তিনিচুকীয়া জিলাৰ মাৰ্ঘেৰিটা মহকুমাত বিগত কিছু দিন ধৰি অব্যাহত থকা চোৰৰ উপদ্ৰৱত অতিস্থ হৈ পৰিছে স্থানীয় ৰাইজ।
চোৰে নগৰ খনৰ বিভিন্ন স্থানত থকা সৌৰ লাইট সমূহৰ বেটাৰি চুৰি কৰি নিয়াৰ ফলত নগৰখনৰ প্ৰায় ভাগ সৌৰ লাইট বিকল হৈ যোৱা পৰিলক্ষিত হৈছে।
আজি পুৱতি নিশা চোৰে মাৰ্ঘেৰিটাৰ মাকুম পথাৰস্থিত মতিলাল পেৰিয়াল কনিষ্ঠ মহাবিদ্যালয়ৰ সৌৰ লাইটৰ বৃহৎ সংখ্যক বেটাৰী আৰু অন্যান্য সামগ্ৰী চুৰি কৰি এএছ-২৩চিচি-৩১৬১ নম্বৰৰ এখন মেজিক গাড়ীত সৰবাৰহ কৰিবলৈ লওঁতেই স্থানীয় ৰাইজে হাতে লোটে ধৰা পেলায়।
স্থানীয় ৰাইজে মেজিক সহ আৰক্ষীক গতাই দিয়া ধৃত চোৰটোৰ নাম সুশান্ত নাথ ওৰফে ৰাজা(২৩)৷
সুশান্তৰ লগতে এটা বৃহৎ চোৰৰ দলে অঞ্চলটোত উপদ্ৰৱ চলাই ফুৰা বুলি স্থানীয় ৰাইজে অভিযোগ উত্থাপন কৰে।
উক্ত কনিষ্ঠ মহাবিদ্যালয়ৰ পৰিচালন সঞ্চালক দেবব্ৰত বৰদলৈয়ে জনোৱা মতে কনিষ্ঠ মহাবিদ্যালয় খনৰ সৌৰ লাইটৰ বেটাৰী বিলাক খুলি চোৰে এটা স্থানত গোটাই লৈ মহাবিদ্যালয় খনৰ ভিতৰত প্ৰৱেশৰ বাবে চেষ্টা চলাই দৰ্জা, খিৰিকি ভাঙি আছিল।
নগৰ খনৰ বিভিন্ন স্থানত নিশা হ’লেই মটৰ বাইক, চাইকেলকে আদি কৰি বিভিন্ন সামগ্ৰী প্ৰায়ে চুৰি হৈ থকাৰ বাতৰি পোৱা গৈছে।
উৰুকাৰ নিশা মাৰ্ঘেৰিটা নগৰৰ মাজমজিয়াৰ নামদাং চাহ বাগিছাৰ কৰ্মচাৰী প্ৰদীপ শৰ্মাৰ ঘৰত চোৰে বাৰাণ্ডাৰ জালনা ভাঙি বহু সংখ্যক সামগ্ৰী লৈ উধাও হোৱাৰ উপৰিও অঞ্চলটোৰ বহুলোকৰ হাঁহ-কুকুৰা নিয়মীয়াকৈ চুৰি কৰি সন্ত্ৰাসৰ সৃষ্টি কৰিছে আহিছে বুলি স্থানীয় লোকে অভিযোগ উত্থাপন কৰে।
আনহাতে, অঞ্চলটোত বৃদ্ধি পোৱা চোৰৰ উপদ্ৰৱ ৰোধ কৰিবলৈ মাৰ্ঘেৰিটা আৰক্ষীক স্থানীয় ৰাইজে দাবী জনাইছে।
আজি আটক হোৱা চোৰ সুশান্ত নাথ ওৰফে ৰাজাক লগত লৈ আৰক্ষীয়ে ডিগবৈ গোলাইস্থিত এটা স্থানত অভিযান চলায় ১০৪টা বেটাৰী উদ্ধাৰ কৰিবলৈ সক্ষম হয়। উদ্ধাৰ হোৱা বেটাৰীখিনিৰ বজাৰ মূল্য কেইবা লাখ টকা হ’ব বুলি জানিব পৰা গৈছে।