মঙলবাৰৰ পৰা আৰম্ভ হোৱা অসম বিধানসভাৰ শীতকালীন অধিৱেশনৰ গাম্ভীৰ্যৰ মাজতে চৰ্চাৰ কেন্দ্ৰবিন্দু হৈ পৰিছে সৰভোগৰ বিধায়ক মনোৰঞ্জন তালুকদাৰৰ এটা ভাইৰেল ফোনকল। বিধায়কগৰাকীৰ বিৰুদ্ধে উত্থাপিত ধন দাবীৰ অভিযোগক গুৰুত্ব সহকাৰে লৈ বিধানসভাৰ অধ্যক্ষ বিশ্বজিত দৈমাৰীয়ে বিষয়টো সন্দৰ্ভত গোচৰ ৰুজু কৰিবলৈ নিৰ্দেশ দিছে। লগতে, সত্যতা নিৰূপণৰ বাবে বিধানসভা সচিবালয়ে বিধায়কগৰাকীৰ কণ্ঠস্বৰৰ নমুনা সংগ্ৰহৰ বাবেও নিৰ্দেশনা জাৰি কৰিছে।
কিছুদিন পূৰ্বে ছ’চিয়েল মিডিয়াত এটা ফোনকলৰ অডিঅ’ ৰেকৰ্ডিং ভাইৰেল হৈ পৰিছিল, য’ত বিধায়ক মনোৰঞ্জন তালুকদাৰ বুলি দাবী কৰা এজন ব্যক্তিয়ে হৰ্ষ নামৰ এজন ব্যৱসায়ীৰ পৰা ধন দাবী কৰা শুনা গৈছিল। বিষয়টো পোহৰলৈ অহাৰ লগে লগে ৰাজ্য চৰকাৰে কণ্ঠস্বৰ পৰীক্ষাৰ নিৰ্দেশ দিছিল। পৰৱৰ্তী সময়ত, যোৱা ২০ নৱেম্বৰত বিধানসভাৰ এথিক্স কমিটিয়ে উক্ত অডিঅ’ ক্লিপটো ফৰেন্সিক পৰীক্ষাৰ বাবে প্ৰেৰণ কৰে। ফৰেন্সিকৰ প্ৰতিবেদন এথিক্স কমিটিৰ হাতত পৰাৰ পাছতে এতিয়া বিধানসভাৰ অধ্যক্ষই বিধায়কজনৰ বিৰুদ্ধে আইনী ব্যৱস্থা গ্ৰহণৰ বাবে নিৰ্দেশ দিছে।
ভাইৰেল হোৱা অডিঅ’টোত শুনা কথাখিনি আছিল এনেধৰণৰ— “মই এচেম্বলীৰ সময়ত আপোনাক জুলুম কৰা নাই। এতিয়া মই এম এল এ, হ’লেও জুলুম কৰা নাই। মোক এতিয়া এটা ‘হেভী এমাউন্ট’ লাগে। ২-৩ দিনৰ ভিতৰত লাগে। আৰু হেভী লাগে, ২-১ৰ কথা কোৱা নাই। কি হয় জনাব।”
আনহাতে, বিধায়ক মনোৰঞ্জন তালুকদাৰে আৰম্ভণিৰ পৰাই এই অভিযোগ খণ্ডন কৰি আহিছে। তেওঁৰ দাবী, ভাইৰেল হোৱা কণ্ঠস্বৰ তেওঁৰ নহয়। বৰ্তমান সমগ্ৰ বিষয়টো তদন্তৰ আওতাত আছে। বিধানসভাৰ নিৰ্দেশমৰ্মে হ’বলগীয়া তদন্ত আৰু কণ্ঠস্বৰৰ পৰীক্ষাৰ ফলাফলেহে নিশ্চিত কৰিব যে এই বিতৰ্কিত ফোনকলৰ আঁৰৰ ব্যক্তিজন প্ৰকৃততে সৰভোগৰ বিধায়কজন হয় নে নহয়।
