আমেৰিকা যুক্তৰাষ্ট্ৰৰ ৰাষ্ট্ৰপতি ড’নাল্ড ট্ৰাম্পে বিশ্বৰ বৃহত্তম দ্বীপ গ্ৰীণলেণ্ডক আমেৰিকাৰ সৈতে সংযুক্ত কৰাৰ প্ৰস্তাৱ পুনৰ উত্থাপন কৰিছে। ট্ৰাম্পৰ এই প্ৰস্তাৱে সম্প্ৰতি আন্তঃৰাষ্ট্ৰীয় ৰাজনীতিত এক ব্যাপক চাঞ্চল্যৰ সৃষ্টি কৰিছে। গ্ৰীণলেণ্ডৰ কৌশলগত অৱস্থান আৰু ইয়াৰ প্ৰচুৰ খনিজ সম্পদৰ প্ৰতি লক্ষ্য ৰাখি ট্ৰাম্প প্রশাসনে ইয়াক আমেৰিকাৰ ৰাষ্ট্ৰীয় নিৰাপত্তাৰ বাবে অপৰিহাৰ্য বুলি অভিহিত কৰিছে।
অৱশ্যে, ট্ৰাম্পৰ এই স্থিতিক লৈ ডেনমাৰ্ক চৰকাৰে তীব্ৰ বিৰোধিতা কৰাৰ লগতে কঠোৰ আপত্তি দৰ্শাইছে। ডেনমাৰ্কৰ প্ৰধানমন্ত্ৰী মেট ফ্ৰেডেৰিকচেনে এই প্ৰস্তাৱক “অবান্তৰ” বুলি আখ্যা দি স্পষ্ট কৰি দিছে যে গ্ৰীণলেণ্ড বিক্ৰীৰ বাবে নহয়। আনহাতে, গ্ৰীণলেণ্ডৰ স্থানীয় চৰকাৰেও আমেৰিকাৰ এই আধিপত্যবাদী মনোভাৱক তীব্ৰ সমালোচনা কৰিছে। এই বিষয়টোক কেন্দ্ৰ কৰি বৰ্তমান দুয়োখন দেশৰ মাজত কূটনৈতিক সংঘাত তীব্ৰতৰ হৈ পৰিছে।
ট্ৰাম্পে গ্ৰীণলেণ্ড অন্তৰ্ভুক্ত কৰাৰ আহ্বান পুনৰ উত্থাপন কৰি কয় যে গ্ৰীণলেণ্ডৰ বিপুল খনিজ সম্পদ আৰু ইয়াৰ ভৌগোলিক অৱস্থান আমেৰিকাৰ ৰাষ্ট্ৰীয় নিৰাপত্তাৰ বাবে অতি গুৰুত্বপূৰ্ণ। আৰ্কটিক অঞ্চলত গ্ৰীণলেণ্ডৰ কৌশলগত অৱস্থানক লৈ ট্ৰাম্পে মন্তব্য কৰে যে, “ডেনমাৰ্কে অকলে ইয়াক চম্ভালিব নোৱাৰে।” বিশেষকৈ ভেনিজুৱেলাত আমেৰিকাৰ সামৰিক তৎপৰতা বৃদ্ধি পোৱাৰ পাছতে গ্ৰীণলেণ্ডৰ নিৰাপত্তাক লৈ ট্ৰাম্প প্রশাসনে অধিক সক্ৰিয়তা প্ৰকাশ কৰিছে।
ট্ৰাম্পৰ উপদেষ্টা ষ্টিফেন মিলাৰৰ পত্নী তথা প্ৰাক্তন চৰকাৰী বিষয়া কেটি মিলাৰে ছ’চিয়েল মিডিয়াত এখন বিতৰ্কিত মানচিত্ৰ প্ৰচাৰ কৰি এই বিতৰ্কত অধিক সাৰপানী যোগাইছে। এই মানচিত্ৰখনত গ্ৰীণলেণ্ডক আমেৰিকাৰ পতাকাৰ ৰঙেৰে অংকন কৰা হৈছে আৰু শিৰোনামত লিখা হৈছে— “শীঘ্ৰে” (Coming Soon)।
ডেনমাৰ্কৰ প্ৰধানমন্ত্ৰী মেট ফ্ৰেডেৰিকচেনে ট্ৰাম্পৰ এই “ভাবুকিপূৰ্ণ ভাষা”ক কঠোৰ সমালোচনা কৰিছে। তেওঁ স্পষ্টকৈ কয় যে আমেৰিকাই গ্ৰীণলেণ্ড দখল কৰিব বিচৰাটো কেতিয়াও গ্ৰহণযোগ্য নহয়। তেওঁৰ মতে, দুয়োখন দেশৰ সম্পৰ্ক আন্তঃৰাষ্ট্ৰীয় আইন আৰু পাৰস্পৰিক সন্মানৰ আধাৰত হোৱা উচিত।
একেদৰে গ্ৰীণলেণ্ডৰ প্ৰধানমন্ত্ৰী জেন্স-ফ্ৰেডেৰিক নীলছনে কেটি মিলাৰৰ পোষ্টক অপমানজনক বুলি অভিহিত কৰি কয়, “আমাৰ দেশ বিক্ৰীৰ বাবে নহয়। গ্ৰীণলেণ্ডৰ ভৱিষ্যৎ ছ’চিয়েল মিডিয়াৰ পোষ্টে নিৰ্ধাৰণ নকৰে।”
আমেৰিকাত থকা ডেনিছ ৰাষ্ট্ৰদূত জেছপাৰ ম’লাৰ ছ’ৰেন্সনে সোঁৱৰাই দিছে যে ডেনমাৰ্ক নাটোৰ (NATO) এক গুৰুত্বপূৰ্ণ সদস্য। তেওঁ উল্লেখ কৰে যে আৰ্কটিক নিৰাপত্তাৰ ক্ষেত্ৰত ডেনমাৰ্কে সদায় আমেৰিকাৰ সৈতে মিত্ৰ হিচাপে ঘনিষ্ঠ সহযোগিতা আগবঢ়াই আহিছে আৰু এই সহযোগিতা সেই মৰ্যাদাৰে অব্যাহত থকা উচিত।
মন কৰিবলগীয়া যে, ট্ৰাম্পৰ প্ৰথম কাৰ্যকালতো গ্ৰীণলেণ্ড ক্ৰয় কৰাৰ প্ৰস্তাৱক লৈ অনুৰূপ বিতৰ্কৰ সৃষ্টি হৈছিল। ২০২৬ চনৰ আৰম্ভণিতে ট্ৰাম্পে পুনৰ এই বিষয়টো উত্থাপন কৰাত আন্তঃৰাষ্ট্ৰীয় ৰাজনীতিত পুনৰ উত্তেজনাৰ সৃষ্টি হৈছে।
