অসমত নতুন ৰাজনৈতিক দল গঠনৰ বিৰোধীতাৰে অসমপ্ৰেমী যুৱ ছাত্ৰ সমাজ নামৰ সংগঠনটোৱে বৃহস্পতিবাৰে যোৰহাট জিলাৰ টীয়কস্থিত মুখ্য কাৰ্যালয়ত এক সংবাদ মেল সম্বোধন কৰে।
সংবাদ মেলত সংগঠনটোৱে বক্তব্য ৰাখি কয় যে “কা ” বিৰোধী আন্দোলনক লৈ বিকল্প আঞ্চলিক দল গঠন এক অযুক্তিকৰ সিদ্ধান্ত।
‘কা বিৰোধী আন্দোলন কোনো দল বা সংগঠনৰ নেতৃত্বত হোৱা নাই, ই অসমৰ জনগণৰ স্বতঃস্ফুৰ্ত আন্দোলন ৷ এই আন্দোলনৰ গইনা লৈ অসমৰ একাংশ সংগঠনে বিকল্প ৰাজনৈতিক দল গঠনৰ যি কুচ-কাৱাজ কৰিছে বা নগাঁওত অসমৰ জনগণৰ সিদ্ধান্তৰ বিৰুদ্ধে গৈ গঠন কৰা “অসম গণ মঞ্চ” নামৰ আঞ্চলিক ৰাজনৈতিক দলটোৱে অসমৰ ভৱিষ্যত সুৰক্ষিত কৰিব নোৱাৰে’। এই মন্তব্য সংগঠনটোৰ।
সংগঠনটোৱে লগতে কয়, ‘৮৫ চনত অসম চুক্তি নামৰ এখন তথাকথিত সমাধানৰ স্মাৰক পত্ৰৰ যোগে ৫১ চনৰ পৰা ৭১ চনলৈ প্ৰায় ৭০ লাখ বিদেশীক স্বদেশী কৰিলে। ইয়াৰ পাছতে অসম গণ পৰিষদ দল গঠন হ’ল। নিজ দলৰ চৰকাৰ থকাৰ পাছতো বিদেশী সমস্যাৰ কোনো স্থায়ী সমাধান কৰিব নোৱাৰিলে’।
এটা সংগঠনৰ নেতৃত্বত পুনৰ এক বিকল্প ৰাজনৈতিক দলক ৰাইজে কেনেদৰে আদৰি লয় সেয়া লক্ষ্যণীয় হ’ব বুলিও সংবাদমেলত উল্লেখ কৰে।
বৰ্তমান “কা” বাতিল অসমৰ মূল দাবী, বিকল্প ৰাজনৈতিক দল গঠন নহয়, অসমীয়া জাতিৰ মৃত্যু ঘন্টা বাজিছে ৷ এই মুহুৰ্তত বিকল্প ৰাজনৈতিক দল গঠন আন্দোলনকাৰীৰ উদ্দেশ্য হ’ব নালাগে,”কা ” বাতিলহে মূল উদ্দেশ্য হিচাপে লব লাগে।
চৰকাৰৰ ষড়যন্ত্ৰৰ বলি হৈ কাৰাৰুদ্ধ হৈ থকা অখিল গগৈ, ধৈৰ্য কোঁৱৰ, বিতু সোণোৱাল, মানস কোঁৱৰৰ দৰে কা বিৰোধী নেতাসকলৰ মুক্তিৰ দাবী তোলে।
ইয়াৰ উপৰি এন আৰ চিৰ ভিত্তিবৰ্ষ ১৯৭১ হোৱাটো অসমৰ সকলো জনগণে বিচৰা নাছিল, ১৯৫১ হ’লেহে অসমৰ জনগণ ৰক্ষা পৰিব বুলি মন্তব্য কৰি কেন্দ্ৰীয় চৰকাৰে বলপূৰ্বক ভাৱে জাপি দিব বিচৰা কা কেতিয়াও অসমৰ ৰাইজে নামানে বুলি হুংকাৰ প্ৰদান কৰে।
