নাজিৰাৰ ঐতিহাসিক কাৰেংঘৰকে ধৰি ৰাজ্যৰ বিভিন্ন প্ৰান্তত আজি টাই আহোম সকলৰ পবিত্ৰ পৰম্পৰাগত উৎসৱ ‘মে-ডাম-মে-ফি’ উলহ-মালহেৰে উদযাপন কৰা হয়।
আহোম ধৰ্মীয় পৰম্পৰা অনুসৰি আয়োজিত এই উৎসৱত টাই আহোম সম্প্ৰদায়ৰ লোকসকলে নিজৰ উপৰিপুৰুষ তথা পূৰ্বপুৰুষসকলক শ্ৰদ্ধাৰে স্মৰণ কৰাৰ লগতে বিশ্ব শান্তিৰ বাবে প্ৰাৰ্থনা জনায়।
জনবিশ্বাস অনুসৰি, স্বৰ্গদেউ চাওলুং চুকাফাই অসমলৈ লৈ অহা এই মহান পৰম্পৰাৰ জৰিয়তে উপৰিপুৰুষৰ সৈতে এক আধ্যাত্মিক যোগসূত্ৰ স্থাপন কৰি সমাজ তথা দেশৰ মংগলৰ বাবে আশীৰ্বাদ বিচৰা হয়। প্ৰতিবছৰে ৩১ জানুৱাৰী তাৰিখে পালন কৰা এই উৎসৱত সমূহীয়াভাৱে এখন আঠচুকীয়া অস্থায়ী দেওশাল নিৰ্মাণ কৰি তাত আঠখন ‘মেহেঙা’ পাতি আদি পিতা লেংডন প্ৰমুখ্যে আঠগৰাকী ‘ফী’ক উপাসনা কৰা হয় আৰু পৰৱৰ্তী সময়ত সকলোৱে মিলি ভোজত অংশগ্ৰহণ কৰে।
আহোম স্বৰ্গদেউসকলৰ গৌৰৱোজ্জ্বল ৬০০ বছৰীয়া ইতিহাসৰ সাক্ষী ঐতিহাসিক গড়গাঁও কাৰেংঘৰৰ প্ৰাংগণতো আজি বিশেষ গাম্ভীৰ্যপূৰ্ণ পৰিৱেশত মে-ডাম-মে-ফি উদযাপন কৰা হয়।
নাজিৰাৰ এই ঐতিহাসিক স্থানত আহোম সম্প্ৰদায়ৰ অগণন লোকে একত্ৰিত হৈ পৰম্পৰাগত নীতি-নিয়মেৰে পূজা আগবঢ়াই উপৰিপুৰুষৰ আশীৰ্বাদ গ্ৰহণ কৰে। কেৱল কাৰেংঘৰেই নহয়, নাজিৰাৰ অন্য বিভিন্ন প্ৰান্ততো টাই আহোম ধৰ্মীয় ৰীতিৰে এই পবিত্ৰ উৎসৱ পালন কৰা পৰিলক্ষিত হয়।
