আমেৰিকাত ভয়ংকৰ পথ দুৰ্ঘটনাত ৩ গৰাকী ভাৰতীয় যুৱতীয়ে প্ৰাণ হেৰুৱাইছে। তিনিওজনেই গুজৰাটৰ বাসিন্দা। নিহত যুৱতী তিনিগৰাকী হৈছে ৰেখাবিন পেটেল, সংগীতাবিন পেটেল আৰু মনীষাবিন পেটেল।
শনিবাৰে পুৱা দক্ষিণ কেৰ’লিনাত সংঘটিত হয় এই দুৰ্ঘটনাটো। গ্ৰীণভিল কাউন্টিৰ ওচৰৰ এখন ফ্লাই অভাৰত নিয়ন্ত্ৰণ হেৰুৱাই তেওঁলোকৰ গাড়ীখন দুৰ্ঘটনাত পতিত হয়।
গ্ৰীণভিল আৰক্ষীৰ মতে, দ্ৰুতবেগী এছ ইউ ভিখনে নিয়ন্ত্ৰণ হেৰুৱাই ৰেলিঙত খুন্দা মাৰি কমেও ২০ ফুট ওপৰৰ পৰা তলৰ পথৰ এডাল গছৰ ওপৰত পৰি যায়। দুৰ্ঘটনাৰ ফলত গাড়ীখন সম্পূৰ্ণৰূপে বিধ্বস্ত হৈ পৰে।
প্ৰত্যক্ষদৰ্শীয়ে গাড়ীখন দেখি আৰক্ষীক খবৰ দিয়ে। দুৰ্ঘটনাৰ খবৰ পাই অগ্নিনিৰ্বাপক বাহিনী আৰু আৰক্ষীয়ে ক্ষীপ্ৰতাৰে সেই স্থানত উপস্থিত হয়। গাড়ীখনৰ পৰা সকলো যাত্ৰীক উদ্ধাৰ কৰি স্থানীয় চিকিৎসালয়লৈ লৈ যোৱা হয়।
লগতে পঢ়কঃ প্ৰধানমন্ত্ৰী মোডীক ‘সমালোচনা’ কৰি ৰাজৰোষত সাংবাদিক; ভাৰত এৰি যাব লগা হ’ল গুচি!
ঘটনাস্থলীতে থিতাতে মৃত্যু হয় তিনিগৰাকী যুৱতীৰ। দুৰ্ঘটনাত গাড়ীখনৰ আন এজন যাত্ৰী গুৰুতৰভাৱে আহত হয়। সংকটজনক অৱস্থাত তেওঁ চিকিৎসাধীন হৈ আছে। অঞ্চলটোৰ চিচিটিভি ফুটেজ চাই আৰক্ষীয়ে তদন্ত অব্যাহত ৰাখিছে।
