ভাৰত আৰু আমেৰিকাৰ বাণিজ্যিক সম্পৰ্কলৈ নামি আহিছে এক অভূতপূৰ্ব সংকট। ৰাছিয়াৰ পৰা তেল ক্ৰয় কৰাৰ বাবে ভাৰতক বৃহৎ আৰ্থিক জৰিমনা বা ‘শাস্তি’ দিয়াৰ লক্ষ্যৰে আমেৰিকা যুক্তৰাষ্ট্ৰই এক কঠোৰ বিধেয়ক প্ৰস্তুত কৰিছে। ৰাষ্ট্ৰপতি ড’নাল্ড ট্ৰাম্পে ইতিমধ্যে এই প্ৰস্তাৱিত বিধেয়কখনত অনুমোদন জনোৱাৰ পাছতে কূটনৈতিক মহলত তীব্ৰ চাঞ্চল্যৰ সৃষ্টি হৈছে।
‘গ্ৰেহাম-ব্লুমেন্থাল নিষেধাজ্ঞা বিধেয়ক’ (Graham-Blumenthal sanctions bill) নামৰ এই প্ৰস্তাৱিত আইনখন গৃহীত হ’লে, আমেৰিকাৰ ৰাষ্ট্ৰপতিয়ে ভাৰতৰ দৰে দেশৰ ওপৰত ৫০০ শতাংশ পৰ্যন্ত অতিৰিক্ত শুল্ক আৰোপ কৰাৰ বিশেষ অধিকাৰ লাভ কৰিব। আমেৰিকাৰ মতে, যিবোৰ দেশে জানি-বুজি ৰাছিয়াৰ পৰা তেল বা ইউৰেনিয়াম ক্ৰয় কৰিছে, তেওঁলোকে আচলতে ৰাষ্ট্ৰপতি ভ্লাদিমিৰ পুটিনৰ “যুদ্ধ যন্ত্ৰ”কহে পৰোক্ষভাৱে ইন্ধন যোগাইছে। এই পদক্ষেপে বিশ্বৰ দুই বৃহৎ গণতান্ত্ৰিক দেশৰ মাজত থকা বাণিজ্যিক সমীকৰণ সম্পূৰ্ণৰূপে সলাই পেলোৱাৰ সম্ভাৱনা আছে।
আমেৰিকাৰ ৰিপাব্লিকান চিনেটৰ তথা বিশিষ্ট প্ৰতিৰক্ষা বিশেষজ্ঞ লিণ্ডচে গ্ৰেহামে সদৰী কৰিছে যে ৰাষ্ট্ৰপতি ট্ৰাম্পে এই দ্বিপাক্ষিক বিধেয়কখনত ইতিমধ্যে সেউজ সংকেত দিছে। তেওঁৰ মতে, এই বিধেয়কখন ভাৰত, চীন আৰু ব্ৰাজিলকে ধৰি মস্কোৰ বাণিজ্যিক অংশীদাৰসকলক দণ্ডিত কৰিবলৈ ব্যৱহাৰ কৰিব পৰা যাব। বুধবাৰে হোৱাইট হাউচত ট্ৰাম্পক সাক্ষাৎ কৰাৰ পাছত গ্ৰেহামে কয় যে ৰাষ্ট্ৰপতিয়ে কেইবামাহ ধৰি প্ৰস্তুত কৰি থকা এই কঠোৰ বিধেয়কত পূৰ্ণ সমৰ্থন আগবঢ়াইছে।
গ্ৰেহামে এক বিবৃতিত কয়, “এয়া এক সঠিক সময়ত লোৱা পদক্ষেপ, কিয়নো ইউক্ৰেইনে শান্তিৰ বাবে কিছু ৰেহাই (concessions) দিছে, কিন্তু ৰাছিয়াই নিৰীহ লোকক হত্যা কৰি আছে।” তেওঁ ইংগিত দিছে যে অহা সপ্তাহৰ আৰম্ভণিতে বিধেয়কখনৰ ওপৰত চিনেটত ভোটদান হ’ব পাৰে।
এই নিষেধাজ্ঞা বিধেয়কৰ মূল লক্ষ্য হৈছে ৰাছিয়াৰ তেল, গেছ আৰু ইউৰেনিয়াম ৰপ্তানিৰ উৎস বন্ধ কৰি পুটিনৰ সামৰিক অভিযানৰ বিত্তীয় ভেটি দুৰ্বল কৰি তোলা। আমেৰিকাৰ প্ৰশাসনে ভাৰতৰ দৰে দেশসমূহৰ ওপৰত গৌণ নিষেধাজ্ঞা (Secondary Sanctions) আৰোপ কৰি ৰাছিয়াৰ সৈতে ব্যৱসায়িক সম্পৰ্ক ছেদ কৰিবলৈ বাধ্য কৰাব বিচাৰিছে।
মন কৰিবলগীয়া যে, ট্ৰাম্প প্ৰশাসনে এফালে এই কঠোৰ স্থিতি গ্ৰহণ কৰিছে আৰু আনফালে ইউক্ৰেইন যুদ্ধ সমাপ্ত কৰাৰ বাবে এক শান্তি চুক্তিৰ চেষ্টা চলাইছে। এই গুৰুত্বপূৰ্ণ আলোচনাৰ বাবে ট্ৰাম্পৰ বিশেষ দূত ষ্টিভ উইটকফ আৰু জোঁৱাই জেৰেড কুশনাৰে (Jared Kushner) মুখ্য আলোচনাকাৰী হিচাপে কাম কৰি আছে।
যদিহে আমেৰিকাৰ কংগ্ৰেছত এই বিধেয়কখন গৃহীত হয়, তেন্তে ভাৰতীয় ৰপ্তানি খণ্ডৰ বাবে ই এক ডাঙৰ প্ৰত্যাহ্বান আহি পৰিব হ’ব।
