পৰিবহণ বিভাগৰ অনুমতি নথকাৰ বাবে নিষিদ্ধ কৰা হ’ল ৰেপিড’ সেৱা!
মহানগৰবাসীৰ মাজত কম সময়ৰ ভিতৰত জনপ্ৰিয় হৈ পৰা আৰু বহুতো যুৱক-যুৱতীয়ে নিজৰ বাইকখনক উপাৰ্জনৰ মাধ্যম কৰি লোৱা ৰেপিড’ বাইক টেক্সি সেৱা আজিৰে পৰা অনিৰ্দিষ্টকাললৈ নিষিদ্ধ কৰা হয়।
মহানগৰীত চলাচলৰ বাবে অনুজ্ঞাপত্ৰ নথকাৰ বাবে কামৰূপ মহানগৰ জিলা পৰিবহন বিভাগে আজি এই ৰেপিড’ বাইক টেক্সী সেৱা নিষিদ্ধ কৰাৰ লগতে কাৰ্য্যালয় চীল কৰি দিয়ে।
নৰ্থ ইষ্ট নাওৰ সৈতে হোৱা টেলিফোনিক বাৰ্তালাপত এই কথা জানিবলৈ দিয়ে কামৰূপ মহানগৰ জিলা পৰিবহন বিষয়া বাপন কলিতাই।
“আজিৰে পৰা মহানগৰীত ৰেপিড’ বাইক-টেক্সি সেৱা নিষিদ্ধ কৰা হৈছে। তেওঁলোকৰ পৰিবহণ বিভাগৰ পৰা কোনোধৰণৰ অনুমতি নাছিল। তেওঁলোকে অনুমতিৰ বাবে ইতিমধ্যে আবেদন জনাইছে, যদি অনুমতি লাভ কৰে তেন্তে চলাব পাৰিব। কোনোধৰণৰ অনুমতি নথকা স্বত্তেও তেওঁলোকৰ ব্যৱসায় চলি আছে। গতিকে আজি আমাৰ নিৰ্দেশত জিলা পৰিবহন বিষয়া কেইগৰাকীমান গৈ ৰেপিড’ৰ কাৰ্য্যালয় চিল কৰেগৈ।” জিলা পৰিবহন বিষয়াগৰাকীয়ে আমাৰ সাংবাদিকৰ আগত কয়।
তেওঁলোকৰ অনুমতি ল’বৰ বাবে পূৰ্বতে নিৰ্দেশনা দিয়া হৈছিল বুলি কলিতাই আমাক জানিবলৈ দি লগতে কয় “কিন্তু কোনোধৰণৰ অনুমতি নোলোৱাৰ বাবে আজিৰে পৰা চাৰ্ভিছটো অনিৰ্দিষ্টকাললৈ বন্ধ কৰি দিয়া হৈছে।”
এই সন্দৰ্ভত ৰেপিড’ সেৱাৰ সৈতে জৰিত এক উচ্চস্তৰীয় সূত্ৰই আমাৰ আগত কয় “দুচকীয়া বাহনৰ ক্ষেত্ৰত এনেধৰণৰ অনুমতি ল’বলগীয়া কোনো নিয়ম নাই। প্ৰথমতে চৰকাৰৰ হাতত এনেধৰণৰ আইন থাকিব লাগিব।”
তাৎপৰ্য্যপূৰ্ণভাৱে যোৱাবৰ্ষৰ আগষ্ট মাহতে ৰেপিড’ কতৃপক্ষই অনুমতি পত্ৰ বিচাৰি পৰিবহণ বিভাগৰ ওচৰত আবেদন দাখিল কৰা বুলি দাবী কৰাৰ লগতে পৰিবহণ বিভাগে কোনোধৰণৰ গুৰুত্ব দিয়া নাই বুলি সূত্ৰটোৱে কয়।