গহপুৰৰ জঘন্য কিশোৰী ধৰ্ষণ আৰু হত্যাকাণ্ডৰ ৭ অভিযুক্তক আটক গহপুৰ আৰক্ষীৰ।
উল্লেখ্য যে যোৱা শুকুৰবাৰে নিশা গহপুৰৰ ৰজাবাৰী ১ নং চকলা গাঁৱৰ এগৰাকী ১২ বছৰীয়া কিশোৰীক দলৱদ্ধ ধৰ্ষণ কৰি হত্যা বলি হয়। ধৰ্ষণ কৰাৰ পিছত কিশোৰীগৰাকীক হত্যা কৰি এজোপা গছত ফাঁচ লগাই ওলোমাই থোৱা অৱস্থাত কিশোৰীগৰাকীৰ মৃতদেহ উদ্ধাৰ কৰা হয়।
কালি পুৱা ২ টা অভিযুক্তক আৰক্ষী আটক কৰাৰ পিছত আন ৫ টা অভিযুক্তকো আৰক্ষীয়ে আটক কৰে।
আনহাতে এটা অভিযুক্তক ৰাইজে ধৰি উত্তম মধ্যম শুধোৱাৰৰ পিছত আৰক্ষীক গটাই দিয়ে।
গহপুৰ আৰক্ষীয়ে ধৰ্ষণ আৰু হত্যাত অভিযুক্তকেইটাক আটক কৰাৰ পিছত জানিবলৈ দিছে আটাইকেইটাই হাই স্কুল শিক্ষান্ত পৰীক্ষাৰ পৰীক্ষাৰ্থী তথা নাবালক।
ইফালে অভিযুক্তকেইটাক গ্ৰেপ্তাৰ কৰাৰ পিছত কিশোৰীৰ পিতৃৰ লগতে গাঁৱৰ ৰাইজে গহপুৰ আৰক্ষী থানাত উপস্থিত হৈ চাবলৈ বিচাৰিছিল। অভিযুক্তকেইটা নাবালক হোৱাৰ বাবেই আৰক্ষীয়ে স্থানীয় ৰাইজক প্ৰত্যক্ষ কৰিবলৈ বাধা প্ৰদান কৰে। আৰক্ষীৰ বিষয়াই কয় যে জুভেনাইল এক্টৰ মতে ১৮ বছৰ অনুৰ্দ্ধৰ অভিযুক্তৰ নাম প্ৰকাশ, ফ’টো তোলা আদি আইন বিৰুদ্ধ সেয়ে তেওঁলোকে অভিযুক্তক ৰাইজক প্ৰত্যক্ষ কৰাৰ বাবে বাৰণ কৰিছে। সংবাদ মাধ্যমৰ লোককো অভিযুক্তৰ নাম ঠিকনা আৰু ফ’টো প্ৰকাশৰ পৰা বিৰত থাকিবলৈ আহ্বান জনাইছে আৰক্ষীয়ে।
ইফালে অভিযুক্তক প্ৰত্যক্ষ কৰিবলৈ নিদিয়াৰ বাবে স্থানীয় ৰাইজৰ লগতে কিশোৰীগৰাকীৰ পিতৃয়ে আৰক্ষীৰ প্ৰতি তীব্ৰ বিষোদগাৰ প্ৰকাশ কৰিছে।
স্থানীয় ৰাইজে অভিযুক্তক ফাঁচী দিয়াৰো দাবী উত্থাপন কৰে আৰক্ষী চৌহদত।
