তেলেংগানা উচ্চ ন্যায়ালয়ে ১৬ বছৰৰ তলৰ নাবালকক নিশা ১১ বজাৰ পাছত চিনেমা হলত প্ৰৱেশ কৰাত নিষেধাজ্ঞা আৰোপ কৰিছে। এই সন্দৰ্ভত উচ্চ ন্যায়ালয়ে এই বিষয়ত চৰকাৰে নিৰ্দিষ্ট সিদ্ধান্ত নোলোৱালৈকে ১৬ বছৰৰ তলৰ শিশুক চিনেমা হল বা মাল্টিপ্লেক্সত চিনেমা চাবলৈ অনুমতি নিদিবলৈ ৰাজ্য চৰকাৰ আৰু আনক নিৰ্দেশ দিছে।
উচ্চ ন্যায়ালয়ে ৰায়দানত কয় যে ১৬ বছৰৰ তলৰ নাবালকসকলে পুৱা ১১ বজাৰ আগতে আৰু নিশা ১১ বজাৰ পাছত ছবিগৃহ আৰু মাল্টিপ্লেক্সত চিনেমা শ্ব’ চাব নোৱাৰাকৈ তৎকালীনভাৱে সকলো ব্যৱস্থা গ্ৰহণ কৰিব লাগে। এই সন্দৰ্ভত সংশ্লিষ্ট সকলোকে নিৰ্দেশনা জাৰি কৰিবলৈ আদালতে নিৰ্দেশ দিছে। আবেদনকাৰীৰ অধিবক্তা বিজয় গোপালে আদালতত কয় যে আদালতে নাবালকক গভীৰ নিশাৰ চিনেমা চোৱাত বাধা দিব লাগে।
আবেদনকাৰীৰ আবেদনত উল্লেখ আছে যে বিদ্যালয়ৰ সময়ত অৰ্থাৎ পুৱা ১১ বজাৰ আগতে আৰু নিশা ১১ বজাৰ পাছত চিনেমা চোৱাটোৱে নাবালকৰ শাৰীৰিক আৰু মানসিক স্বাস্থ্যৰ অৱনতি ঘটায়। বেছিভাগ মাল্টিপ্লেক্সতে লেট নাইট শ্ব’ পুৱা ১:৩০ বজাত শেষ হয়। আৰু নাবালকক এই শ্ব’ত প্ৰৱেশ কৰাত বাধা দিয়া কোনো গাইডলাইন নাই। শেহতীয়াকৈ হায়দৰাবাদৰ সন্ধ্যা চিনেমা হলত আল্লু অৰ্জুন অভিনীত পুষ্পা ২: দ্য ৰুল চিনেমাখনৰ প্ৰচাৰ অনুষ্ঠানত এজন ব্যক্তিৰ মৃত্যু আৰু কেইবাজনো লোক আহত হোৱা হুলস্থুলৰ সন্দৰ্ভত আদালতত মুঠ চাৰিখন আৱেদন দাখিল কৰা হয়।
বহু লোকে অভিযোগ কৰিছে যে পুষ্পা ২ আৰু ৰাম চৰণ অভিনীত গেম চেঞ্জাৰক লৈ জনমানসত বিভ্ৰান্তিৰ সৃষ্টি হৈছে। এই সন্দৰ্ভত ন্যায়াধীশগৰাকীয়ে চিনেমা হল আৰু মাল্টিপ্লেক্সকো নাবালকক প্ৰৱেশৰ অনুমতি দিয়াৰ সন্দৰ্ভত নিৰ্দেশ মানি চলিবলৈ কয়। ন্যায়াধীশ বি বিজয়সেনা ৰেড্ডীয়ে কৰ্তৃপক্ষক দাতব্য প্ৰদৰ্শনীৰ নামতো টিকটৰ মূল্য বৃদ্ধিৰ সম্ভাৱনাৰ ওপৰত চকু ৰাখিবলৈ কয়। কোনো ধৰণে আইন উলংঘা হ’লে জৰিমনা আৰু অস্থায়ী অনুজ্ঞাপত্ৰ বাতিল কৰা হ’ব বুলিও আদালতে ঘোষণা কৰিছে।
