মেৰামতিৰ বাবে যোৱা তিনিমাহে বন্ধ হৈ থকা শৰাইঘাটৰ পুৰণি দলঙেৰে আজিৰে পৰা পুনৰ যান-বাহন চলাচল আৰম্ভ কৰিলে।
বৃহস্পতিবাৰে বিয়লি ২:৩০ বজাৰ পৰা যান বাহন চলাচল কৰে দলঙখনেৰে। উত্তৰ-পূব ৰেইলৱেৰ মহা প্ৰৱন্ধক সঞ্জীৱ ৰয়ে শৰাইঘাটৰ পুৰণি দলঙখনেৰে যান বাহনৰ চলাচল আনুষ্ঠানিকভাৱে মুকলি কৰে।
উল্লেখযোগ্য যে, যোৱা ২৩ মাৰ্চৰ পৰা মেৰামতিৰ বাবে দলংখনেৰে যানবাহনৰ চলাচল সাময়িকভাৱে বন্ধ কৰি ৰখা হৈছিল, যাৰ ফলত জালুকবাৰীৰ পৰা শৰাইঘাটৰ দ্বিতীয় দলঙৰ সিটো মূৰলৈকে প্ৰতিদিনেই সৃষ্টি হৈছিল তীব্ৰ যান-জঁটৰ।
আজিৰে পৰা এই দলঙখন মুকলি হোৱাত যাত্ৰীসকলে যান-জঁটৰ সমস্যাৰ পৰা কিছু পৰিমাণে সকাহ লাভ কৰিব।
৯ কোটি টকা ব্যয় সাপেক্ষে এই দলঙৰ মেৰামতি কৰা হয় বুলি জানিবলৈ দিয়ে মহা প্ৰবন্ধক গৰাকীয়ে। লগতে অত্যাধুনিক প্ৰযুক্তি বিদ্যা প্ৰয়োগ কৰাৰ বাবে বছৰ বছৰ ধৰি দলংখনৰ মেৰামতিৰ প্ৰয়োজন নহ’ব বুলিও তেওঁ কয়।
তদুপৰি, অসম চৰকাৰে যোৱা মাৰ্চ মাহতে দলঙখনৰ মেৰামতিৰ কাম ৰেইলৱে কৰ্তৃপক্ষক অৰ্পণ কৰিছিল। মুখ্য মন্ত্ৰী সৰ্বানন্দ সোণোৱালে আজিৰ দিনটোলৈকে দলঙখন মেৰামতিৰ বাবে ৰেইল বিভাগক সময়সীমা বান্ধি দিছিল। সেই অনুসৰিয়েই ৰেইল বিভাগে সম্পূৰ্ণৰূপে মেৰামতি কৰি নতুন ৰূপত সজাই তুলিলে শৰাইঘাটৰ পুৰণি দলঙখন।
১৯৬৩ চনৰ ৭ জুনত আনুষ্ঠানিকভাৱে মুকলি হোৱা শৰাইঘাটৰ পুৰণি দলঙৰ মেৰামতিৰ কাম প্ৰথমবাৰৰ বাবে সম্পূৰ্ণ হ’ল।
ইপিনে, উত্তৰ-পূব ৰেইলৱেৰ জনসম্পৰ্কৰক্ষী বিষয়া প্ৰণৱ জ্যোতি শৰ্মাই জানিবলৈ দিয়া মতে দৈনিক ৫০০ জন শ্ৰমিক দলঙখনৰ মেৰামতিৰ কামত নিয়োজিত হৈছিল তথা ৫৪ খন শ্লেৱ নতুনকৈ নিৰ্মাণ কৰা হৈছে। লগতে নিৰ্মাণকাৰ্য্যত ৫০০ টনৰো অধিক ষ্টীল প্লেট আৰু ৰিনফৰ্চমেণ্ট ৰ’ড ব্যৱহৃত হৈছিল বুলিও তেওঁ জানিবলৈ দিয়ে।
