ৰাছিয়া আৰু ইউক্ৰেইনৰ মাজত শীঘ্ৰেই যুদ্ধবিৰতিক লৈ আলোচনা আৰম্ভ হ’ব। সোমবাৰে এই দাবী কৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে। ৰাছিয়াৰ ৰাষ্ট্ৰপতি ভ্লাদিমিৰ পুটিনৰ সৈতে টেলিফোনযোগে কথা পতাৰ পিছতে তেওঁ এই মন্তব্য কৰে।
দুঘণ্টা ধৰি ভ্লাদিমিৰ পুটিনৰ সৈতে কথা পাতিছে বুলি উল্লেখ কৰে আমেৰিকাৰ ৰাষ্ট্ৰপতিগৰাকীয়ে। ট্ৰুথ ছ’চিয়েলত ট্ৰাম্পে কয় যে ৰাছিয়াৰ ৰাষ্ট্ৰপতিৰ সৈতে তেওঁৰ অতি ভালদৰে কথা-বতৰা হৈছিল। আমেৰিকাৰ ৰাষ্ট্ৰপতিয়েও এই আলোচনাক “যুদ্ধৰ অন্ত পেলোৱা”ৰ দিশত এক গুৰুত্বপূৰ্ণ পদক্ষেপ বুলি অভিহিত কৰে।
ট্ৰাম্প আৰু পুটিনৰ মাজত হোৱা আলোচনাৰ পিছত বহুতে ভাবে যে এইবাৰ ৰাছিয়া আৰু ইউক্ৰেইনৰ মাজত তিনিবছৰীয়া সংঘাত শেষ হ’বলৈ ওলাইছে। ইয়াৰ পূৰ্বে যোৱা শুকুৰবাৰে ৰাছিয়া আৰু ইউক্ৰেইনে ইস্তানবুলত প্ৰথমবাৰৰ বাবে মেজত বহি কোনো মধ্যস্থতাকাৰী অবিহনে যুদ্ধবিৰতিৰ প্ৰস্তাৱৰ ওপৰত আলোচনা কৰে। অৱশ্যে সেই বৈঠক ফলপ্ৰসূ নহ’ল।
কিন্তু ইউক্ৰেইনৰ ৰাষ্ট্ৰপতি ভ’ল’ডিমাইৰ জেলেনস্কিয়ে কয় যে ইউক্ৰেইন শান্তি আলোচনা অব্যাহত ৰখাৰ পক্ষত। দেওবাৰে জেলেনস্কিয়ে ৰোমত আমেৰিকাৰ উপ-ৰাষ্ট্ৰপতি জে ডি ভেন্সৰ সৈতে সাক্ষাৎ কৰে। তাতো তেওঁ একেই কথা কৈছিল।
জানিব পৰা মতে ৰাছিয়াও ইউক্ৰেইনৰ সৈতে যুদ্ধবিৰতিৰ দিশত আগবাঢ়িবলৈ সাজু হৈছে। ফোন কলৰ সময়ত এই কথা আমেৰিকাৰ ৰাষ্ট্ৰপতিক জনায় পুটিনে। সংবাদ সংস্থা ৰয়টাৰ আৰু এ এফ পিৰ খবৰ অনুসৰি ৰাছিয়াই যুদ্ধবিৰতিৰ বাবে সন্মতি দিছিল যদিও কেইবাটাও চৰ্ত আৰোপ কৰিছে। অৱশ্যে এই চৰ্তৰ সবিশেষ জানিব পৰা হোৱা নাই।
আমেৰিকাৰ ৰাষ্ট্ৰপতিগৰাকীৰ সৈতে ফোনযোগে কথা পতাৰ পিছত পুটিনে কয় যে তেওঁ আৰু ড’নাল্ড ট্ৰাম্পে যুদ্ধবিৰতি আৰু শান্তি পুনৰুদ্ধাৰ সম্পৰ্কীয় কেইবাটাও বিষয়ত সহমতত উপনীত হৈছে। ইয়াৰ বাবে মস্কোৱে ইউক্ৰেইনৰ সৈতে সমন্বয়ত এখন স্মাৰকপত্ৰ প্ৰস্তুত কৰিব।
পুটিনে লগতে কয় যে ই ভৱিষ্যতে সম্ভাৱ্য শান্তি চুক্তিৰ বাবে মূল স্থিতিৰ ৰূপৰেখা দাঙি ধৰিব। পুটিনে এইটোও কয় যে ইয়াৰ ফলত ২০২২ চনত আৰম্ভ হোৱা যুদ্ধৰ অন্ত পেলোৱাৰ দিশত ৰাছিয়াই সঠিক পথত আগবাঢ়িছে।
ইপিনে, সেই বৈঠকৰ অন্তত আমেৰিকাৰ ৰাষ্ট্ৰপতিয়ে কয় যে দ্বিপাক্ষিক আলোচনাৰ চৰ্তসমূহ দুয়োপক্ষৰ মাজত পোনপটীয়াকৈ আলোচনা কৰা হ’ব। তেওঁ কয় যে এইটোৱেই একমাত্ৰ উপায় কাৰণ তেওঁলোকে এনে এটা আলোচনাৰ সবিশেষ জানে যিটো আন কোনোৱে নাজানে।
ট্ৰাম্পে কয় যে পুটিনৰ সৈতে কথা পতাৰ পিছত তেওঁ ইউক্ৰেইনৰ ৰাষ্ট্ৰপতিকো ফোন কৰে। ইয়াৰ উপৰিও তেওঁ কেইবাখনো দেশৰ ৰাষ্ট্ৰপতিৰ সৈতেও টেলিকনফাৰেন্স অনুষ্ঠিত কৰিছিল।
এই যুদ্ধ শেষ হোৱাৰ পিছত ৰাছিয়াই তেওঁলোকৰ সৈতে বৃহৎ বাণিজ্য কৰিব বিচাৰিছে বুলি আমেৰিকাৰ ৰাষ্ট্ৰপতিগৰাকীয়ে কৈছে। ইয়াৰ উপৰিও তেওঁ কয় যে ইউক্ৰেইনেও ইয়াৰ বাণিজ্যৰ দ্বাৰা লাভৱান হ’ব।
