গুৱাহাটী ৰে’লৱে ষ্টেচনৰ পৰা তিনিগৰাকী অসমীয়া কিশোৰীক মানৱ সৰবৰাহকাৰী চক্ৰৰ কবলৰ পৰা উদ্ধাৰ কৰা বুলি উত্তৰ-পূৱ সীমান্ত ৰে’লৱে কতৃপক্ষই মঙলবাৰে প্ৰকাশ কৰে।
ৰে’ল আৰক্ষীৰ তাৎক্ষণিক সহাৰি দিয়া বিশেষ গোটে ১৭ মে’ত গুৱাহাটী ৰে’ল ষ্টেচনত মানৱ সৰবৰাহকাৰী কেইগৰাকীক আটক কৰিবলৈ সক্ষম হৈছিল।
এগৰাকী মহিলাকে ধৰি আটক হোৱা মানৱ দেহ সৰবৰাহকাৰী চক্ৰটোৱে ৰে’ল আৰক্ষীৰ জেৰাত তেওঁলোকে ১৫০০০ টকাৰ বিনিময়ত দিল্লীলৈ অসমৰ পৰা ছোৱালী চালান দিয়ে বুলি প্ৰকাশ কৰে।
উদ্ধাৰ হোৱা কিশোৰী কেইগৰাকী টেঙাপানি আৰু তিনিচুকীয়া জিলাৰ বাসিন্দা হোৱাৰ লগতে মানৱ সৰবৰাহকাৰী কেইগৰাকী শিৱসাগৰ আৰু তিনিচুকীয়া জিলাৰ বাসিন্দা বুলি ৰে’ল আৰক্ষীয়ে প্ৰকাশ কৰিছে।
পৰৱৰ্তী সময়ত মানৱ সৰবৰাহকাৰী কেইগৰাকীক আৰক্ষীৰ হাতত গটাই দিয়া হয়।
উত্তৰ-পূব সীমান্ত ৰে’লৱেৰ ৰে’ল আৰক্ষী বাহিনীয়ে ২০১৮ চনৰ পৰা বৰ্তমানলৈ প্ৰায় ৬৬৯ গৰাকী কিশোৰ আৰু কিশোৰীক মানৱ সৰবৰাহকাৰী চক্ৰৰ কৱলৰ পৰা উদ্ধাৰ কৰিবলৈ সক্ষম হৈছে।
আনহাতে, উদ্ধাৰ কৰা শিশু তথা কিশোৰ সকলৰ সাধাৰণতে তেওঁলোকৰ পৰিয়ালৰ হাতত অথবা এন জি অ’ৰ হাতত গতাই দিয়া হয়।
ৰে’ল আৰক্ষীৰ বিভিন্ন গোটে এনে ধৰণৰ অপৰাধমূলক ঘটনা ৰোধ কৰাৰ বাবে ৰে’ল ষ্টেচনত নিয়মীয়া তালাচী চলাই আহিছে।
উল্লেখযোগ্য যে, অসম আৰু উত্তৰ-পূৰ্বাঞ্চলত দেশৰ বিভিন্ন স্থানলৈ মানৱ সৰবৰাহকাৰী চক্ৰ অতি সক্ৰিয় হৈ থকাৰ খবৰ লাভ কৰা গৈছে।