নেপালৰ নিৰ্বাচনত তিনিগৰাকী প্ৰাক্তন প্ৰধানমন্ত্ৰীয়ে প্ৰতিদ্বন্দ্বিতা কৰিছিল। তাৰে দুজনে পৰাজিত হৈছে। অৱশ্যে ‘বলেন্দ্ৰ ছুনামী’ৰ মাজতে আন এজন প্ৰাক্তন প্ৰধানমন্ত্ৰী পুষ্পকমল দাহাল ওৰফে ‘প্ৰচণ্ড’ই কোনোমতে জয়লাভ কৰে।
নেপালৰ সাধাৰণ নিৰ্বাচনত ৰাষ্ট্ৰীয় স্বতন্ত্ৰ পাৰ্টিয়ে নিৰংকুশ সংখ্যাগৰিষ্ঠতা লাভ কৰিবলৈ আগবাঢ়িছে। যোৱা ছেপ্টেম্বৰ মাহত নেপালত ‘গণ অভ্যুত্থান’ সংঘটিত হৈছিল। জেন জেডে তাত চৰকাৰ সলনিৰ আহ্বান জনায়। ৰাষ্ট্ৰীয় স্বতন্ত্ৰ পাৰ্টি নতুন প্ৰজন্মৰ পছন্দৰ দল।
২০২২ চনত গঠন হোৱা এই দলটোৱে নেপালত চৰকাৰ গঠন কৰিব সেয়া নিশ্চিত হৈছে। দেওবাৰে সন্ধিয়ালৈকে ১৫৬খন আসনৰ ভিতৰত ১২০খন আসনৰ ফলাফল ঘোষণা কৰা। ইয়াত বলেন্দ্ৰ শ্বাহৰ দলে দুই তৃতীয়াংশ আসন লাভ কৰিছে। কাঠমাণ্ডুৰ মেয়ৰ বলেন্দ্ৰ শ্বাহ নেপালৰ পৰৱৰ্তী প্ৰধানমন্ত্ৰী হ’ব।
ঝাপা-৫ সমষ্টিৰ পৰা বলেন্দ্ৰই জয়লাভ কৰে। সেই সমষ্টিত নেপালৰ প্ৰাক্তন প্ৰধানমন্ত্ৰী কে পি অলিয়ে তেওঁৰ বিৰুদ্ধে প্ৰতিদ্বন্দ্বিতা কৰিছিল। সেই সমষ্টিত কেপি অলিক ৫০ হাজাৰৰো অধিক ভোটত পৰাস্ত কৰিছে বলেন্দ্ৰ শ্বাহে। কে পি অলি চাৰিবাৰৰ প্ৰধানমন্ত্ৰী আছিল। ঝাপা-৫ আছিল তেওঁৰ দুৰ্গ। ইমান দিনে সেই সমষ্টিৰ পৰাই তেওঁ জয়ী হৈছিল। নতুন প্ৰজন্মৰ ওপৰত আস্থা ৰাখি ঝাপা-৫ সমষ্টিৰ পৰা প্ৰতিদ্বন্দ্বিতা কৰিছিল বলেন্দ্ৰই।
প্ৰসংগক্ৰমে যোৱা বছৰৰ ৯ ছেপ্টেম্বৰত জেন জেড প্ৰতিবাদৰ বাবে অলিয়ে প্ৰধানমন্ত্ৰীৰ পদৰ পৰা পদত্যাগ কৰিছিল।
কেৱল অলিয়েই নহয়, আন এজন প্ৰাক্তন প্ৰধানমন্ত্ৰী মাধৱ নেপালো নিৰ্বাচনত পৰাস্ত হয়। ৰাউতহাট-১ সমষ্টিত আৰ এছ পিৰ ৰাজেশ কুমাৰ চৌধুৰীৰ হাতত তেওঁ পৰাস্ত হয়। আন এজন প্ৰাক্তন প্ৰধানমন্ত্ৰী তথা প্ৰগতিশীল লোকতান্ত্ৰিক পাৰ্টিৰ সভাপতি বাবুৰাম ভট্টৰাইয়ে গোৰ্খা-২ সমষ্টিৰ বাবে মনোনয়ন পত্ৰ দাখিল কৰিছিল। অৱশ্যে সেয়া তেওঁ প্ৰত্যাহাৰ কৰে।
অৱশ্যে পুষ্পকাল দহল ওৰফে ‘প্ৰচণ্ড’ জয়ী হয়। প্ৰতিবাৰেই তেওঁ নতুন সমষ্টিৰ পৰা প্ৰতিদ্বন্দ্বিতা কৰে। এইবাৰো তেওঁ তাকেই কৰে। এইবাৰ তেওঁ ৰুকুম ইষ্ট সমষ্টিৰ পৰা প্ৰতিদ্বন্দ্বিতা কৰিছিল।
মন কৰিবলগীয়া যে ২০২২ চনত তেওঁ গোৰ্খা-২ সমষ্টিৰ পৰা আৰু আগৰবাৰ চিটৱান-৩ সমষ্টিৰ পৰা প্ৰতিদ্বন্দ্বিতা কৰিছিল। ২০১৩ চনত কাঠমাণ্ডু-১০ সমষ্টিৰ পৰা পৰাস্ত হৈছিল যদিও ছিৰাহা-৫ সমষ্টিৰ পৰা জয়ী হৈছিল।
নেপালৰ প্ৰাক্তন সাংসদ সুনীল বাবু পণ্টে কয়, ‘প্ৰতিবাৰেই প্ৰচণ্ডই নতুন আৰু নিৰাপদ সমষ্টিৰ সন্ধান কৰে। ৰুকুম ইষ্ট সমষ্টিটো এসময়ত মাওবাদীৰ দুৰ্গ আছিল। সেইবাবেই তেওঁ সেই সমষ্টিটো বাছি লৈছিল।’ ইয়াৰ সমান্তৰালকৈ প্ৰচণ্ডই দলটোৰ নাম সলনি কৰি নেপালী কমিউনিষ্ট পাৰ্টি ৰাখে।
অৱশ্যে পৰিৱৰ্তনৰ বতাহত কেৱল প্ৰাক্তন প্ৰধানমন্ত্ৰী দুগৰাকীয়ে পৰাস্ত হৈছে এনে নহয়, একাধিক হেভিৱেট প্ৰাৰ্থীও পৰাজিত হৈছে।
