ডেৰ মাহজোৰা লোকসভা নিৰ্বাচন একেবাৰে চূড়ান্ত পৰ্যায়ত। আজি সমগ্ৰ দেশতে সপ্তম অৰ্থাৎ অন্তিম পৰ্যায়ৰ ভোটগ্ৰহণ অনুষ্ঠিত হৈছে। এই পৰ্যায়ত কেইবাজনো তাৰকা প্ৰাৰ্থীৰ ভাগ্য পৰীক্ষা হ’ব। এই পৰ্যায়ৰ প্ৰাৰ্থীৰ তালিকাত প্ৰধানমন্ত্ৰী নৰেন্দ্ৰ মোডীৰ পৰা আৰম্ভ কৰি শাসকীয় আৰু বিৰোধী দলৰ কেইবাগৰাকীও নেতা আছে।
শনিবাৰে সমগ্ৰ দেশতে ৫৭টা সমষ্টিত অনুষ্ঠিত হৈছে লোকসভা নিৰ্বাচন ২০২৪ৰ অন্তিম পৰ্যায়ৰ ভোটগ্ৰহণ। এই পৰ্যায়ত পশ্চিমবংগৰ ৯টা সমষ্টিতো ভোটদান আৰম্ভ হৈছে। এই পৰ্যায়ৰ ৫৭খন আসনত ৯০৪জন প্ৰাৰ্থীয়ে প্ৰতিদ্বন্দ্বিতা কৰিছে। যোৱাবাৰ নিৰ্বাচনত এই ৫৭ টাৰ ভিতৰত ২৫ টা বিজেপিৰ হাতত আছিল। কংগ্ৰেছৰ হাতত আছিল ১৩টা সমষ্টি।
অন্তিম পৰ্যায়ৰ ভোটগ্ৰহণত আটাইতকৈ দৃষ্টি আকৰ্ষণ কৰা প্ৰাৰ্থীগৰাকী হৈছে প্ৰধানমন্ত্ৰী নৰেন্দ্ৰ মোদী। তেওঁ একেৰাহে তৃতীয়বাৰৰ বাবে বাৰাণসীৰ সাংসদ হোৱাৰ যুঁজত অৱতীৰ্ণ হৈছে। এই আসনত তেওঁৰ প্ৰতিদ্বন্দ্বী কংগ্ৰেছৰ অজয় ৰায়।
সপ্তম পৰ্যায়ত বিজেপিৰ কেইবাজনো হেভিৱেট প্ৰাৰ্থী আছে। হিমাচল প্ৰদেশৰ মাণ্ডী আসনৰ পৰা প্ৰতিদ্বন্দ্বিতা কৰিছে কংগনা ৰানাৱটে। গোৰখপুৰৰ বিজেপিৰ টিকটত অৱতীৰ্ণ হৈছে ভোজপুৰী মেগাষ্টাৰ ৰবি কিষাণ।
হিমাচলৰ হামিৰপুৰৰ পৰা প্ৰতিদ্বন্দ্বিতা আগবঢ়াইছে কেন্দ্ৰীয় মন্ত্ৰী অনুৰাগ ঠাকুৰে। প্ৰাক্তন অধ্যক্ষ মীৰা কুমাৰৰ পুত্ৰ অংশুল অভিজিতৰ বিৰুদ্ধে পাটনাৰ পৰা প্ৰতিদ্বন্দ্বিতা আগবঢ়াইছে প্ৰাক্তন কেন্দ্ৰীয় মন্ত্ৰী ৰবি শংকৰ প্ৰসাদে।
ইপিনে, বিৰোধী দলৰো কেইবাজনো তাৰকা প্ৰাৰ্থীও আছে। তাত উল্লেখযোগ্য নাম অভিষেক বেনাৰ্জী। তেওঁ ডাইমণ্ড হাৰ্বাৰৰ পৰা সাংসদ হিচাপে তৃতীয় কাৰ্যকালৰ বাবে প্ৰতিদ্বন্দ্বিতা আগবঢ়াইছে। পঞ্জাৱৰ প্ৰাক্তন মুখ্যমন্ত্ৰী চৰণজিৎ সিং চান্নীয়ে জলন্ধৰ সমষ্টিৰ পৰা প্ৰতিদ্বন্দ্বিতা আগবঢ়াইছে। পাটলিপুত্ৰৰ পৰা আছে লালু প্ৰসাদ যাদৱৰ কন্যা মিছা ভাৰতী।
সপ্তম পৰ্যায়ত দুগৰাকী নিৰ্দলীয় প্ৰাৰ্থীয়েও দৃষ্টি আকৰ্ষণ কৰিছে। বিজেপিয়ে আছানছোল সমষ্টিৰ পৰা ভোজপুৰী গায়ক পৱন সিঙক প্ৰক্ষেপ কৰিছিল। কিন্তু প্ৰবল বিতৰ্কৰ মাজত তেওঁ সেই সমষ্টিৰ পৰা আঁতৰি যায়। পিছত বিহাৰৰ কাৰাকাট সমষ্টিত বিজেপিৰ বিৰুদ্ধে নিৰ্দলীয় প্ৰাৰ্থী হিচাপে মনোনয়ন দাখিল কৰে।
এই পৰ্যায়ত খাদুৰ চাহাব সমষ্টিৰ পৰা নিৰ্দলীয় প্ৰাৰ্থী অমৃতপাল সিং। বৰ্তমান তেওঁ একাধিক খালিস্তানী কাৰ্যকলাপৰ বাবে অসমৰ ডিব্ৰুগড়ৰ জেলত কাৰাবন্দী হৈ আছে। ৰাজনৈতিক বিশেষজ্ঞসকলৰ মতে অমৃতপালে নিজৰ আসনখন দখল কৰাৰ সম্ভাৱনাও আছে।
