এখন ট্ৰাকৰ চালক আৰু মালিকক বৃহস্পতিবাৰে মুঠ ২ লাখ টকাৰ জৰিমনা বিহিছে দিল্লীৰ পৰিবহন বিভাগৰ বিষয়াই।
অতিৰিক্ত বোজা কঢ়িওৱা আৰু সঠিক অনুজ্ঞাপত্ৰ অবিহনে গাড়ী চলোৱাকে ধৰি যান-বাহন আইনৰ অধীনত কেইবাটাও নিয়ম উলংঘা কৰাৰ অপৰাধত এই জৰিমনা বিহা হৈছে।
বৰ্তমানলৈকে পোৱা বাতৰি অনুসৰি এইটোৱে উক্ত আইনৰ অধীনত দেশত বৰ্তমানলৈকে বিহা সৰ্বাধিক জৰিমনা।
সংবাদ প্ৰতিষ্ঠানৰ বাতৰি অনুসৰি হাৰিয়ানাৰ পঞ্জীয়ন নম্বৰ থকা ট্ৰাকখনক পৰিবহন বিভাগৰ পৰিদৰ্শকৰ দলে বুধবাৰে সন্ধিয়া চালান কাটি দিয়ে।
যোৱা ১ ছেপ্টেম্বৰত যান-বাহন আইন (মটৰ ভেহিকল এক্ট) সংশোধনৰ পাছত দিল্লীত নিয়ম উলংঘা কৰাৰ বাবে এয়াই সৰ্বাধিক জৰিমনা।
ইয়াৰ পূৰ্বে ৰাজস্থানৰ পৰা অহা এখন ট্ৰাকৰ অতিৰিক্ত বোজা কঢ়িওৱা আৰু আন অপৰাধত ১.৪১ লাখ টকাৰ চালান কটা হৈছিল।
পৰিবহন পৰিদৰ্শকৰ দলটোৱে বিভিন্ন নিয়ম উলংঘাৰ বাবে ট্ৰাকখনৰ মুঠতে ২,০০,৫০০ টকাৰ চালান কাটে।
ইয়াৰ ভিতৰত চালকৰ অনুজ্ঞাপত্ৰ নোহোৱা, প্ৰদূষণ পৰীক্ষা প্ৰমান পত্ৰ নোহোৱা, পঞ্জীয়ন প্ৰমান পত্ৰ নথকা, ফিটনেছ টেষ্ট, ইঞ্চ্যুৰেন্স, পাৰ্মিট ভংগ তথা ছীট বেল্ট পৰিধান নকৰা আদি নিয়ম ভংগৰ অপৰাধ সন্নিৱিষ্ট আছে।
ট্ৰাকখনক অতিৰিক্ত বোজা কঢ়িওৱাৰ বাবে ২০,০০০ টকাৰ লগতে অনুমতিৰ ওপৰত ১৮ টনকৈ অধিক বোজাৰ বাবে আন অতিৰিক্ত ৩৬,০০০ টকাৰ জৰিমনা বিহে।
এই মুঠ জৰিমনাৰ ভিতৰত আছে যান-বাহনৰ নিয়ম ভংগ কৰাৰ বাবে ১,৩১,০০০ টাকে ধৰি ট্ৰাকৰ গৰাকীৰ ৬৯,৫০০ টকাৰ জৰিমনা।
বৃহস্পতিবাৰে দিল্লীৰ এখন আদালতত জৰিমনাখিন আদায় দিয়া বুলি জানিব পৰা গৈছে।
