শালমইনা ছালৰ ভিতৰৰ তৰপ ডাৰ্মিচত থকা তৈল গ্ৰন্থি (ছেবাছিয়াছ গ্ৰন্থি)ৰ বেমাৰ। ই সাধাৰণতে বয়:সন্ধিৰ সময়ৰ পৰা আৰম্ভ হয় আৰু ২৫/৩০ বছৰ বয়সত নাইকিয়া হয়।
এইখিনি সময়ত তৈল গ্ৰন্থিবোৰ বৰ সক্ৰিয় হৈ থাকে। এই গ্ৰন্থিবোৰে Sebum নামৰ এবিধ তেলেতীয়া বস্তু নি:সৰণ কৰে। এই গ্ৰন্থিবোৰ গোটেই গাতে যদিও মুখমণ্ডল, বক্ষস্থল আৰু পিঠিৰ ওপৰভাগত বেছিকৈ থাকে। এই গ্ৰন্থিবোৰ নোমৰ গুৰিত থাকে আৰু ই নি:সৰণ কৰা তৈল পদাৰ্থ নোমৰ গুৰিৰ বিন্ধাইদি ছালৰ বাহিৰলৈ ওলাই আহে।
এই তৈল পদাৰ্থবোৰে নোমবোৰ নৰম আৰু নমনীয় কৰি ৰাখে লগতে ইয়াক চিকমিকিয়া কৰি ৰাখে। আনহাতে তৈল পদাৰ্থই গাৰ ছালক কিছু পৰিমাণে পানী সৰকিব নোৱাৰা কৰি ৰাখে। ই লগতে ছালখনত শুকাই যোৱা বা ফাটি যোৱাৰ পৰা ৰক্ষা কৰে, বিশেষকৈ যেতিয়া ছালখন ৰ’দ তাপ আদিৰ দ্বাৰা আক্ৰান্ত হয়।
তৈল পদাৰ্থই ছালৰ সংস্পৰ্শলৈ অহা বেক্টেৰীয়া আৰু ভেঁকুৰবোৰক নিধন কৰে। গতিকে ছালখন সহজে বেক্টেৰীয়া আৰু ভেঁকুৰজনিত ৰোগৰ দ্বাৰা আক্ৰান্ত নহয়।
তৈল গ্ৰন্থিবোৰ যদিও জন্মতে নিষ্ক্ৰিয় হৈ থাকে, বয়:সন্ধিৰ লগে লগে যৌন হৰ’মনৰ প্ৰভাৱত এইবোৰ সক্ৰিয় হৈ উঠে। এইবোৰ আকৃতিত ডাঙৰ হৈ আহে আৰু বেছিকৈ তৈল পদাৰ্থ নি:সৰণ কৰিবলৈ ধৰে। এই তৈল পদাৰ্থবোৰ ছালখন বেছিকৈ তেলেতীয়া কৰি পেলায়।
আনহাতে আমাৰ ছালত বিভিন্ন ধৰণৰ বেক্টেৰীয়া থাকে। এই বেক্টেৰীয়াবোৰে, বিশেষকৈ Propionebacterium acnes নামৰ এবিধ বেক্টেৰীয়াই লাইপেজ জাতীয় কেতবোৰ এনজাইম উৎপন্ন কৰি তৈল পদাৰ্থত থকা তেল বোৰক হজম কৰি যথেষ্ট পৰিমাণে মুক্ত স্নেহ অম্ল উৎপন্ন কৰে। এই মুক্ত স্নেহ অম্লই, তৈল পদাৰ্থৰ অন্যান্য উপাদান আৰু বেক্টেৰীয়াবোৰৰ লগ হৈ শালমইনাৰ সৃষ্টি কৰে।
আনহাতে, শালমইনা অত্যাধিক পৰিমাণে হ’ব পাৰে, যদি-
১)মুখত আৰু মূৰত তেল ঘঁহা হয় বা তেলযুক্ত প্ৰসাধন ব্যৱহাৰ কৰা হয়।
২)কিছুমান ঔষধ Corticosteroids, Bromides, Lithium, Isoniazid আদি খালে।
৩)অত্যাধিক আবেগ বা মানসিক চাপত ভুগিলে।
৪)অত্যাধিক গৰম আৰু বৰষুণৰ বতৰত ওলালে।
৫)অনবৰত শালমইনাবোৰ নখেৰে খুচৰি থাকিলে।
Also read : Tips to Relieve Frustration: আপুনিও হতাশাৰ সৈতে যুঁজিছে নেকি? ইয়াৰ সমাধানৰ উপায় জানিব বিচাৰে নে?
শালমইনা হ’লে ল’বলগীয়া যতন সমূহ জানো আহক:-
১) সঘনাই মুখ চাবোন আৰু বিশুদ্ধ পানীৰে ধুব লাগে। সদায় লক্ষ্য ৰাখিব লাগে যে যাতে মুখখন তেলেতীয়া হৈ নাথাকে। যদি তেনে হয়, লগে লগে চাবোন আৰু পানীৰে মুখ ধুব লাগে। অতি কমেও দিনত কামৰ পৰা অহাৰ পিছত, ৰাতি শোৱাৰ সময়ত আৰু ৰাতিপুৱা শুই উঠি মুখখন চাবোনেৰে ধুব লাগে।
তেল আৰু গ্লিচাৰিন থকা চাবোন ব্যৱহাৰ কৰিব নালাগে। পাৰিলে চাবোনৰ সলনি বেচন ব্যৱহাৰ কৰা ভাল। বিশুদ্ধ, জীৱাণুমুক্ত পানীহে মুখ ধোৱা বা গা ধোৱাত ব্যৱহাৰ কৰিব লাগে।
২) মুখ ধোৱাৰ পিছত সদায় পৰিষ্কাৰ টাৱেল বা তেনে ধৰণৰ কোমল কাপোৰৰ দ্বাৰা মুখ মচিব লাগে।
৩) মুখত কেতিয়াও তেল বা গ্লিচাৰিনযুক্ত প্ৰসাধন লগাব নালাগে।
৪) মূৰ আৰু চুলিবোৰ কমেও সপ্তাহত দুবাৰকৈ শ্বেম্পু নতুবা ৰিঠা আৰু বিশুদ্ধ পানীৰে ধুব লাগে।
৫) শালমইনা হ’লে মূৰত বা চুলিত তেল সানিব নালাগে।
৬) শালমইনাবোৰ হাতেৰে খুচৰি থাকিব নালাগে। কিয়নো হাতৰ আঙুলি আৰু নখবোৰ অনুজীৱৰ প্ৰধান উৎস। হাত মাজে মাজে চাবোন আৰু পৰিষ্কাৰ পানীৰ দ্বাৰা চফা কৰিব লাগে আৰু পৰিষ্কাৰ কাপোৰৰ দ্বাৰাহে মচিব লাগে।
৭) চাফ-চিকুণতাৰ প্ৰতি বিশেষ দৃষ্টি ৰাখিব লাগে। ৰাতি শোৱা বিছনা, পিন্ধা কাপোৰ, থকা কোঠালী, পঢ়া, টেবুল, কাম কৰা ঠাই আদি পৰিষ্কাৰ-পৰিচন্ন হ’ব লাগে।
Also read : Tips for charging smartphones: কেনেদৰে আপোনাৰ স্মাৰ্টফোনটো দ্ৰুততাৰে চাৰ্জ কৰিব? জানি লওক এইকেইটা উপায়
৮) খাদ্য নিৰ্ভেজাল আৰু প্ৰাকৃতিক হব লাগে। ভাতৰ লগত যথেষ্ট পৰিমাণে সতেজ সেউজীয়া শাক-পাচলি খাব লাগে। প্ৰচুৰ পানী আৰু ফল-মুল খাব লাগে। এইবোৰ খাদ্যৰ দ্বাৰা মানুহৰ শৌচ, পেচাব নিয়মীয়া আৰু খোলোচা হয়। ফলত অযথা অস্বস্তি দূৰ হয়।
৯) যিকোনো ধৰণৰ মানসিক চাপ, উৎকন্ঠা আদি এৰাই চলিব লাগে।
Also read : Migraines: মাইগ্ৰেইনৰ সমস্যাত ভূগিছে নেকি? আহকচোন তাৰ বিষয়ে জানি লওঁ কেইটামান গুৰুত্বপূৰ্ণ কথা
