অসমৰ নিৰ্বাচন আয়োগে তিৱা স্বায়ত্ত পৰিষদৰ নিৰ্বাচনৰ দিন মঙলবাৰে ঘোষণা কৰিছে।
সেই অনুসৰি আগন্তুক ডিচেম্বৰ মাহৰ ১৭ তাৰিখে পুৱা ৭.৩০ বজাৰ পৰা বিয়লি ৪.৩০ বজালৈ ভোটদান প্ৰক্ৰিয়া আৰম্ভ হ’ব।
১৯ ডিচেম্বৰত ভোট গননাৰ কাম আৰম্ভ হ’ব।
ইপিনে ২৫ নৱেম্বৰত প্ৰাৰ্থীসকলৰ মনোনয়ন পত্ৰ দাখিল কৰিব লাগিব। মনোনয়ন পত্ৰ প্ৰত্যাহাৰৰ সময় ২৮ নবেম্বৰ হ’ব বুলিও নিৰ্বাচন আয়োগে ঘোষণা কৰিছে।
ইফালে মঙলবাৰে ঘোষিত তিৱা স্বায়ত্ত পৰিষদীয় নিৰ্বাচনলৈ সাজু হৈ থকা প্ৰাৰ্থীসকলৰ মাজতো ব্যাপক তৎপৰতা আৰম্ভ হোৱা পৰিলক্ষিত হৈছে।
যোৱা কেইমাহ মানৰ আগে বৰ্তমানৰ পৰিষদখনৰ কাৰ্যকাল শেষ হৈছিল।
উল্লেখ্য যে ৩৬ টা সমষ্টিৰে পৰিবেষ্টিত পৰিষদখন গঠিত।
মন কৰিবলগীয়া যে বিগত সময়বোৰত তিৱা পৰিষদৰ আভ্যন্তৰীণ বিত্তীয় কেলেংকাৰিয়ে পৰিষদখনক উন্নয়নৰ দিশত ব্যাপক প্ৰভাৱ বিস্তাৰ কৰিছিল।
পৰিষদত সংঘটিত সীমাহীন দুৰ্নীতি, কেলেংকাৰীৰ ন্যায় বিছাৰি লগতে পৰিষদত নতুনকৈ আৰু মহানগৰৰ সমীপৰ পাঁচখনকৈ গাঁও পৰিষদত অন্তৰ্ভুক্তিৰ বাবে সদৌ তিৱা ছাত্ৰ সন্থাৰ লগতে কেইবাটাও জনগোষ্ঠীয় দল,সংগঠনে চৰকাৰক সকীয়নি দি আহিছিল।
এতিয়া বিজেপি মিত্ৰজোঁট চৰকাৰখনে এই দিশত ভূমিপুত্ৰ তিৱা জনগোষ্ঠীয় ৰাইজৰ সামগ্ৰীক বিকাশৰ অৰ্থে গঠন কৰা পৰিষদৰ নিৰ্বাচনত কি ভূমিকা গ্ৰহণ কৰে সেয়া হ’ব লক্ষণীয়।
