আগন্তুক বিটিচি নিৰ্বাচনক লৈ অন্যান্য ৰাজনৈতিক দলৰ লগতে য়ু পি পি এল দলেও সাংগঠনিক কাম-কাজ অধিক তীব্ৰতৰ কৰি তুলিছে।
বাক্সা জিলাৰ তামুলপুৰ বিধানসভা সমষ্টিৰ অধীনৰ ২৭ নং নাগ্ৰীজুলি বিটিচি পৰিষদীয় সমষ্টিৰ নাগ্ৰীজুলিৰ কোম্পানীবাৰী চ’কৰ দুর্গা মন্দিৰ প্ৰাংগণত আজি তামুলপুৰ জিলা য়ু পি পি এলৰ উদ্যোগত এখন দলৰ সাংগঠনিক সভা অনুষ্ঠিত হয়।
এই সভাত বিভিন্ন দল-সংগঠনৰ অৰ্ধ শতাধিক পুৰুষ- মহিলাই দলটোৰ নীতি আৰু আদৰ্শৰ প্ৰতি আকৰ্ষিত হৈ আনুষ্ঠানিক ভাৱে য়ু পি পি এল দলত যোগদান কৰে।
য়ু পি পি এলৰ তামুলপুৰ জিলা সমিতিৰ সভাপতি বিপুল বড়োৰ সভাপতিত্বত অনুষ্ঠিত সভাত য়ু পি পি এলৰ কেন্দ্ৰীয় সমিতিৰ সাধাৰণ সম্পাদক সুশীল দাস, উপ-সভাপতি হজৰত আলী, য়ু পি পি এলৰ কেন্দ্ৰীয় সমিতিৰ সদস্য দিলীপ বৰ্মণ আদিয়ে ভাষণ ৰাখে।
য়ু পি পি এল দলৰ নাগ্ৰীজুলি ব্লক সমিতিৰ যুৱ শাখাৰ সভাপতি ৰেৱেন বড়োই আঁঁত ধৰা আৰু গণেশ নাথে সহযোগ কৰা সাংগঠনিক সভাখনত দুই শতাধিক পুৰুষ-মহিলাই অংশগ্ৰহণ কৰে।
আজিৰ সাংগঠনিক সভাতেই ৰেবেন বড়োক সভাপতি, খুশী মোহন মণ্ডলক কাৰ্যকৰী সভাপতি আৰু মংগল নাৰ্জাৰীক সম্পাদক হিচাপে লৈ য়ু পি পি এলৰ নতুন নাগ্ৰীজুলি ব্লক সমিতিখন গঠন কৰা হয়।
আনহাতে আজিৰ সভাতেই শান্তি সিনহাক সভানেত্ৰী আৰু ৰাখী ভৌমিকক সম্পাদিকা হিচাপে লৈ য়ু পি পি এলৰ নাগ্ৰীজুলি ব্লক মহিলা সমিতিখনো গঠন কৰা হয়।