সংবিধান, উচ্চতম ন্যায়ালয়ৰ নিৰ্দেশনা, মানৱ অধিকাৰ উলংঘা কৰি অসম আৰক্ষীয়ে সোধা-পোছাৰ নামত অভিযুক্তৰ আত্মীয় তিনিগৰাকীকৈ মহিলাক উলংগ কৰি ৰাতি অমানুষিক অত্যাচাৰ চলোৱা এটা ঘটনাই চাঞ্চল্যৰ সৃষ্টি কৰিছে।
ঘটনাটো দৰং জিলাৰ। অভিযোগ মতে, দৰং জিলাৰ বুঢ়া আৰক্ষী চকীৰ ভাৰপ্ৰাপ্ত বিষয়া মহেন্দ্ৰ শৰ্মাই এটা গোচৰত অভিযুক্তক বিচাৰি নাপাই অভিযুক্তৰ তিনিগৰাকী ভগ্নীক সোধা-পোছাৰ বাবে চকীলৈ নি উলংগ কৰি ওৰে নিশা প্ৰহাৰ কৰে।
তিনিগৰাকী মহিলাৰ ভিতৰত এগৰাকী মহিলা গৰ্ভৱতী আছিল আৰু আৰক্ষীৰ প্ৰহাৰত তেওঁৰ গৰ্ভপাত হয়।
উত্তৰ ভাৰতত সঘনে হোৱা ঘটনাৰ দৰে এই জঘন্য ঘটনাত ভাৰপ্ৰাপ্ত বিষয়াগৰাকীক সহায় কৰিছিল বিনীতা বড়ো নামৰ এগৰাকী মহিলা কনিষ্টবলে।
গৰ্ভৱতী মহিলাগৰাকীৰ অনুনয়-বিনয়েও তেওঁলোকৰ নিষ্ঠুৰতাক বাধা দিব পৰা নাছিল। কাতৰ অনুৰোধ সত্ত্বেও তেওঁকো প্ৰহাৰ কৰিবলৈ এৰা নাছিল আৰক্ষী বিষয়াজনে।
সূত্ৰটোৰ মতে, ৯ ছেপ্তেম্বৰত বুঢ়া আৰক্ষী চকীত ৰুজু হৈ থকা এটা গোচৰৰ অভিযুক্তক বিচাৰি আৰক্ষীৰ এটা দল গুৱাহাটীত অভিযান চলাইছিল। কিন্তু আৰক্ষীয়ে অভিযুক্তক বিচাৰি নাপাই তেওঁৰ তিনিগৰাকী ভগ্নীক বুঢ়া আৰক্ষী চকীলৈ লৈ গৈছিল।
আৰক্ষী চকীত ভাৰপ্ৰাপ্ত বিষয়াগৰাকীয়ে তিনিও গৰাকী যুৱতীক অভিযুক্তৰ ঠিকনা বিচৰাৰ নামত পাশৱিক অত্যাচাৰৰ লগতে যৌন নিৰ্যাতনো চলোৱাৰো অভিযোগ উঠিছে। ৯ ছেপ্তেম্বৰৰ নিশা সংঘটিত সেই বৰ্বৰ আক্ৰমণৰ ঘটনাটো আজিহে পোহৰলৈ আহিছে।
উক্ত ঘটনাৰ পিছতেই ১০ ছেপ্টেম্বৰত ভুক্তভুগীৰ পৰিয়ালে আৰক্ষী বিষয়া মহেন্দ্ৰ শৰ্মাৰ বিৰুদ্ধে দৰং জিলাৰ আৰক্ষী অধীক্ষকৰ ওচৰত অভিযোগ দাখিল কৰে।
অভিযোগ দাখিলৰ ৭ দিনৰ পাছতো আজি পৰ্যন্ত ভাৰপ্ৰাপ্ত বিষয়াজনৰ বিৰুদ্ধে দৰং আৰক্ষীয়ে কিয় একো ব্যৱস্থা গ্ৰহণ কৰা নাই।