শিক্ষা মন্ত্ৰী সিদ্ধাৰ্থ ভট্টাচাৰ্য্যই যোৱা ১২ চেপ্টেম্বৰৰ দিনা অসম শিক্ষক কৰ্মচাৰী ঐক্য মঞ্চৰ সৈতে আলোচনাত বহি শিক্ষক কৰ্মচাৰীসকলৰ দাবীসমূহ পূৰণ কৰাৰ প্ৰতিশ্ৰুতি দিছিল যদিও সেই প্ৰতিশ্ৰুতি যেন ফুটুকাৰ ফেনত পৰিণত হ’ল।
সেয়েহে ২ অক্টোবৰৰ দিনটো বিদ্যালয়ত উদযাপন কৰিবলৈ এৰি দিচপুৰ লাষ্টগেটত প্ৰতীকি অনশন কাৰ্য্যসূচী ৰূপায়ণ কৰে শিক্ষক কৰ্মচাৰী ঐক্য মঞ্চই।
উল্লেখ্য যে উক্ত আলোচনাকালত ১০ দিনৰ ভিতৰত কাৰ্য্য বিৱৰণী দিয়াৰ প্ৰতিশ্ৰুতি দিছিল যদিও ১০ দিন পাৰ হৈ যোৱাৰ পাছতো কোনোধৰণৰ কাৰ্য্য বিৱৰণী নিদিয়াত হতাশ হৈ পৰে শিক্ষক কৰ্মচাৰীসকল।
আনহাতে, বিধানসভাৰ অধিবেশন চলি থকাৰ সময়তে শিক্ষা মন্ত্ৰী সিদ্ধাৰ্থ ভট্টাচাৰ্য্য বিদেশ ভ্ৰমণত ব্যস্ত থকাত ক্ষোভ উজাৰে শিক্ষক কৰ্মচাৰী ঐক্য মঞ্চৰ সাধাৰণ সম্পাদক আনোৱাৰ হুছেইন চৌধুৰীয়ে ।
তেওঁ কয়, “চলিত বিধান সভা অধিবেশনত ভেন্সাৰ শিক্ষানুষ্ঠান প্ৰাদেশিকীকৰণ আইন ২০১৭’ ব্যাপক সংশোধনীৰ জৰিয়তে প্ৰাদেশিকীৰণৰ মুখ দেখিবলৈ বাট চাই থকা শিক্ষক কৰ্মচাৰীক নিৰাশ কৰি শিক্ষা মন্ত্ৰী নিজে লণ্ডন ভ্ৰমণত ব্যস্ত হৈ আছে।”
তদুপৰি প্ৰাদেশিকীকৰণ আইন ২০১১’ সংশোধনী ২০১২ আৰু ২০১৩ ৰ অধীনত ৮৮৩২ খন শিক্ষানুষ্ঠানত কৰ্মৰত ৪১,৬৫৮ গৰাকী শিক্ষক কৰ্মচাৰীৰ পদ প্ৰাদেশিকীকৰণ কৰাৰ পৰৱৰ্তী সময়ত গুৱাহাটী উচ্চ ন্যায়ালয়ে উক্ত আইনখন বাতিল কৰাত সেইসকল শিক্ষক কৰ্মচাৰীক প্ৰদেশিকীকৰণ আইন ২০১৭’ ৰ অধীনলৈ আনি পদসমূহ সুৰক্ষিত কৰি দা-দৰমহা প্ৰদান কৰি আহিছে বুলি তেওঁ আমাক জানিবলৈ দিয়ে।
“উক্ত নীতি অনুসৰি একেই আইনৰ অধীনত প্ৰাদেশিকীকৰণৰ বাবে যোগ্যতা প্ৰদান কৰি ৬৬০৮ খন শিক্ষানুষ্ঠানৰ ৩৩৬৬৮ গৰাকী শিক্ষক কৰ্মচাৰীৰ ওপৰত চক্ৰান্তমূলকভাৱে প্ৰাদেশিকীকৰণ আইনৰ আসোঁৱাহ পূৰ্ণ ধাৰা- উপ ধাৰা জাপি দিয়াৰ ফলত প্ৰাপ্য মৰ্যাদাৰ পৰা শিক্ষক কৰ্মচাৰীসকল বঞ্চিত হ’ল,” আনোৱাৰ হুছেইনে এইদৰে কয়।
আনহাতে, একাংশ শিক্ষকক নিৰ্দিষ্ট বিষয়ত ছাত্ৰ ছাত্ৰীৰ সংখ্যাৰ অজুহাত দেখুৱাই প্ৰাদেশিকীকৰণৰ পৰা বঞ্চিত কৰি সুদীৰ্ঘ ২৫/৩০ বছৰে বিনা বেতনে কাম কৰা শিক্ষকসকলক শিক্ষা বিভাগে নাজল নাথল অৱস্থা কৰি আহিছে বুলি অভিযোগ কৰে শিক্ষক কৰ্মচাৰী ঐক্যমঞ্চৰ সাধাৰণ সম্পাদক আনোৱাৰ হুছেইনে।
তেওঁ লগতে কয়, “বিনা বেতনে কাম কৰাৰ ফলত একাংশ শিক্ষকে বিনা চিকিৎসাই মৃত্যুবৰণ কৰাৰ লগতে একাংশই মানসিক ভাৰসাম্য হেৰুৱাই আত্মহত্যাৰ পথ বাচি লৈছে।”