Misuse of Public Fund ৰাজ্যৰ লোক নিৰ্মাণ বিভাগৰ যোৰহাট কাৰ্যালয়ৰ টোঘলকী কাণ্ডত সচেতন মহলৰ মাজত প্ৰতিক্ৰিয়াৰ সৃষ্টি হৈছে। বিভাগটোৰ একাংশই আঁচনি ৰূপায়নৰ নামত চৰকাৰী ধন আত্মসাৎ কৰাৰ অভিযোগ উঠিছে।
লোক নিৰ্মাণ বিভাগৰ যোৰহাট সংমণ্ডলৰ অধীনস্থ টীয়ক নগৰৰ মাজমজিয়াৰ গুৰুত্বপূৰ্ণ চিকিৎসালয় পথটোৰ সম্প্ৰসাৰণৰ বাবে আজিৰ পৰা ছয়মাহ পূৰ্বে প্ৰায় আঠাইশ লাখ টকাৰ আঁচনি গ্ৰহণ কৰি সেই কাম ঠিকাদাৰে সম্পূৰ্ণ কৰি আঁচনিৰ ধন মোকলাই নিয়ে।
কিন্তু তাৎপৰ্যপূৰ্ণ বিষয় এই যে পথ সম্প্ৰসাৰণৰ কাম সম্পূৰ্ণ হোৱাৰ ছয় মাহ নৌহওতেই পথ সম্প্ৰসাৰণৰ সময়ত ব্যৱহাৰ কৰা ফেবাৰ ব্লক সমূহ উঠাই পেলাই পথৰ দাঁতিত নলা নিৰ্মাণৰ লগতে পথটো মেৰামতিৰ বাবদ প্ৰায় তিনি কোটি টকা ধাৰ্য কৰি লোক নিৰ্মাণ বিভাগে পুনৰ কাম আৰম্ভ কৰাত ৰাইজৰ মাজত প্ৰতিক্ৰিয়াৰ সৃষ্টি হৈছে।
Also Read: Poll Expenditure পাঁচখন ৰাজ্যৰ বিধানসভাৰ নিৰ্বাচনত ২৫২কোটি টকা খৰচ কৰিছে বিজেপিয়ে; অসমত কিমান?
পূৰ্বে পথটো সম্প্ৰসাৰণ কৰাৰ আঁচনি ৰূপায়ন কৰাৰ সময়ত স্থানীয় দল-সংগঠনে নলা নিৰ্মাণ কৰি পথটো সম্প্ৰসাৰণৰ কাম আৰম্ভ কৰিবলৈ দাবী জনাইছিল যদিও চৰকাৰী ধন লুন্ঠনৰ স্বাৰ্থত এই দাবী আওকাণ কৰি সম্প্ৰসাৰণৰ কাম কৰাৰ ছয়মাহৰ পাছত এনেদৰে ভাঙি পেলোৱাত চৰকাৰী ধন পানীত পৰিল।
যি সময়ত পুঁজিৰ অভাৱত চৰকাৰখনে বিধায়ক পুঁজি কৰ্তনকে ধৰি বিভিন্ন ব্যৱস্থা গ্ৰহণেৰে দেউলীয়া অৱস্থাৰ মোকাবিলা কৰাৰ চেষ্টা চলাইছে তেনে সময়ত লোক নিৰ্মাণ বিভাগৰ বিষয়া একাংশই চৰকাৰী ধনৰ অপচয় কৰা কাৰ্যক সমালোচনা কৰিছে সচেতন ৰাইজ তথা দল-সংগঠনে।