বিদায়বেলাত আকৌ এবাৰ ‘বন্ধু’ ভাৰতৰ ওপৰত নিজৰ ক্ষোভ উজাৰিলে আমেৰিকাৰ ৰাষ্ট্ৰপতি ডোনাল্ড ট্ৰাম্পে।
ট্ৰাম্প প্ৰশাসনে H-1B ভিছাকে ধৰি বিদেশী নিযুক্তি প্ৰাৰ্থীসকলৰ ভিছা তথা গ্ৰীণ কাৰ্ডৰ অনুমোদন বন্ধৰ ম্যাদ অহা ৩১ মাৰ্চলৈ বৃদ্ধি কৰিছে।
ইয়াৰ পূৰ্বে এই ম্যাদ বিগত বছৰৰ ৩১ ডিচেম্বৰলৈকে আছিল।
কৰ’না ভাইৰাছৰ সংক্ৰমণজনিত পৰিস্থিতিৰ মাজতে ট্ৰাম্পে আমেৰিকাৰ নাগৰিকসকলৰ চাকৰি ৰক্ষা কৰাৰ বাবে যোৱা এপ্ৰিল আৰু জুনত দুখ ঘোষণা পত্ৰ জাৰি কৰি বাধা-নিষেধ আৰোপ কৰিছিল।
‘আমেৰিকা প্ৰথম’ নীতিৰে দেশখনৰ ৰাষ্ট্ৰপতি নিৰ্বাচনত বিজয়ী হোৱাৰ পৰিকল্পনা কৰিছিল ৰিপাব্লিকান নেতাগৰাকীয়ে। কিন্তু তাতো ফল নধৰিল ট্ৰাম্পৰ। বৰঞ্চ পৰাজিত হোৱাৰ ফলত আৰু কেইদিনমান পাছতে হোৱাইট হাউছো এৰিব লাগিব ট্ৰাম্পে।
পিচে, ইয়াৰ পূৰ্বে বৃহস্পতিবাৰে এখন ঘোষণা পত্ৰৰ জৰিয়তে ট্ৰাম্পে H-1B ভিছাকে ধৰি বিদেশী নিযুক্তি প্ৰাৰ্থীসকলৰ ভিছা অনুমোদন বন্ধৰ ম্যাদ বৃদ্ধি কৰে।
ইয়াৰ ফলত ভাৰতীয় তথ্য প্ৰযুক্তি খণ্ডৰ কৰ্মীসকলে ডাঙৰ প্ৰত্যাহ্বানৰ সন্মুখীন হ’বলগীয়া হ’ব। ট্ৰাম্প প্ৰশাসনৰ নতুন সিদ্ধান্তৰ ফলত H-1B ভিছাৰ ভাৰতীয় তথ্য প্ৰযুক্তিৰ কৰ্মীসকলে কেইবামাহো অপেক্ষা কৰিবলগীয়া হ’ব পাৰে।
সেইদৰে H-1B ভিছাৰ পুনৰ্নবীকৰণৰ চেষ্টা কৰাসকলেও ট্ৰাম্পৰ নতুন সিদ্ধান্তৰ ফলত ক্ষতিগ্ৰস্ত হ’ব।