ব্যক্তিগত শিক্ষানুষ্ঠান ইউনিভাৰ্চিটি অৱ চাইন্স এণ্ড টেকন’লজি, মেঘালয়ৰ চ্যান্সেলৰক গ্ৰেপ্তাৰ কৰাত গভীৰ উদ্বেগ প্ৰকাশ কৰি মুছলমান নাগৰিক সমাজৰ এটা গোটে প্ৰধানমন্ত্ৰী নৰেন্দ্ৰ মোদীলৈ পত্ৰ প্ৰেৰণ কৰি বিষয়টোৰ ওপৰত ন্যায় নিশ্চিত কৰিবলৈ আহ্বান জনাইছে।
জালিয়াতিৰ জৰিয়তে ছাত্ৰ-ছাত্ৰীক উচ্চ নম্বৰ প্ৰদান কৰা চক্ৰৰ সৈতে জড়িত থকাৰ অভিযোগত শনিবাৰে গুৱাহাটী বাসগৃহৰ পৰা গ্ৰেপ্তাৰ কৰা হয় ইউ এছ টি এমৰ চ্যান্সেলৰ মহবুবুল হকক।তেওঁ এই জালিয়াতিৰ সৈতা জড়িত থকা বুলি অসমৰ মুখ্যমন্ত্ৰী হিমন্ত বিশ্ব শৰ্মাই নিশ্চিত কৰিছিল ।
প্ৰাক্তন মুখ্য নিৰ্বাচন আয়ুক্ত এছ.ৱাই.কে কোৰাইছি আৰু দিল্লীৰ প্ৰাক্তন উপ-ৰাজ্যপাল নাজিব জঙকে ধৰি বিশিষ্ট ব্যক্তিসকলৰ ক্ষৰিত পত্ৰখনত এই গ্ৰেপ্তাৰক গৰিহণা দি কয় যে, ইয়াৰ লক্ষ্য হৈছে সমাজৰ প্ৰগতিশীল সদস্যসকলৰ মনোবল হ্ৰাস কৰা আৰু আধুনিক শিক্ষা আৰু চিকিৎসা প্ৰতিষ্ঠান স্থাপনৰ প্ৰচেষ্টাত বাধা প্ৰদান কৰা। সেয়ে প্ৰধানমন্ত্ৰীৰ হ্স্তক্ষেপ বিচাৰি এই পত্ৰ প্ৰেৰণ কৰিছে।
ইফালে অসমৰ মুখ্যমন্ত্ৰী হিমন্ত বিশ্ব শৰ্মাই ভৱিষ্যদ্বাণী কৰিছে যে বিজ্ঞান আৰু প্ৰযুক্তি বিশ্ববিদ্যালয় মেঘালয়ৰ চ্যান্সেলৰ মহবুবুল হকে দীৰ্ঘদিনীয়া কাৰাদণ্ডৰ সন্মুখীন হোৱাৰ সম্ভাৱনা আছে। মহবুবুল হকক আৰক্ষীৰ জিম্মাত ৰখাৰ পিছত এক বিবৃতি প্ৰদান কৰি শৰ্মাই তদন্ত অব্যাহত থকা বুলি উল্লেখ কৰে। অতিৰিক্ত মুখ্য ন্যায়িক দণ্ডাধীশে আদালতৰ নিৰ্দেশৰ পিছতে মহবুবুল হকক চাৰিদিনীয়া আৰক্ষীৰ ৰিমাণ্ডত ৰাখিছে।
হকৰ লগতে এই গোচৰৰ সৈতে সম্পৰ্ক থকা আন কেইবাজনো লোককো আটক কৰা হৈছে। ইয়াৰ ভিতৰত আছে ইউ এছ টি এমৰ উপাচাৰ্য, হিৰমণি শইকীয়া, আৰু বিজয় দত্ত, ৰেজাক আলী, নুমান আহমেদ, ইমদাদুৰ ৰহমানকে ধৰি কেইবাজনো শিক্ষক। তেওঁলোককো চাৰিদিনৰ বাবে আৰক্ষীৰ জিম্মালৈ প্ৰেৰণ কৰা হৈছে।
পাথাৰকান্দি থানাৰত পঞ্জীয়ন কৰা এই গোচৰটোত ভাৰতীয় দণ্ডবিধিৰ একাধিক ধাৰা আৰু জনপ্ৰশাসন নিষেধাজ্ঞা আইনৰ উপৰিও আন এটা আনুষংগিক গোচৰ আদালতত দাখিল কৰা হৈছে।
