ইস্তানবুলৰ পৰা কাঠমাণ্ডুত উপস্থিত হয় তাৰ্কিছ এয়াৰলাইন্সৰ বিমান TK726। বিমানখন পুৱা ৬:৪৫ বজাত অৱতৰণ কৰাৰ সময়তে ঘটে বিপদ। বিমানখনৰ চকাত সংঘটিত হয় অগ্নিকাণ্ডৰ। বিমানবন্দৰত আতংকৰ সৃষ্টি হয়। আতংকিত হৈ পৰে যাত্ৰীসকল। এনে পৰিস্থিতিত বিমানবন্দৰৰ অগ্নিনিৰ্বাপক বাহিনীয়ে ক্ষিপ্ৰ ব্যৱস্থা গ্ৰহণ কৰে। পৰিস্থিতি নিয়ন্ত্ৰণলৈ অনা হয়।
ইতিমধ্যে নেপাল অসামৰিক বিমান পৰিবহণ কৰ্তৃপক্ষই এই সন্দৰ্ভত বিতং প্ৰতিবেদন দিছে। তেওঁলোকৰ দাবী, বিমানখনত ২৭৮ জন যাত্ৰী আছিল। ইয়াৰ ভিতৰত আছিল ৪টা শিশু। বিমানখনত ১১ জন ক্ৰু মেম্বাৰ আছিল। অৱশ্যে এতিয়া সকলো নিৰাপদ।
বিমানবন্দৰ কৰ্তৃপক্ষই জনোৱা মতে, অগ্নিকাণ্ডৰ কথা লক্ষ্য কৰাৰ পিছত যুদ্ধকালীন ব্যৱস্থা গ্ৰহণ কৰা হয়। লগে লগে জুই নিৰ্বাপিত কৰা হয়। জৰুৰীকালীন দুৱাৰো খুলি দিয়া হয়। তাৰ পৰাই যাত্ৰীসকলক লৈ অনা হয়।
বাতৰি মতে, উদ্ধাৰ অভিযান ভালদৰেই সম্পন্ন হয়। সকলো যাত্ৰী সুৰক্ষিত। ইয়াৰে কেইজনমান সামান্য আঘাতপ্ৰাপ্ত হৈছে। এই বিমানখনত বহুত লাগেজ আছিল। কেৱল সেয়াই নহয়, এই বিমানত এটা মৃতদেহো উদ্ধাৰ কৰা হৈছে যদিও তথ্য বিষয়া জ্ঞানেন্দ্ৰই ভুলকৈ উল্লেখ কৰিছে যে এই বিমানত থকা সকলোৱেই সুস্থ।
দুৰ্ঘটনা সংঘটিত হোৱাৰ লগে লগে ৰাণৱেত ৰৈ যায় তাৰ্কিছ এয়াৰলাইন্সৰ বিমানখন। যাৰ বাবে বিমানবন্দৰত কেইবাখনো বিমান উৰিব পৰা নাছিল। আনকি কিছুমান বিমানে আকাশতে উৰি ফুৰিছিল। তেওঁলোকে অৱতৰণ কৰাৰ সুযোগ নাপালে।
উদাহৰণস্বৰূপে দিল্লীৰ পৰা এয়াৰ ইণ্ডিয়াৰ এ আই ২১৫ বিমান আৰু শ্বাৰজাহৰ পৰা জি ৯ ৫৩৬ বিমান সময়মতে অৱতৰণ কৰিব নোৱাৰিলে। একেদৰে ভূটান, ডুবাই আৰু কুৱালালামপুৰৰ বিমানো কাঠমাণ্ডু বিমানবন্দৰৰ ওপৰত উৰি ফুৰিছিল।
