ছচিয়েল মিডিয়া প্লেটফৰ্ম বুলিলে ইমানদিনে ফেইচবুক, হোৱাটছএপ, টুইটাৰ-ইনষ্টাগ্ৰামৰ কথাই মনলৈ আহিছিল। কিন্তু ফেইচবুকৰ আধিপত্য ভংগ কৰি এইবাৰ ছচিয়েল মিডিয়াত দপদপনি বাঢ়িল চীনৰ এপ টিকটকৰ।
জনপ্ৰিয়তাৰ ক্ষেত্ৰত টিকটক আৰু ফেইচবুকৰ মাজত এতিয়া টিকটকে বাজীমাৎ কৰিবলৈ সক্ষম হৈছে।
২০১৯ চনৰ ডাউনলোডৰ হিচাপত ফেইচবুকক পাছ পেলাইছে চীনৰ বাইট ডেন্সৰ অধীনত থকা টিকটকে।
মাৰ্কেট বিশ্লেষক ছেন্সৰ টাৱাৰ বেংকিং অনুসৰি নেছেজিং এপ হোৱাটছএপৰ পাছতেই স্থান লাভ কৰিছে টিকটকে।
যোৱা বছৰৰ গুগল প্লে ষ্ট’ৰ, আইফোন আৰু আই পেডৰ পৰা সমগ্ৰ বিশ্বতে সকলো মিলি ৭৪০ মিলিয়ন ডাউনলোড হৈছে এপটো।
২০১৮ৰ তুলনাত যোৱা বছৰ টিকটকৰ ডাউনলোড ১৩ শতাংশ বৃদ্ধি পাইছে। সেইদৰে ২০১৯ত ইয়াৰ আয়ো বৃদ্ধি পাইছে।
আমোদজনকভাৱে, টিকটকৰ এনে জনপ্ৰিয়তাত ভাৰতীয় য়ুজাৰৰ অৱদান লেখতল’বলগীয়া। যোৱা বছৰৰ মুঠ ডাউনলোডৰ ভিতৰত ৪৪ শতাংশই কৰিছে ভাৰতীয়ই।
উল্লেখযোগ্য যে অশ্লীল, যৌন উত্তেজক ভিডিঅ’ প’ষ্টৰ অভিযোগত এসময়ত ভাৰতত এপটো নিষিদ্ধই কৰি দিয়া হৈছিল। একে ঢাপে ৩৩ শতাংশ ডাউনলোড হ্ৰাস পাইছিল এপটোৰ।
পিচে, সকলো বদনাম দূৰ কৰি নতুন ৰূপত ওলাই আহিল টিকটিক। জানিব পৰা মতে, এতিয়া আৰু টিকটকত বিতৰ্ক সৃষ্টিকাৰী কোনো ভিডিঅ’ প’ষ্ট কৰিব পৰা নাযায়।
মাৰ্কেট বিশ্লেষকসকলৰ মতে জনপ্ৰিয়তাৰ হিচাপত প্ৰথম দহটাৰ ভিতৰত আছে ফেইচবুকৰ পাঁচটি এপ। কিন্তু ফেইচবুকক বাদ দি হোৱাটছএপৰ পাছৰ স্থানটো দখল কৰি টিকটকে সকলোকে আচৰিত কৰি তুলিছে।
