সম্প্ৰতি সময়ত ৰাজ্যত চৰ্চাত আছে গৰু । সাংসদ, বিধায়ক, মন্ত্রীপত্নী, নেতা-পালিনেতা, মন্ত্ৰীৰ ঘনিষ্ঠ ঠিকাদাৰ, পশু চিকিৎসক আদিয়ে গো-পালনৰ বিবিধ চৰকাৰী সা-সুবিধা, ৰাজসাহায্য লোৱাৰ কথা পোহৰলৈ অহাৰ পাছতেই সামাজিক মাধ্যমৰ পৰা ৰাজনীতিলৈ সকলোতে গৰুৰ প্ৰসংগই চৰ্চা লাভ কৰিছে।
চৰকাৰী মদদপুষ্ট শক্তিয়ে ৰাজসাহায্য লাভ কৰাৰ বিপৰীতে ৰাজ্যৰ গো-পালন, দুগ্ধ উৎপাদনৰ ছবিখন দেখিবলৈ পোৱা গৈছে অতি শোচনীয় ! জানিব পৰা মতে, বহু গো পালকে গো-পালন এৰি আন অন্য কৰ্মৰ লগত জড়িত হ’বলৈ ধৰিছে ৷ এই তথ্য সদৰী কৰিছে The Assam State Co-Operative Milk Marketing Federation Ltd-এ ।
ETV ভাৰতৰ আগত ফেডাৰেচনৰ তদৰ্থ কমিটীৰ সভাপতি বিৰিঞ্চি কাশ্যপৰ সৈতে হোৱা এক বাৰ্তালাপত তেওঁ কয়, ‘‘শেহতীয়াকৈ জয়ন্ত মল্লবৰুৱাৰ পত্নীৰ নামত ৰাজ সাহায্য পোৱাটো এতিয়াহে পোহৰলৈ আহিছে । বিগত ৫ বছৰত এনে উদাহৰণ বহুত পোৱা যাব । মন্ত্ৰী, বিধায়ক, মন্ত্ৰীৰ নিজৰ মানুহে এনেবোৰ সুবিধা লাভ কৰিছে ।’’
বিৰিঞ্চি কাশ্যপে আৰু কয়, ‘‘যুৱ প্ৰজন্মক আত্মনিৰ্ভৰ কৰাৰ কথা চৰকাৰে শ্ল’গান দি আহিছে । প্ৰকৃতাৰ্থত সেয়া হোৱা নাই । প্ৰকৃতাৰ্থত যিসকল গো- পালকে গো-পালন কৰি আছে তেওঁলোকৰ মন ভাগি গৈছে । গৰুৰ খাদ্যৰ মূল্যবৃদ্ধিয়ে তেওঁলোকক জুৰুলা কৰি পেলাইছে । সেয়ে বিভিন্ন অঞ্চলৰ সাধাৰণ গো-পালকে গৰু বিক্ৰী কৰি অন্য ব্যৱসায় আৰম্ভ কৰিবলগীয়া পৰিস্থিতিৰ সৃষ্টি হৈছে । প্ৰকৃত গো-পালকসকল চৰকাৰী আঁচনি লাভৰ পৰা বঞ্চিত হৈ আছে ।’’
তেওঁ লগতে কয়, ‘‘তদুপৰি সমবায়ৰ জৰিয়তে গো-পালকে গাখীৰ বিক্ৰী কৰিলে লিটাৰে প্ৰতি ৫ টকাকৈ ৰাজসাহায্য লাভ কৰিব বুলি দুবছৰ পূৰ্বে মুখ্যমন্ত্ৰীয়ে কৰা ঘোষণা আজিলৈ কাৰ্যকৰী নহ’ল । দানা, চাপৰ আদিৰ দাম উৎপাদনকাৰী প্রতিষ্ঠানে নিজৰ খেয়াল-খুচি মতে যেতিয়াই-তেতিয়াই বঢ়াই দিয়ে । তেওঁলোকক নিয়ন্ত্ৰণৰ বাবে চৰকাৰৰ কোনোধৰণৰ নীতি নিয়ম নাই । গ্ৰাম্য অৰ্থনীতি আগবঢ়াই নিবলৈ পথাৰত ধান, গোহালিত গৰু আৰু পুখুৰীত মাছৰ লাগিবই । এই তিনিটা ক্ষেত্ৰত যিসকল থলুৱা লোকে কাম কৰিবলৈ আহিছে, তেওঁলোকৰ কামিহাঁড় ভাঙি দিছে । বনিক গোষ্ঠীক ধনী কৰিছে ।”
তেওঁ লগতে কয়, ‘‘National Programme For Dairy Development চমুকৈ NDDB-এ গৰুখুটিলৈ ৩০০ গীৰ গাই আনিছিল । ৰুগীয়া গৰু দিছিল । ইয়াৰ পিছতো অসম চৰকাৰ আৰু wamul আৰু NDDB ৰ ত্ৰিপক্ষিক চুক্তি কৰিছে । অসমত লুণ্ঠন কৰিবলৈ বাছি লৈছে NDDB-এ ।’’
