ভাৰতীয় মূলৰ ব্ৰিটিছ ব্যৱসায়ী সুখজিৎ সিঙৰ প্ৰিয় খাদ্য আছিল বিৰিয়ানী। পত্নী ৰমনদীপ কৌৰ মানে যেতিয়া তেওঁলৈ বিৰিয়ানীৰ প্লেট এখন আগবঢ়াই দিছিল, নিসন্দেহে প্ৰিয় খাদ্য তৃপ্তিৰে ভক্ষণ কৰিছিল সুখজিৎ সিঙে।
কিন্তু, সেই বিৰিয়ানীত মিহলি হৈ আছিল টোপনিৰ বড়ি। বিৰিয়ানি খাই নিদ্ৰাত ঢলি পৰিল সুখজিৎ। টোপনিত ঢলি পৰা সুখজিতক পত্নী ৰমনদীপ আৰু শৈশৱৰ বন্ধু গুৰপ্ৰীত সিঙে মুখত আঁঠুৱা ভৰাই মূৰত হাতুৰীৰে মৰিয়াই মৰিয়াই হত্যা কৰে।
হত্যাকাণ্ডৰ আঁৰত আছিল দুটা উদ্দেশ্য – এক, ৰমনদীপ আৰু গুৰপ্ৰীতৰ মাজত আছিল প্ৰেমৰ সম্পৰ্ক। দুই, সুখজিতৰ বিপুল পৰিমাণৰ সম্পত্তি।
২০১৬ চনৰ ২ ছেপ্টেম্বৰত দিল্লীৰ সুখজিতৰ মাতৃৰ ঘৰত সংঘটিত হৈছিল এই ঘটনা।
শেহতীয়াকৈ আদালতে স্বামীক হত্যাৰ অপৰাধত মৃত্যুদণ্ডৰ শাস্তি প্ৰদান কৰে ৰমনদীপক। আনহাতে গুৰপ্ৰীতকো দিছে যাৱজ্জীৱন কাৰাদণ্ড।
এই গোচৰৰ আটাইতকৈ চাঞ্চল্যকৰ দিশটো হ’ল ৰমনদীপ আৰু সুখজিতৰ ডাঙৰ পুত্ৰ অৰ্জুনে পিতৃক হত্যা কৰাৰ অভিযোগত মাতৃৰ বিৰুদ্ধে সাক্ষ্য দিছিল।
আৰক্ষীৰ মতে, ৰমনদীপে ঘৰতে বনোৱা বিৰিয়ানী মছলাৰ সৈতে টোপনিৰ বড়ি মিহলাই লৈছিল। সেই বিৰিয়ানীখন সুখজিত আৰু তেওঁলোকৰ সৰু পুত্ৰ আৰ্য্যই খাইছিল। কিন্তু ডাঙৰ পুত্ৰ অৰ্জুনে সেই বিৰিয়ানী খোৱা নাছিল।
ৰাতি হঠাতে দেউতাকৰ শব্দত তেওঁক সাৰ পাই উঠিছিল অৰ্জুন। তেওঁ আদালতত কয় যে মাতৃ ৰমনদীপ ৰাতি পিতৃ সুখজিতৰ কাষতে শুইছিল।
ভাষ্য অনুসৰি, মাজনিশা সাই অৰ্জুনে মাকে দেউতাকৰ মুখত আঠুৱা এখন ধৰি থকা দেখিছিল। ইয়াৰ পিছত আহিছিল গুৰপ্ৰীত। মাকে দেউতাকৰ হাত দুখন ধৰিলে, গুৰপ্ৰীতে হাতুৰীৰে মূৰত খুন্দা মাৰিলে। তাৰ পাছত ৰমনদীপে দাৰে সুখজিতৰ ডিঙি ফালি পেলালে। অত্যধিক ৰক্তক্ষৰণৰ ফলত সুখজিতৰ মৃত্যু হয়।
এই ঘটনাৰ পিছতেই আৰক্ষীয়ে ৰমনদীপৰ ঘৰৰ সমীপৰ জোপোহাৰ পৰা হত্যাত ব্যৱহৃত দাখন উদ্ধাৰ কৰে। তাৰ পিছত ৰমনদীপক গ্ৰেপ্তাৰ কৰা থয়। তেওঁক সোধা-পোছা কৰাৰ পিছত গুৰপ্ৰীতৰ সৈতে তেওঁৰ সম্পৰ্কৰ কথা জানিবলৈ পালে আৰক্ষীয়ে। ডুবাইলৈ যোৱাৰ পথত গুৰপ্ৰীতক দিল্লী বিমানবন্দৰত গ্ৰেপ্তাৰ কৰা হয়।
ৰায় ঘোষণা কৰাৰ সময়ত ন্যায়াধীশগৰাকীয়ে কয় যে ৰমনদীপ এই শাস্তি পোৱাৰ যোগ্য। কাৰণ তাই নিজৰ স্বামীক হত্যা কৰিবলৈ তাই আৰু সন্তানক ড্ৰাগছ খুৱাইছিল। গুৰপ্ৰীতৰ লগত থাকিবলৈ লোৱাৰ উপৰিও জীৱন বীমাৰ বিশাল ধন আৰু লণ্ডন আৰু ভাৰতৰ সুখজিতৰ সম্পত্তিও দখল কৰিব বিচাৰিছিল। ন্যায়াধীশগৰাকীয়ে এই গোচৰটোক ‘বিৰলতকৈ বিৰল’ বুলি অভিহিত কৰে।
ব্ৰিটেইনৰ আদালতৰ এই সিদ্ধান্ত অনুসৰি সুখজিত আৰু ৰমনদীপৰ দুই পুত্ৰ এতিয়া সুখজিতৰ পৰিয়ালৰ সৈতে থাকিব।
