ৰাইজৰ দলৰ মুখ্য কাৰ্যালয়ৰ পৰা আজি এক সংবাদ মেল সম্বোধন কৰি সাধাৰণ সম্পাদক ৰাছেল হুছেইন, চিন্ময় বড়া আৰু সম্পাদক দেবাংগ সৌৰভ গগৈয়ে এক সংবাদ মেল সম্বোধন কৰি গৰুখুঁটি প্রকল্প আৰু চৰকাৰী ৰাজ সাহায্যৰ নামত অসমত মন্ত্রী-বিধায়কৰ পৰিয়ালৰ এক বিশাল চিণ্ডিকেট চলিছে বুলি আক্ষেপ প্রকাশ কৰে। অসম দুগ্ধ উন্নয়ন বিভাগে যোৱা ৩১মে’ তাৰিখে ৰাজ সাহায্যৰ ১৫ জনীয়া তালিকাত মন্ত্রী জয়ন্ত মল্ল বৰুৱাৰ পত্নী জুলী ডেকা বৰুৱা, প্রাক্তন মন্ত্রী তথা বিধায়ক সিদ্ধার্থ ভট্টাচাৰ্যৰ পত্নী মনালিছা ভট্টাচার্য আৰু কেইবাজনো বিজেপি নেতাৰ নাম ৰাজহুৱা হোৱাৰ পিছত সংবাদ মাধ্যমত এই বাতৰি প্ৰকাশ পোৱাত কেইবাটাও সংবাদ গোষ্ঠীৰ মালিক তথা সাংবাদিক মন্ত্রী জয়ন্ত মল্ল বৰুৱাৰ আক্ৰমণৰ লক্ষ্য হৈ পৰিছে। মন্ত্ৰী গৰাকীয়ে আক্ৰমণ কৰিবলৈ গৈ সম্পূর্ণ অশালীনভাবে ব্যক্তিগত আক্ৰমণ কৰাৰ লগতে হেমকোষৰ কাণ্ডাৰী হেমচন্দ্ৰ বৰুৱাৰ দৰে স্বনামধন্য ব্যক্তিৰ পৰিয়ালকো আক্ৰমণৰ লক্ষ্য কৰি লয়। সাধাৰণ সম্পাদক হুছেইনে অসমৰ ৰাজনৈতিক ক্ষেত্ৰখনত এনেধৰণৰ আক্রোশমূলক আৰু প্রতিশোধ পৰায়ণ ৰাজনীতিৰ পৰম্পৰাক বিজেপি শাসিত চৰকাৰখনে উৎসাহিত কৰা কাৰ্যক তীব্ৰ গৰিহণা জনায়। এই ক্ষেত্রত স্বয়ং মুখ্যমন্ত্ৰী গৰাকীয়েও যোৱা সময়চোৱাত বিভিন্নধৰণে এনেধৰণৰ আক্রোশমূলক আৰু প্ৰতিশোধ পৰায়ণ বক্তব্য ৰাখি শাসকীয় দলটোৰ নেতা-পালিনেতাক প্রত্যক্ষ আৰু পৰক্ষোভাৱে উৎসাহ জনাই আহিছে। তেওঁ কয়, গৰুখুঁটি প্ৰকল্পৰ বাবে গুজৰাটৰ পৰা আমদানি কৰা ৩০০ গীৰ গাই আনি মন্ত্রী-বিধায়ক সকলে প্রায় ৯০টা গৰু ভগাই লোৱা ঘটনা ৰাজহুৱা হোৱাৰ পিছত গৰুখুটি প্ৰকল্পৰ দায়িত্বত থকা বিধায়ক পদ্ম হাজৰিকা, মুখ্যমন্ত্ৰী হিমন্ত বিশ্ব শৰ্মা আৰু মন্ত্রী জয়ন্ত মল্ল বৰুৱাই সংবাদ মাধ্যমত দিয়া পৰস্পৰ বিৰোধী বক্তব্য আমাৰ দৃষ্টিগোচৰ হৈছে।
অসম দুগ্ধ উন্নয়ণ বিভাগে প্রকাশ কৰা ১৫ জনীয়া ৰাজ সাহায্য প্রাপ্ত তালিকাক লৈ হোৱা বিতৰ্কৰ পিছত কেইটামান মৌলিক প্রশ্ন উন্মোচিত হৈছে। এই ৰাজ সাহায্যৰ গোটেই প্রক্রিয়াটো আৰম্ভ হৈছিল ২০২২ চনত। সেই সময়ত উক্ত বিভাগটোৰ সঞ্চালক আছিল উৎপল শর্মা। পৰৱৰ্তী সময়ত কৰুণা শৰ্মা, জাভিৰ ৰাহুল চুৰেশৰ পিছত পাঞ্চালী কাকতি সঞ্চালিকা হৈ থকা সময়ত যোৱা ৩১ মে’ তাৰিখে ১৮জন আৱেদনকাৰীৰ পৰা ১৫ জনকহে ৰাজসাহায্যৰ বাবে নিৰ্বাচিত কৰা তালিকাখন প্রকাশ পায়। আশ্চর্যজনকভারে বাচনি সমিতিয়ে নির্বাচিত কৰা তালিকাৰ লগত এই চূড়ান্ত তালিকাখনৰ মিল নাই। তাৎপর্যপূর্ণ কথাটো হ’ল কাৰ হেঁচাত আৰু কি কথা লুকুৱাবলৈ এই তালিকাখন প্ৰকাশ কৰাৰ সময়তে পাঞ্চালী কাকতি আৰু বিষয়া নৱামী ডেকা দীঘলীয়া ছুটীত যাব লগা হ’ল।
