিয়া চকু দিছে গুৱাহাটীৰ বেতকুছিস্থিত আন্তঃৰাজ্যিক বাছ আস্থানৰ ওপৰত।

জানিব পৰা মতে, নিজৰ প্ৰশাসনিক ব্যৰ্থতা লুকুৱাবলৈ নিগমৰ শীৰ্ষ বিষয়াসকলে এতিয়া আই এছ বি টিৰ পৰিচালনা ব্যক্তিগত খণ্ডৰ হাতত অৰ্পণ কৰাৰ যো-জা চলাইছে। ইয়াৰ প্ৰথম পদক্ষেপ হিচাপে বাছ আস্থানটোৰ পাৰ্কিং ব্যৱস্থাটো ব্যক্তিগত প্ৰতিষ্ঠানক গতোৱাৰ প্ৰক্ৰিয়া আৰম্ভ হৈছে। অৰ্থাৎ, আস্থানটোলৈ অহা প্ৰতিখন বাছৰ পৰা প্ৰৱেশ মাচুল সংগ্ৰহ কৰাৰ দায়িত্ব এতিয়াৰে পৰা ব্যক্তিগত প্ৰতিষ্ঠানে লাভ কৰিব।

যোৱা ১৩ মে’ তাৰিখে নিগমে এই সন্দৰ্ভত এক আনুষ্ঠানিক নিবিদা প্ৰকাশ কৰিছে। চুক্তিৰ অনুসৰি, নিৰ্বাচিত ব্যক্তিগত প্ৰতিষ্ঠানক প্ৰাৰম্ভিকভাৱে ৩ বছৰৰ বাবে পাৰ্কিঙৰ দায়িত্ব অৰ্পণ কৰা হ’ব। বাছৰ পৰা সংগ্ৰহ কৰিবলগীয়া মাচুলৰ হাৰ নিগমে নিজেই নিৰ্ধাৰণ কৰি দিব।

নিবিদাত অংশগ্ৰহণ কৰিব বিচৰা প্ৰতিষ্ঠানে ন্যূনতম ১১.৫০ লাখ টকাৰ নিৰিখ দাখিল কৰিব লাগিব। ইয়াৰ বাবে আমানত ধন হিচাপে মাত্ৰ ১ লাখ টকা জমা দিব লাগিব।

কোটিটকীয়া চৰকাৰী সম্পত্তি এনেদৰে নামমাত্ৰ মূল্যত ব্যক্তিগত খণ্ডক গতাই দিয়া কাৰ্যই সৰ্বত্ৰে প্ৰতিক্ৰিয়াৰ সৃষ্টি কৰিছে। বিশেষকৈ আই এছ বি টিৰ লগত জড়িত বাছ চালক আৰু কৰ্মচাৰীসকলৰ মাজত তীব্ৰ অসন্তুষ্টি দেখা গৈছে। বৰ্তমান ইন্ধনৰ আকাশলংঘী মূল্যবৃদ্ধিৰ সময়ত ব্যক্তিগত প্ৰতিষ্ঠানে পাৰ্কিং মাচুল বৃদ্ধি কৰিলে পৰিবহণ খণ্ডটোৱে আৰু অধিক লোকচানৰ সন্মুখীন হ’ব বুলি তেওঁলোকে গভীৰ আশংকা প্ৰকাশ কৰিছে।

দৈনিক উজনি, নামনি, উত্তৰ অসমৰ লগতে বহিঃৰাজ্যৰ শ শ বাছৰ সমাগম ঘটা এই গুৰুত্বপূৰ্ণ বাছ আস্থানটো বৰ্তমান অতিশয় ব্যস্ত এক কেন্দ্ৰ। ক্ৰমৱৰ্ধমান যাতায়াতৰ প্ৰতি লক্ষ্য ৰাখি নিগমে নিজাববীয়াকৈ ইয়াৰ আন্তঃগাঁথনি আৰু সা-সুবিধা উন্নত কৰাত গুৰুত্ব দিব লাগিছিল। কিন্তু তাৰ পৰিৱৰ্তে এসময়ৰ গৌৰৱময় ৰাজ্যিক পৰিবহণ নিগমে নিজৰ সা-সম্পত্তি ৰক্ষণাবেক্ষণ দিয়াৰ সলনি এনেদৰে ব্যক্তিগত খণ্ডক গতাই দিয়াৰ প্ৰক্ৰিয়াক সচেতন মহলে এক গভীৰ উদ্বেগৰ বিষয় হিচাপে অভিহিত কৰিছে। ই নিগমৰ ভৱিষ্যতৰ প্ৰতি এক অশুভ সংকেত কঢ়িয়াই আনিছে।