গুৱাহাটী মহানগৰীৰ লগতে ৰাজ্যত তীব্ৰ বেগে গাড়ী চলোৱা চালক সকল সজাগ হ’বৰ হ’ল। প্ৰয়োজনতকৈ অধিক বেগত গাড়ী চলালে ট্ৰেফিক পুলিচৰ হাতত ১০০০ টকাৰ পৰা ২০০০ টকা পৰ্য্যন্ত জৰিমনা ভৰিব লগা হ’ব পাৰে।
ইতিমধ্যে কেন্দ্ৰীয় কেবিনেটে যান-বাহন (সংশোধনী) বিধেয়কত অনুমোদন জনাইছে। বৰ্তমান দেশত বলবৎ হৈ থকা যান-বাহন আইনখন সংশোধনী কৰি কেন্দ্ৰীয় কেবিনেটে যান-বাহন আইনৰ ক্ষেত্ৰত কঠোৰ হোৱাৰ কাৰ্যব্যৱস্থা হাতত লৈছে।
উল্লেখযোগ্য যে, কেন্দ্ৰীয় কেবিনেটে অনুমোদন জনোৱা যান-বাহন (সংশোধনী) বিধেয়কখনত উল্লেখ থকা অনুসৰি জৰুৰীকালীন বাহনক পথ এৰি নিদিলে অথবা চালকৰ লাইচেঞ্চ নাথাকিলে ১০,০০০ টকা পৰ্যন্ত জৰিমনা বিহা হ’ব।
তদুপৰি, প্ৰয়োজনতকৈ অধিক ভৰ কঢ়িওৱা বাহনক ২০০০০ টকা আৰু বীমা বিহিন ভাৱে আৰু হেলমেট পৰিধান নোহোৱাকৈ দুচকীয়া বাহন চলালে ১০০০ টকা পৰ্যন্ত জৰিমান ভৰিব লগা হ’ব বাহনৰ গৰাকীয়ে।
দেশত যান-বাহন আইন কঠোৰ নোহোৱা বাবে ক্ৰমে যান-বাহন আইন উলংঘা কৰা বৃদ্ধি পাবলৈ আৰম্ভ কৰিছে ফলত পথ দুৰ্ঘটনাৰ ঘটনা বৃদ্ধি পাইছে বুলি বিভিন্ন মহলে প্ৰতিক্ৰিয়া ব্যক্ত কৰিছে।
