আইনী পৰিভাষাত ধৰ্ষণৰ চেষ্টা আৰু শ্লীলতাহানিৰ মাজত প্ৰকৃত পাৰ্থক্য ক’ত, সেই সন্দৰ্ভত এক গুৰুত্বপূৰ্ণ ৰায়দান কৰিছে পাটনা উচ্চ ন্যায়ালয়ে। বিহাৰৰ এটা পুৰণি গোচৰৰ ৰায় দি আদালতে স্পষ্ট কৰি দিছে যে কোনো মহিলাৰ চেলৱাৰ বা কাপোৰ খোলাৰ চেষ্টা কৰা অথবা তেওঁৰ বুকুত জোৰকৈ হেঁচা দিলেই তাক ধৰ্ষণৰ চেষ্টা বুলি প্ৰমাণ কৰিব নোৱাৰি, যদিহে তাত ধৰ্ষণৰ স্পষ্ট উদ্দেশ্য বা শাৰীৰিক সম্পৰ্ক স্থাপনৰ কোনো প্ৰমাণ নাথাকে। ২০০৮ চনৰ এটা পুৰণি গোচৰত এজন ব্যক্তিৰ তিনি বছৰৰ কাৰাদণ্ডৰ শাস্তি বাতিল কৰি বিচারপতি পূৰ্ণেন্দু সিঙে এই ৰায় প্ৰদান কৰিছে।
এই ঘটনাটো ঘটিছিল ২০০৮ চনৰ ১৯ জানুৱাৰীত বিহাৰৰ বাংকা জিলাৰ অমৰপুৰ অঞ্চলত। তাত এগৰাকী যুৱতীয়ে তেওঁৰ দেউতাকৰ সৈতে এটা ষ্টুডিঅ’ত ফটো তুলিবলৈ গৈছিল। অভিযোগ অনুসৰি, ফটো তোলাৰ পিছত যুৱতীগৰাকীৰ দেউতাকক কম্পিউটাৰ স্ক্ৰীণ দেখুওৱাৰ চলেৰে বাহিৰত বহুৱাই থৈ ষ্টুডিঅ’ৰ মালিকে দুৱাৰ বন্ধ কৰি দিয়ে। ইয়াৰ পিছত যুৱতীগৰাকীৰ চেলৱাৰ খোলাৰ চেষ্টা কৰা হয় আৰু তেওঁৰ বুকুত চাপ দি নিৰ্যাতন চলোৱা হয়। যুৱতীগৰাকীৰ চিঞৰ শুনি দেউতাক দৌৰি অহাত অভিযুক্ত ষ্টুডিঅ’ৰ মালিকজন তাৰ পৰা পলাই যায়। এই ঘটনাৰ ভিত্তিত নিম্ন আদালতে অভিযুক্তক ধৰ্ষণৰ চেষ্টা আৰু বেআইনীভাৱে আৱদ্ধ কৰি ৰখাৰ অপৰাধত দোষী সাব্যস্ত কৰি তিনি বছৰৰ কাৰাদণ্ড বিহিছিল। এই ৰায়ৰ বিৰুদ্ধেই অভিযুক্তই পাটনা উচ্চ ন্যায়ালয়ৰ দ্বাৰস্থ হৈছিল।
উচ্চ ন্যায়ালয়ত গোচৰটোৰ শুনানিৰ সময়ত বিচাৰপীঠে সকলো তথ্য আৰু প্ৰমাণ পুনৰীক্ষণ কৰে। আদালতে লক্ষ্য কৰে যে এই গোচৰত কোনো তদন্তকাৰী বিষয়া বা কোনো চিকিৎসা বিষয়াক আদালতত সাক্ষী হিচাপে হাজিৰ কৰোৱা হোৱা নাছিল। পাটনা উচ্চ ন্যায়ালয়ে স্পষ্টকৈ কয় যে ধৰ্ষণৰ চেষ্টাৰ বাবে যি ধৰণৰ প্ৰমাণ বা নূন্যতম শাৰীৰিক সম্পৰ্ক স্থাপনৰ চেষ্টা থকাৰ প্ৰয়োজন, সেয়া এই গোচৰত পোৱা হোৱা নাই। অৱশ্যে আদালতে এইটো স্বীকাৰ কৰিছে যে বন্ধ কোঠাত যুৱতীগৰাকীক আৱদ্ধ কৰি কাপোৰ খোলাৰ চেষ্টা কৰা আৰু বুকুত হাত দিয়াৰ ঘটনাটো নিঃসন্দেহে এগৰাকী নাৰীৰ সন্মানহানি বা শ্লীলতাহানিৰ দৰে অপৰাধ। কিন্তু আইনী দৃষ্টিত ই এক অপৰাধ হ’লেও ইয়াক ধৰ্ষণৰ চেষ্টা বুলি ক’ব নোৱাৰি। আৱশ্যকীয় আইনী প্ৰমাণৰ অভাৱত অৱশেষত উচ্চ ন্যায়ালয়ে নিম্ন আদালতৰ ৰায় বাতিল কৰি অভিযুক্তক খালাচ কৰি দিয়ে।
উল্লেখ কৰিব লাগিব যে এই ধৰণৰ ৰায় এয়াই প্ৰথম নহয়। ইয়াৰ পূৰ্বে ২০২৫ চনৰ ১৭ মাৰ্চত এলাহাবাদ উচ্চ ন্যায়ালয়েও অনুৰূপ এটা বিতৰ্কিত ৰায় দিছিল। এঘাৰ বছৰীয়া এগৰাকী নাবালিকাৰ পাজামাৰ জৰী খোলা আৰু তাইক টানি লৈ যোৱাৰ ঘটনাক ধৰ্ষণৰ চেষ্টা নকৈ কেৱল ধৰ্ষণৰ প্ৰস্তুতি বুলি ৰায় দিছিল বিচাৰকগৰাকীয়ে। সেই ৰায়টোক লৈ সমগ্ৰ দেশজুৰি তীব্ৰ ক্ষোভৰ সৃষ্টি হৈছিল। অধিবক্তা আৰু সমাজকৰ্মীসকলৰ প্ৰতিবাদৰ পিছত ২০২৫ চনৰ ২৪ মাৰ্চত দেশৰ উচ্চতম ন্যায়ালয়ে স্বতঃস্ফূৰ্তভাৱে এই বিষয়ত হস্তক্ষেপ কৰে আৰু ২৬ মাৰ্চত এলাহাবাদ উচ্চ ন্যায়ালয়ৰ সেই ৰায়ৰ ওপৰত স্থগিতাদেশ জাৰি কৰে। তদানীন্তন মুখ্য ন্যায়াধীশ বি আৰ গাভাইৰ নেতৃত্বাধীন বিচাৰপীঠে তীব্ৰ অসন্তুষ্টি প্ৰকাশ কৰি কৈছিল যে উচ্চ ন্যায়ালয়ৰ এই ধৰণৰ ৰায়ে চৰম অসংবেদনশীলতাৰ পৰিচয় দিয়ে।
