নতুন বৰ্ষ তথা ভোগালী বিহুৰ সময়তে কলিয়াবৰৰ পৰ্যটন ক্ষেত্ৰলৈ আশাৰ সঞ্চাৰ কঢ়িয়াই আনিছে পৰ্যটকে।
জানুৱাৰীৰ দ্বিতীয় সপ্তাহতো পৰ্যটকে ভিৰ কৰিছেহি ঐতিহ্যমণ্ডিত কলিয়াবৰত।
ইতিহাস প্ৰসিদ্ধ কলিয়াবৰে পৰ্যটন ক্ষেত্ৰ হিচাবে বৰ্তমান সময়ত এক সুকীয়া পৰিচয় লাভ কৰিছে।
কলিয়াবৰ মহকুমাৰ মহকুমাধিপতি তথা নগাঁও জিলাৰ অতিৰিক্ত উপায়ুক্ত বিতুপন নেওগৰ নেৰানেপেৰা প্ৰচেষ্টাত কলিয়াবৰ পৰ্যটন ক্ষেত্ৰ হিচাবে গঢ় লৈ উঠিছে।
শিলঘাটত মহাবাহু ব্ৰহ্মপুত্ৰৰ শিহুৰ জলকেলি¸ হাতীমূৰা, জয়সাগৰ দলনি, ত্ৰিশূলধাৰি, নতুন ডংগাৰ চৌৰান এহেম, দ্বিতীয় শক্তিপীঠ কামাখ্যা মন্দিৰ, নীলাপানী, হদহদী জলপ্ৰপাত, ভোমোৰাগুৰিৰ নদী পৰ্যটন, লাওখোৱাৰ বুঢ়াচাপৰি আদি পৰ্যটনস্থলী চাবলৈ এতিয়া ৰাজ্যৰ ভিন্ন প্ৰান্তৰ পৰ্যটকে ভিৰ কৰিছেহি।
উজনি অসম¸ গুৱাহাটী¸নগাঁও, যোৰহাট , লখিমপুৰ আদি ভিন্ন জিলাৰ পৰ্যটকে এতিয়া কলিয়াবৰৰ সৌন্দৰ্য তথা পৰ্যটন ক্ষেত্ৰসমূহ চাবলৈ অহাতো অঞ্চলটোৰ বাবে এক ইতিবাচক খবৰ হিচাপে বিবেচিত হৈছে।
তাৎপৰ্যপূৰ্ণভাৱে, কলিয়াবৰে পৰ্যটন ক্ষেত্ৰ হিচাবে নতুন পৰিচয় লাভ কৰাৰ পিছতেই বহু নিবনুৱা যুৱক-যুৱতীয়ে পৰ্যটন ক্ষেত্ৰত কাম কৰাৰ সুযোগ লাভ কৰিছে।
পহিলা জানুৱাৰী আৰু নৱ বৰ্ষৰ দ্বিতীয় সপ্তাহতো কলিয়াবৰলৈ পৰ্যটকৰ আগমনে কলিয়াবৰ পৰ্যটন ক্ষেত্ৰলৈ এক আশাৰ সঞ্চাৰ কঢ়িয়াই আনিছে।
