আমেৰিকাৰ আইডাহ’ত সংঘটিত হৈছে এক ভয়ংকৰ দুৰ্ঘটনা। মাউণ্টেন হোম বায়ুসেনা ঘাটিত এক বৃহৎ বিমান প্ৰদৰ্শনৰ সময়ত সংঘৰ্ষ হয় দুখন আমেৰিকান যুদ্ধ বিমানৰ। সংঘৰ্ষৰ লগে লগে দুয়োখন বিমান দুৰ্ঘটনাগ্ৰস্ত হয়। অৱশ্যে দুয়োখন বিমানৰ পাইলট সুৰক্ষিত বুলি কোৱা হৈছে। দুৰ্ঘটনা সংঘটিত হোৱাৰ লগে লগে সমগ্ৰ বিমান ঘাটিটো বন্ধ কৰি দিয়া হয়।
সূত্ৰ অনুসৰি দেওবাৰে স্থানীয় সময় অনুসৰি নিশা প্ৰায় ১২:৩০ বজাত সংঘটিত হয় এই দুৰ্ঘটনা। সেই সময়ত বিমান ঘাটিত চলি আছিল ‘গানফাইটাৰ স্কাই এয়াৰ শ্ব’। দুৰ্ঘটনাগ্ৰস্ত বিমান দুখন আছিল আমেৰিকাৰ নৌসেনাৰ উন্নত EA-18G Growler যুদ্ধ বিমান। খবৰ অনুসৰি বিমান ঘাটিৰ পৰা প্ৰায় দুই মাইল দূৰত বিমান দুখন দুৰ্ঘটনাগ্ৰস্ত হয়।
ছ’চিয়েল মিডিয়াত ভাইৰেল হোৱা ভিডিঅ’টোত দুয়োখন বিমানৰ আকাশত সংঘৰ্ষ হোৱাৰ লগে লগে জুইৰ কুণ্ডলীত পৰিণত হয়। কিন্তু সংঘৰ্ষৰ লগে লগে দুয়োখন বিমানৰ পৰা পেৰাচুট লৈ চাৰিজন পাইলটক দেখা যায়। জনা গৈছে যে দুয়োখন বিমানৰ চাৰিওজন ক্ৰু মেম্বাৰে সময়মতে নিৰাপদে নামিবলৈ সক্ষম হৈছিল। আমেৰিকাৰ নৌসেনাই নিশ্চিত কৰিছে যে চাৰিওজন ক্ৰু মেম্বাৰ নিৰাপদে আছে।
প্ৰতিবেদন অনুসৰি দীঘলীয়া ৮ বছৰৰ পিছত এই গ্ৰেণ্ড এয়াৰ শ্ব’ৰ আয়োজন কৰা হৈছিল। ইয়াক চাবলৈ হাজাৰ হাজাৰ লোক গোট খাইছিল। এই অনুষ্ঠানৰ বাবে আয়োজকসকলে প্ৰায় দুবছৰ ধৰি প্ৰস্তুতি চলাইছিল। কিন্তু এই ভয়ংকৰ দুৰ্ঘটনাৰ পিছত দেওবাৰৰ আগন্তুক সকলো অনুষ্ঠান বাতিল কৰা হয় । একে সময়তে আমেৰিকাৰ বায়ুসেনা আৰু নৌসেনাৰ বিষয়াসকলে এই ঘটনাৰ তদন্তৰ নিৰ্দেশ দিছে।
মন কৰিবলগীয়া যে বিগত সময়ত এই মাউন্টেন হোম বিমান ঘাটিটোত বহু দুৰ্ঘটনা সংঘটিত হৈছে। দুখন EA-18G Growler জেটৰ এই ঘটনাই সেই পুৰণি স্মৃতিবোৰ ঘূৰাই আনিছে। ইয়াৰ পূৰ্বে ২০১৮ চনত ইয়াৰ ৰাণৱেত এখন হেং গ্লাইডাৰ দুৰ্ঘটনাগ্ৰস্ত হৈছিল, তাত পাইলটৰ মৃত্যু হৈছিল। ইয়াৰ পূৰ্বে ২০০৩ চনত ইয়াত ‘থাণ্ডাৰবাৰ্ডছ জেট’ বিমান দুৰ্ঘটনাগ্ৰস্ত হৈছিল। অৱশ্যে সেই ঘটনাত পাইলটজন ৰক্ষা পৰে।
