হস্তী-মানুহৰ সংঘাতে জৰ্জৰিত কৰা নগাঁও-কাৰ্বিআংলং সীমান্তৱৰ্ত্তী এটি অঞ্চলত এই বছৰ বন্যহস্তীয়ে চলোৱা নাই কোনো ধৰণৰ উপদ্ৰৱ। যাৰ বাবে সীমামুৰীয়া ভৈয়ামৰ কৃষক ৰাইজৰ মুখত বিৰিঙিছে এমোকোৰা হাঁহি!
কাৰণ নগাঁও-কাৰ্বিআংলং সীমান্তৱৰ্ত্তী ৰংহাং হাতীখলি গাঁৱৰ সমীপৰ পাহাৰীয়া ৬০০ বিঘা ভূমিত কৰা হৈছে কৃষি কাৰ্য কেৱল মাত্ৰ বনৰীয়া হাতীক খাদ্য যোগান ধৰিবৰ বাবে।
ৰংহাং হাতীখলি গাঁৱৰ ৰাইজৰ সহযোগত “হাতীবন্ধু” নামৰ এটি স্বেচ্ছাসেৱী সংগঠনে গুৱাহাটীৰ জ্যেষ্ঠ নাগৰিক প্ৰদীপ কুমাৰ ভূঞাৰ পৃষ্ঠপোষকতাত তথা চাপানালাৰ প্ৰকৃতিপ্ৰেমী যুৱক বিনোদ দুলু বৰা আৰু তেওঁৰ পত্নী মেঘ্নাময়ূৰ হাজৰীকাৰ নেতৃত্বত বন্যহস্তীক খাদ্য যোগান ধৰিবৰ বাবে বিগত বছৰত ২০০ বিঘা মাটিত ধান খেতি কৰাৰ বিপৰীতে এই বছৰ ৬০০ বিঘা পাহাৰীয়া মাটিত কেৱল ধান খেতিয়েই নহয় বন্যহস্তীক পৰ্য্যপ্ত আহাৰ যোগান ধৰিব পৰাকৈ কৰিছে ঝাৰু, নেফিয়াৰ ঘাঁহ, ঔ-টেঙা, কুম্ভীৰ আদি হাতীৰ প্ৰিয় খাদ্য হিচাপে পৰিচিত বিভিন্ন উদ্ভিদৰ খেতি।
অঞ্চলটোত যোৱা বছৰ ২০০ বিঘা মাটিত ধান খেতি কৰি ভৈয়ামত উপদ্ৰৱ চলোৱা বনৰীয়া হাতীৰ জাকৰ বিচৰণ ২৬ দিন ধৰি ধাননি খনতে সীমিত কৰি ৰাখিবলৈ সক্ষম হোৱাৰ পিছত এইবছৰ কৰা ৬০০ বিঘা মাটিত কৰা খেতিৰ জৰিয়তে নিশ্চয়কৈ ভৈয়ামৰ কৃষকৰ কষ্টোপাৰ্জিত ধানখেতি ডৰা চপোৱাৰ সময়ত যথেষ্ট দিন ধৰি বনৰীয়া হাতীৰ জাকৰ বিচৰণ ৰংহাং হাতীখলিৰ বিশেষ পথাৰ খনতে সীমাবদ্ধ কৰি ৰাখিব পাৰিব বুলি আশাবাদী দুলু বৰাহঁত।
ইফালে পূৰ্বৰ তুলনাত বন্যহস্তীৰ উপদ্ৰৱৰ পৰা এই বছৰ সীমান্তৱৰ্ত্তী কৃষক ৰাইজ বহু পৰিমাণে পৰিত্ৰাণ পোৱাৰ বাবে বহুবোৰ সুখকৰ অভিজ্ঞতাৰ সাক্ষী হ’বলৈ সুবিধা পাইছে বুলিও সংবাদ মাধ্যমক জানিবলৈ দিছে স্থানীয় ৰাইজে।
লগতে এইবছৰ বনাঞ্চল এৰি খাদ্যৰ সন্ধানত বন্যহস্তীৰ জাক জনাঞ্চলত প্ৰবেশ নকৰাৰ বাবে বহু বছৰৰ মুৰকত ৰংহাংৰ গঞাঁ ৰাইজেও কঠালৰ সোৱাদ ল’বলৈ সুবিধা পোৱাৰ লগতে পথাৰৰ ধান কেইটা চপাই আনি নিজৰ ঘৰত মজুত কৰি ৰাখিব পৰাকৈ নতুনকৈ ভঁৰাল ঘৰো সাজিবলৈও দিহা কৰিছে বুলি জানিব পৰা গৈছে।
লক্ষণীয় কথাটো হ’ল যে, ২০১৯ বৰ্ষৰ মুখ্যমন্ত্ৰীৰ শ্ৰেষ্ঠ সামুহিক কৰ্ম বঁটা প্ৰাপক প্ৰকৃতিপ্ৰেমী দুলু বৰা, সহধৰ্মিণী মেঘ্নাময়ূৰ হাজৰিকা, গুৱাহাটীৰ জ্যেষ্ঠ নাগৰিক প্ৰদীপ কুমাৰ ভূঞা আদিৰ দৰে ব্যক্তি সকলে নিজৰ ঘৰৰ পৰা বহু দূৰৈত জংঘলৰ মাজত থাকি দিনে-নিশাই কৰি অহা নিঃস্বাৰ্থ কৰ্ম আৰু নিভাজ হস্তীপ্ৰেমৰ বাবেই নিশ্চয় এইবেলি বহু জনৰ মুখত হাঁহি বিৰিঙিছে নগাঁও-কাৰ্বিআংলং সীমান্তৱৰ্ত্তী ৰংহাং হাতীখলি অঞ্চলত।
