মথুৰাত ভয়ংকৰ কাণ্ড! পানীৰ টেংকি ভাঙি দুজনৰ মৃত্যু, ১৩জন আহত

দেওবাৰে সন্ধিয়া সংঘটিত এক ভয়ংকৰ কাণ্ডত উত্তৰ প্ৰদেশৰ মথুৰাত এটা পানীৰ টেংকি ভাঙি দুগৰাকী মহিলাই প্ৰাণ হেৰুওৱাৰ লগতে ১৩ জন লোক আহত হয়।

মথুৰাৰ কোতৱালি থানাৰ আৱাস বিকাশ কলনীৰ কৃষ্ণ বিহাৰ অঞ্চলত সংঘটিত হৈছে এই ঘটনা।

খবৰ অনুসৰি আহতসকলক ততাতৈয়াকৈ চিকিৎসালয়লৈ প্ৰেৰণ কৰা হৈছে আৰু তেওঁলোকৰ চিকিৎসা অব্যাহত আছে। আহত ১৩ জন লোকৰ ভিতৰত এজনৰ অৱস্থা সংকটজনক।

জানিব পৰা মতে, পানী টেংকৰ ওচৰত অৱস্থিত কেইবাটাও ঘৰ এই কাণ্ডত ক্ষতিগ্ৰস্ত হয় কাৰণ টেংকৰ পৰা ধ্বংসাৱশেষ আৰু লিক হোৱা পানী বহু ঘৰত প্ৰৱেশ কৰে।

লগতে পঢ়কঃ প্ৰশ্নৰ মুখত গুজৰাট মডেল! ধাৰাসাৰ বৰষুণত বিপৰ্যস্ত স্মাৰ্ট চিটি আহমেদাবাদ, অমিত শ্বাহৰ গান্ধীনগৰ

ইয়াৰ ফলত বৈদ্যুতিক সঁজুলিৰ অধিক ক্ষতি হোৱাৰ বিপৰীতে পথত ৰখাই থোৱা বিভিন্ন গাড়ীৰো ক্ষতিসাধন হৈছে।

এই পানীৰ টেংকিটো গংগাজল খোৱাপানী প্ৰকল্পৰ অধীনত ২০২১ চনত জল নিগমে ৬ কোটি টকা ব্যয় সাপেক্ষে নিৰ্মাণ কৰিছিল।

প্ৰশাসনিক বিষয়াসকলে লগে লগে সেই স্থানত উপস্থিত হৈ সাহায্য আৰু উদ্ধাৰৰ কাম আৰম্ভ কৰে।

আৰক্ষী বাহিনী, এন ডি আৰ এফ, এছ ডি আৰ এফ, আৰু অন্যান্য জৰুৰীকালীন সেৱাসমূহ ঘটনাস্থলীত উপস্থিত হৈ উদ্ধাৰ অভিযানত অহৰহ নিৰীক্ষণ কৰি আছে।

Water tank (constructed in 2021) collapsed in Mathura.
Many people are feared to be trapped underneath.💔 pic.twitter.com/M65NEno9PM

— Cow Momma (@Cow__Momma) June 30, 2024

বিষয়টোৰ গুৰুত্ব বিবেচনা কৰি মুখ্যমন্ত্ৰী যোগী আদিত্যনাথে গোচৰটোত দোষী ঠিকাদাৰৰ বিৰুদ্ধে এফআইআৰ ৰুজু কৰাৰ নিৰ্দেশ দিয়ে।

জিলা দণ্ডাধীশ শৈলেন্দ্ৰ কুমাৰ সিঙে দুগৰাকী মহিলাৰ মৃত্যুৰ কথা নিশ্চিত কৰি আহতসকল বৰ্তমান চিকিৎসাধীন হৈ আছে বুলি জানিবলৈ দিয়ে।