ৰাজ্যত সোমবাৰে পুৱাই সংঘটিত হৈছে এক ভয়ংকৰ ৰে’ল দুৰ্ঘটনা। বকোৰ বামুণীগাঁও ৰে’লৱে ষ্টেচনৰ সমীপৱৰ্তী ২৪০ নং গেটৰ ওচৰত গুৱাহাটী অভিমুখী উজানিমুখ পুৰী এক্সপ্ৰেছ ৰে’লখনৰ খুন্দাত নিহত হয় তিনিগৰাকী মহিলা। প্ৰাতঃভ্ৰমণলৈ ওলাই অহাৰ সময়তে এই ঘটনা সংঘটিত হোৱা বুলি জানিব পৰা গৈছে। প্ৰত্যক্ষদৰ্শীসকলে জনোৱা মতে, সেই সময়ত এনএমজিৰ এখন মালবাহী ট্ৰেইন পাৰ হৈ যোৱাৰ লগে লগে পিছফালৰ পৰা এক্সপ্ৰেছখনে খুন্দা মাৰি নিমিষতে ছিন্ন-ভিন্ন কৰি দিয়ে মহিলাকেইগৰাকীৰ দেহ।
দুৰ্ঘটনাত নিহত মহিলাকেইগৰাকীৰ ঘৰ বকোৰ ২ নং ছাটাবাৰীত বুলি চিনাক্ত কৰা হৈছে। তেওঁলোক হৈছে উত্তৰা দাস (৫০), ৰুমী দাস (৩৫) আৰু কৰবী মালি (৩৫)। খবৰ পোৱাৰ লগে লগে বকো থানাৰ আৰক্ষীয়ে ঘটনাস্থলীত উপস্থিত হৈ তদন্ত আৰম্ভ কৰে। কামাখ্যা–যোগীঘোপা ৰে’লপথৰ এই অঞ্চলটোত যোৱা কিছু বছৰত অনুৰূপ দুৰ্ঘটনাত প্ৰায় ২০ জন লোকে প্ৰাণ হেৰুৱাইছে বুলি তথ্যত প্ৰকাশ পাইছে।স্থানীয় বাসিন্দাসকলে এনে দুৰ্ঘটনাৰ বৃদ্ধিক লৈ গভীৰ উদ্বেগ প্ৰকাশ কৰিছে আৰু কৰ্তৃপক্ষক সুৰক্ষা ব্যৱস্থাৰ পুনৰীক্ষণ কৰিবলৈ আহ্বান জনাইছে। ৰে’লৱে বিভাগে এই ঘটনাৰ তদন্ত কৰি ভৱিষ্যতে এনে অঘটন প্ৰতিৰোধৰ বাবে পদক্ষেপ লোৱাৰ বিষয়ে বিচাৰ কৰিব বুলি উল্লেখ কৰে।
