বহু প্ৰত্যাশিত তিৱা স্বায়ত্ত শাসিত পৰিষদীয় নিৰ্বাচন আজি পুৱা৭:৩০ বজাৰ পৰা বিয়লি ৪:৩০ বজালৈ অনুষ্ঠিত হয়।
শান্তিপূৰ্ণভাৱে অনুষ্ঠিত হোৱা তিৱা স্বায়ত্ত পৰিষদৰ ৩৬টা সমষ্টিৰে পৰিবেষ্টিত ১০নং তেতেলীয়া সমষ্টিটো ১১টা ভোটগ্ৰহণ কেন্দ্ৰত ভোটাৰসকলে ক’ভিড প্ৰট’কল মানি স্বতস্ফূটভাৱে ভোটাধিকাৰ সাৱ্যস্ত কৰে।
উলোেখ্য যে তিনিকোণীয়া তুমুল প্ৰতিদ্বন্দ্বিতাৰে সমষ্টিটোৰ পৰা শাসকীয় দলৰ খগেন চন্দ্ৰ বৰদলৈ,কংগ্ৰেছৰ পৰা মতিৰাম দেউৰী আৰু তিৱা জাতীয় ঐক্যমঞ্চৰ ধৰ্মসিং বৰদলৈয়ে প্ৰতিদ্বন্দ্বিতা আগবঢ়াইছে।
ইপিনে সমষ্টিটোত ভোটদানৰ হাৰ আছিল ৭৩,০৪ ।সেই অনুসৰি প্ৰতিজন প্ৰক্ষেপিত প্ৰাৰ্থীৰ লগতে সমৰ্থকসকলৰ দাবী জয় আমাৰে ।
আমিয়ে গঠন কৰিম তিৱা পৰিষদ।এনে ক্ষেত্ৰত কোনগৰাকী প্ৰাৰ্থীয়ে শেষ হাঁহি মাৰে সেয়াহে লক্ষণীয় হ’ব।
কিয়নো বিগত সময়ত তিৱা স্বায়ত্ত পৰিষদখনত সীমাহীন দুৰ্নীতি,কেলেংকাৰীয়ে স্থবিৰ কৰি তুলিছিল পৰিষদৰ সদস্যসকলে।
তেনে পৰিপ্ৰেক্ষিতত পুনৰ একেখন মুখৰ প্ৰাৰ্থীয়ে শাসন আৰু ক্ষমতা লাভৰ লিপ্সাত অৱতীৰ্ণ হোৱা পৰিষদীয় নিৰ্বাচনত ভোটাৰ ৰাইজে কেনেদৰে উক্ত নেতাসকলক আদৰি লয় সেয়াহে গুৰুত্বপূৰ্ণ বিষয় বুলি ৰাজনৈতিক বিশ্লেষক মহলৰ মাজত চৰ্চা লাভ কৰিছে।
ইফালে,বিটিআৰ নিৰ্বাচনৰ ফলাফলত গভীৰ আত্মবিশ্বাসী হৈ থকা গেৰুৱা বাহিনীক সাধাৰণ ভোটাৰে কেনেদৰে আকোঁৱালি লয় সেয়া ১৯ডিচেম্বৰত নিৰ্বাচনী ফলাফলেহে নিৰ্ণয় কৰিব।
আনহাতে,তিৱা স্বায়ত্ত শাসিত পৰিষদৰ নিৰ্বাচনী ফলাফল আগন্তুক বিধানসভা নিৰ্বাচনৰ বাবে শাসক,বিৰোধীৰ বাবে হৈ পৰিছে ছেমিফাইনেল সদৃশ।