ট্ৰেফিক আইন ভংগ কৰাটো ইমান যে অভাৱনীয় হ’ব পাৰে সেয়া চাগৈ কোনোৱে ভৱা নাছিল।
গুৰুগ্ৰামৰ ট্ৰেফিক আৰক্ষীয়ে এজন ট্ৰাক চালকৰ পৰা ৫৯,০০০ টকাৰ চালান কাটিছে। ট্ৰেফিক আইনৰ উলংঘনৰ বাবে বিহা হৈছে এই জৰিমনা।
ট্ৰাক চালকজনে মুঠতে ১০টা নিয়ম উলংঘন কৰিছিল। ইয়াৰ ভিতৰত লাইচেন্স অবিহনে গাড়ী চলোৱা, গাড়ীৰ পঞ্জীয়ন নকৰা, ট্ৰেফিক চিগনেল ভংগ কৰা, থাৰ্ড পাৰ্টি ইন্স্যুৰেন্স নোহোৱা, বিপদজনক গাড়ী চালনাও আছে।
অৱশ্যে, এয়াই অকল এনেকুৱা একমাত্ৰ উদাহৰণ নহয়, ট্ৰেফিক নিয়ম বলবৎ হোৱাৰ পাছত নিয়ম ভংগ কৰাৰ বাবে গুৰুগ্ৰাম আৰক্ষীয়ে বহু জৰিমনা সংগ্ৰহ কৰিছে।
যোৱা ২ ছেপ্টেম্বৰত এজন দুচকীয়া বাহন চালকৰ ২৩,০০০টকাৰ চালান কটাৰ উপৰি আন এজনৰ ২৪,০০০ টকাৰ চালান কাটিছিল।
গুৰুগ্ৰাম আৰক্ষীয়ে এজন অটোচালকৰ ৩২৫০০ টকাৰ চালান কাটিছিল।
যান-বাহন সংশোধন আইন ২০১৯’ৰ অধীনত কঠোৰ তথা অতিৰিক্ত জৰিমনা ভৰিবলগীয়া ট্ৰেফিক নিয়মসমূহ ১ ছেপ্টেম্বৰৰ পৰা প্ৰযোজ্য হৈছে।
এতিয়ালৈকে নতুন নিয়মৰ অধীনত যিমান চালান কটা হৈছে, ইয়াৰ ভিতৰত চালকৰ হাতত জৰুৰী নথি নথকাৰ বাবেই সৰ্বাধিক কটা হৈছে।
উল্লেখযোগ্য যে যদি কাৰোবাৰ লগত নথিৰ কপি নাথাকে, তেতিয়াহ’লে তেওঁ ডিজিল’কাৰ বা এম পৰিবহন এপ’ত ষ্ট’ৰ হৈ থকা ছফট্ কপিও দেখুৱাব পাৰে।
এই ক্ষেত্ৰত পথ পৰিবহন আৰু ঘাইপথ মন্ত্ৰালয়ে ইতিমধ্যে জাননী জাৰি কৰিছে।
চৰকাৰে নতুন ট্ৰেফিক নিয়ম বলবৎ কৰাৰ পাছত সমগ্ৰ দেশৰ বিভিন্ন প্ৰান্তত বাহনৰ চালকৰ ওপৰত ট্ৰেফিক নিয়ম পালন নকৰাৰ বাবে হাজাৰ হাজাৰ টকাৰ জৰিমনা বিহা হৈছে।
পৰিবহন নিয়ম উলংঘা কৰাৰ বাবে এজন অটো ৰিক্সাৰ মালিকক ৪৭ হাজাৰ ৫০০ টকাৰ জৰিমনা বিহা হৈছিল।
