জনপ্ৰিয় শিল্পী জুবিন গাৰ্গৰ মৃত্যুৰ তদন্ত চলাই থকা ন্যায়িক আয়োগে হলফনামা দাখিলৰ সময়সীমা পুনৰ ২১ দিনৰ বাবে বৃদ্ধি কৰিছে।
এই সময়সীমা বৃদ্ধিৰ ফলত হলফনামা দাখিলৰ অন্তিম তাৰিখ ১২ ডিচেম্বৰলৈ পিছুৱাই গৈছে। ইয়াৰ ফলত যিকোনো ব্যক্তি আৰু সাক্ষীকে ধৰি সকলো পক্ষই আয়োগৰ ওচৰত নিজৰ বক্তব্য দাখিল কৰিবলৈ অধিক সময় লাভ কৰিব।
উল্লেখ্য যে, হলফনামা দাখিলৰ পূৰ্বৰ সময়সীমা যোৱা ২১ নৱেম্বৰত উকলি গৈছিল। কিন্তু জমা দিবলগীয়া হলফনামা আৰু অধিক সময় বিচাৰি কৰা আবেদনসমূহ বিবেচনা কৰি আয়োগে আনুষ্ঠানিকভাৱে এই নতুন সময়সীমা বৃদ্ধিৰ বাবে অনুমোদন জনায়।
জুবিন গাৰ্গৰ অকাল আৰু ৰহস্যজনক মৃত্যুৰ তদন্ত কৰা, আৰু এইক্ষেত্ৰত কোনো ধৰণৰ গাফিলতি, অপৰাধমূলক কাৰ্য, বা পদ্ধতিগত ত্ৰুটি আছিল নেকি সেয়া নিৰ্ণয় কৰাৰ বাবে এই ন্যায়িক আয়োগ গঠন কৰা হৈছিল।
ইফালে, দিনটোৰ আৰম্ভণিতে বিশেষ তদন্তকাৰী দলে জুবিনৰ গাৰ্গৰ দুটা বেগ ফৰেনছিক পৰীক্ষাৰ বাবে প্ৰেৰণ কৰিছে।
শেহতীয়াকৈ ছিংগাপুৰ ভ্ৰমণৰ সময়ত জুবিন গাৰ্গে লগত নিয়া এই দুটা বেগ শনিবাৰে তেওঁৰ কাহিলীপাৰাৰ বাসগৃহৰ পৰা সংগ্ৰহ কৰা হৈছিল।
