শনিবাৰে সদনত ২০২৫-২৬ বৰ্ষৰ কেন্দ্ৰীয় বাজেট দাখিল কৰে দেশৰ বিত্তমন্ত্ৰী নিৰ্মলা সীতাৰমণে। বাজেট দাখিল হোৱাৰ পিছতেই বিশ্লেষক সকলে বাজেটখনৰ ভাল আৰু বেয়া দিশ সমূহ আলোচনা কৰিছে। ইয়াৰ মাজতে ৰাষ্ট্ৰীয় ষ্টক এক্সচেঞ্জৰ মুৰব্বী আশীষকুমাৰ চৌহানেও বাজেট সম্পৰ্কে নিজৰ মত প্ৰকাশ কৰিছে।
চৌহানে কয় যে এই বাজেটত সাধাৰণ লোকক সহায় কৰাৰ সমান্তৰালভাৱে ভাৰতৰ অৰ্থনীতি বৃদ্ধিৰ ওপৰত গুৰুত্ব দিয়া হৈছে।
চৌহানৰ মত অনুসৰি, সংস্থাপনৰ সৃষ্টি আৰু অৰ্থনীতি উন্নীত কৰিবলৈ আন্তঃগাঁথনি নিৰ্মাণৰ বাবে চৰকাৰে অধিক খৰচ কৰাৰ পৰিকল্পনা কৰা হৈছে। মধ্যবিত্তীয় লোকৰ কৰ হ্ৰাস কৰা হৈছে, অৰ্থাৎ তেওঁলোকৰ হাতত খৰচ বা বিনিয়োগ কৰিবলৈ অধিক ধন থাকিব।
ষ্টক একচেঞ্জৰ মূৰব্বী গৰাকীয়ে লগতে কয় যে অধিক সঞ্চয়ৰ দ্বাৰা মানুহে ষ্টক বা মিউচুৱেল ফাণ্ডত বিনিয়োগ কৰিব পাৰিব। ইয়াৰ ফলত সময়ৰ লগে লগে তেওঁলোকৰ ধন-সম্পত্তি বৃদ্ধি পাব।
বৰ্তমান ১১ কোটি ভাৰতীয়ই ষ্টক মাৰ্কেটত বিনিয়োগ কৰে। এই বাজেটৰ ফলত ষ্টক মাৰ্কেটত বিনিয়োগ কৰা মানুহৰ সংখ্যা আৰু বৃদ্ধি পাব।
এইবাৰ বাজেটত কৃষক, শিক্ষা, স্বাস্থ্য, ক্ষুদ্ৰ ব্যৱসায়, ষ্টাৰ্টআপ, আৰু যুৱক-যুৱতীসকলৰ বাবে আঁচনি অন্তৰ্ভুক্ত কৰা হৈছে যাতে তেওঁলোকৰ বৃদ্ধিত সহায় কৰিব পাৰে। ইয়াৰ উপৰি মহিলা সবলীকৰণৰ বাবে বাজেটখনত পদক্ষেপ গ্ৰহণ কৰা হৈছে বুলিও তেওঁ কয়।
ৰাষ্ট্ৰীয় ষ্টক এক্সচেঞ্জৰ মুৰব্বী আশীষকুমাৰ চৌহানৰ মতে, যেতিয়া মানুহে অধিক উপাৰ্জন, খৰচ, আৰু বিনিয়োগ কৰে, তেতিয়া ই বিকাশৰ এক চক্ৰৰ সৃষ্টি কৰে, ব্যৱসায় সম্প্ৰসাৰণ হয়, চাকৰি বৃদ্ধি পায়, আৰু অৰ্থনীতি শক্তিশালী হয়।
চৌহানৰ মতে এই বাজেটত ভাৰতৰ আটাইতকৈ ডাঙৰ শক্তি অৰ্থাৎ ইয়াৰ জনসাধাৰণক অগ্ৰাধিকাৰ দিয়া হৈছে।
