কাজিৰঙা ৰাষ্ট্ৰীয় উদ্যানৰ বুঢ়াপাহাৰ বনাঞ্চলত শুকুৰবাৰে পুৱা এটা ঢেকীয়াপতীয়া বাঘৰ মৃতদেহ উদ্ধাৰ হৈছে৷
এদিনৰ পূৰ্বে মৃত্যু হোৱা মতা ঢেকীয়াপতীয়া বাঘটোৰ মৃতদেহটো আজি পুৱা বুঢ়াপাহাৰ বনাঞ্চলৰ জনতা বনশিৱিৰ এলেকাৰ জনতা টঙীৰ নাতিদূৰতে বনকৰ্মীয়ে উদ্ধাৰ কৰে৷
দুবছৰীয়া এই মতা ঢেকীয়াপতীয়া বাঘটো পাৰস্পৰিক যুঁজত মৃত্যু হোৱা বুলি মৰণোত্তৰ পৰীক্ষাত প্ৰমাণ হয়৷
কাজিৰঙাৰ সঞ্চালক পি শিৱকুমাৰ আৰু ডি এফ অ’ ৰমেশ কুমাৰ গগৈৰ নেতৃত্বত যোৱা বন বিষয়া আৰু পশু চিকিৎসকৰ দলে ঘটনাস্থলীতে ৰাষ্ট্ৰীয় বাঘ সংৰক্ষণ প্ৰাধিকৰণৰ নীতি নিৰ্দেশনাৰে মৰণোত্তৰ পৰীক্ষা কৰে৷
দুবছৰীয়া মতা ঢেকীয়াপতীয়া বাঘৰ পোৱালিটোৰ শৰীৰৰ বিভিন্ন স্থানত অন্য বাঘে কৰা আক্ৰমণৰ চিহ্নৰ লগতে মূৰৰ হাঁড় ভাঙি দিয়া অৱস্থাত পোৱা হয়৷
কাজিৰঙাৰ পাণবাৰীত থকা বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰৰ পশু চিকিৎসক ডা৹ পানজিত বসুমতাৰীয়ে ঘটনাস্থলীতে বাঘটোৰ মৰণোত্তৰ পৰীক্ষা কৰে৷
মৰণোত্তৰ পৰীক্ষাৰ শেষত ঘটনাস্থলীতে সকলোৰে উপস্থিতিত মৃত বাঘটোৰ সৎকাৰ কৰা হয়৷
উল্লেখ্য যে চলিত বৰ্ষত কাজিৰঙাত ঢেকীয়াপতীয়া বাঘৰ মৃতদেহ উদ্ধাৰৰ এইয়া চতুৰ্থ ঘটনা৷
