কেন্দ্ৰীয় শ্ৰমিক সংগঠন আৰু কৰ্মচাৰী ফেডাৰেচনসমূহৰ আহ্বানত অহা ১২ ফেব্ৰুৱাৰীত অনুষ্ঠিত হ’বলগীয়া ঐতিহাসিক দেশজোৰা ধৰ্মঘটৰ প্ৰতি অসমৰ বাওঁপন্থী সংগঠনসমূহে পূৰ্ণ সমৰ্থন ব্যক্ত কৰিছে। আজি গুৱাহাটী প্ৰেছ ক্লাবত এছ এফ আই (SFI), ডি ৱাই এফ আই (DYFI), চিটু (CITU), নিখিল ভাৰত গণতান্ত্ৰিক মহিলা সমিতি (AIDWA), অসম কৃষি শ্ৰমিক ইউনিয়ন আৰু অসম ৰাজ্যিক কৃষক সভাৰ তৰফৰ পৰা এক যৌথ সংবাদমেল সম্বোধন কৰি চৰকাৰৰ কৃষক-শ্ৰমিক-যুৱক-মহিলা আৰু শিক্ষাৰ্থী বিৰোধী চৰিত্ৰক তীব্ৰ সমালোচনা কৰা হয়। ১২ ফেব্ৰুৱাৰীৰ এই প্ৰতিবাদৰ অংশ হিচাপে মটৰ শ্ৰমিক শ্ৰেণীয়ে ৰাজ্যজুৰি ‘চকা বন্ধ’ৰ কাৰ্যসূচী গ্ৰহণ কৰিছে।
সংবাদমেলত নেতৃবৃন্দই উল্লেখ কৰে যে কেন্দ্ৰীয় চৰকাৰে জনসাধাৰণৰ স্বাৰ্থ জলাঞ্জলি দি কেৱল নিজৰ কৰ্প’ৰেট বন্ধুসকলৰ স্বাৰ্থত ২৯ খন শ্ৰম আইনক একত্ৰিত কৰি চাৰিখন নতুন ‘শ্ৰম বিধি’ (Labour Codes) প্ৰণয়ন কৰিছে। এই ক’লা আইনে ৩০০ জনলৈকে শ্ৰমিক থকা প্ৰতিষ্ঠানক ‘হায়াৰ এণ্ড ফায়াৰ’ নীতিৰ জৰিয়তে যিকোনো মুহূৰ্ততে শ্ৰমিকক কামৰ পৰা খেদি পঠোৱাৰ একনায়কত্ববাদী ক্ষমতা দিছে। ‘নিৰ্দিষ্ট কালীন নিযুক্তি’ৰ জৰিয়তে স্থায়ী চাকৰিৰ ধাৰণাটোকে বিলুপ্ত কৰি ৮ ঘণ্টাৰ সলনি ১২ ঘণ্টীয়া কৰ্মদিন আৰু অভাৰটাইমৰ কোনো সীমা নথকা ব্যৱস্থাই শ্ৰমিকক মধ্যযুগীয় দাসত্বলৈ ঠেলি দিছে। ইয়াৰোপৰি শ্ৰমিকৰ ভৱিষ্য নিধিৰ (EPF) অৱদান ১২% ৰ পৰা ১০% লৈ হ্ৰাস কৰাটো চৰকাৰী পৃষ্ঠপোষকতাত চলোৱা এক আৰ্থিক ডকাইতি বুলি সংবাদমেলত অভিহিত কৰা হয়।
কৃষি আৰু গ্ৰামীণ অৰ্থনীতিৰ ধ্বংসলীলা
চৰকাৰে মহাত্মা গান্ধী নৰেগা (MGNREGA) আঁচনি বাতিল কৰি তাৰ ঠাইত ‘বিকশিত ভাৰত – নিয়োগ আৰু জীৱিকা অভিযান (গ্ৰামীণ) বিল, ২০২৫’ আনিছে। এই বিলে মজুৰিৰ আৰ্থিক বোজা কেন্দ্ৰৰ ১০০ শতাংশৰ পৰা ৬০:৪০ অনুপাতলৈ সলনি কৰি ৰাজ্যসমূহৰ ওপৰত অতিৰিক্ত বোজা জাপি দিছে। আনহাতে, উচিত মূল্যৰ অভাৱত শদিয়াত কৃষকে নিজৰ উৎপাদিত আলু পেলাই দিবলগীয়া পৰিস্থিতিৰ সৃষ্টি হৈছে। তেনে সময়তে আমেৰিকাৰ পৰা আমদানি কৰা কৃষিজাত সামগ্ৰীৰ ক্ষেত্ৰত ‘শূণ্য কৰ’ আৰোপ কৰি চৰকাৰে দেশীয় কৃষকৰ কঁকাল ভাঙি দিছে।
ৰাজহুৱা শিক্ষাখণ্ডৰ ধ্বংস
ৰাজ্য চৰকাৰে ঘৃণাৰ ৰাজনীতিৰ পোষকতা কৰি শিক্ষাখণ্ডটোলৈ ভয়াবহ ভাবুকি নমাই আনিছে। বৰ্তমানৰ বিজেপি চৰকাৰৰ দিনতে মাতৃভাষা মাধ্যমৰ প্ৰায় ১০,০০০ খন স্কুল বন্ধ কৰি দিয়া হৈছে। চৰকাৰী শিক্ষাৰ মান হ্ৰাস কৰি শিক্ষকসকলক অনবৰতে পাঠ্যক্ৰম বহিৰ্ভূত কামত নিয়োজিত কৰাৰ ফলত যোৱা বছৰ বিনামূলীয়া নামভৰ্তি কৰা ৯০,০০০ শিক্ষাৰ্থীৰ ভিতৰত ২৮,০০০ শিক্ষাৰ্থীয়ে মাত্ৰ ৬ মাহতে কলেজ ত্যাগ কৰিছে।
নিবনুৱা সমস্যা আৰু দুৰ্নীতিৰ অসাধু চক্ৰ
অসমত আজি মুখ্যমন্ত্ৰী, মুখ্যমন্ত্ৰীৰ ব্যৱসায়ী পৰিয়াল আৰু একাংশ দুৰ্নীতিগ্ৰস্ত আমোলাৰ এক অসাধু চক্ৰই খাটিখোৱা মানুহৰ মাটি কাঢ়ি কৰ্পোৰেট গোষ্ঠীসমূহক গতাই দিছে। চৰকাৰে ১.৩৫ লাখ চাকৰি দিয়াৰ যি দাবী কৰি হৰ্ডিং লগাইছে, সেই সংখ্যাটো অত্যন্ত সন্দেহজনক। সেয়েহে চৰকাৰে নিযুক্তি পোৱা প্ৰতিগৰাকী প্ৰাৰ্থীৰ নাম, ৰোল নম্বৰ আৰু পঞ্জীয়ন নম্বৰসহ এক শ্বেতপত্ৰ প্ৰকাশ কৰিব লাগে বুলি সংবাদমেলত দাবী উত্থাপন কৰা হয়।অহা ১২ ফেব্ৰুৱাৰীৰ এই ধৰ্মঘটৰ জৰিয়তে এই সকলো শোষন আৰু লুণ্ঠনৰ বিৰুদ্ধে এক ঐক্যবদ্ধ প্ৰতিৰোধ গঢ়ি তোলা হ’ব। বাওঁ সংগঠনসমূহে ৰাজ্যৰ সমূহ ৰাইজক এই ধৰ্মঘটত সক্ৰিয়ভাৱে অংশগ্ৰহণ কৰি চৰকাৰৰ একনায়কত্ববাদী চৰিত্ৰৰ বিৰুদ্ধে থিয় দিবলৈ আহ্বান জনাইছে।
