বিশ্বৰ সৰ্বোচ্চ শৃংগ মাউণ্ট এভাৰেষ্ট জয় কৰি ঘৰলৈ ঘূৰি নাহিল দুই ভাৰতীয় পৰ্বতাৰোহীৰ। শৃংগ জয় কৰি তললৈ নামি অহাৰ সময়তে দুয়োগৰাকীৰে অতি দুখজনকভাৱে মৃত্যু ঘটে। শুকুৰবাৰে নেপালৰ এজন বিষয়াৰ উদ্ধৃতি দি দেশৰ এটা সংবাদ সংস্থাই এই বেদনাদায়ক খবৰ প্ৰকাশ কৰিছে।
মৃত পৰ্বতাৰোহী দুজনৰ নাম হৈছে অৰুণ তিৱাৰী আৰু সন্দীপ আৰে। নেপালৰ এক্সপেডিচন অপাৰেটৰ্ছ এছ’চিয়েচনৰ ছেক্ৰেটেৰী জেনেৰেল ঋষি ভাণ্ডাৰীয়ে জনোৱা মতে, ওপৰৰ পৰা নামি অহাৰ সময়ত হঠাতে এজন পৰ্বতাৰোহী অত্যন্ত ভাগৰুৱা হৈ পৰিছিল। তেওঁক উদ্ধাৰ কৰিবলৈ শ্বেৰপাসকলে গোটেই নিশা প্ৰাণপণে চেষ্টা চলাইছিল। তেওঁক ব্যালকনি নামৰ অঞ্চলটোৰ পৰা চাউথ কললৈ নমাই আনিবলৈ চেষ্টা কৰা হৈছিল যদিও শেষ পৰ্যন্ত তেওঁক বচাবলৈ সম্ভৱ নহ’ল।
ঠিক একে সময়তে আন এগৰাকী ভাৰতীয় পৰ্বতাৰোহী অৰুণ তিৱাৰীও এভাৰেষ্ট শৃংগত উপনীত হৈছিল। বৃহস্পতিবাৰে বিয়লি প্ৰায় পাঁচ বজাত তেওঁ সৰ্বোচ্চ চূড়াত ভৰি থৈছিল। তেওঁৰ সৈতে দুজন অভিজ্ঞ শ্বেৰপা গাইডো আছিল। কিন্তু ওপৰৰ পৰা নামি অহাৰ সময়ত হিলাৰী ষ্টেপ নামৰ এলেকাটোত তেওঁ হঠাতে অসুস্থ আৰু ক্লান্ত হৈ পৰে। শ্বেৰপাসকলে বহু চেষ্টা কৰিছিল যদিও তেওঁক সুস্থ শৰীৰে ঘূৰাই আনিব নোৱাৰিলে বুলি ভাণ্ডাৰীয়ে জানিবলৈ দিয়ে। তথ্য অনুসৰি, হিলাৰী ষ্টেপৰ ওচৰতেই অৰুণ তিৱাৰীৰ মৃত্যু হয়। আনহাতে, সন্দীপ আৰেক উদ্ধাৰ কৰি কেম্প টুটৈ নমাই অনা হৈছিল যদিও তাতেই তেওঁ শেষ নিশ্বাস ত্যাগ কৰে।
এভাৰেষ্ট অভিযানত সংঘটিত এই দুই মৃত্যুৰ ঘটনাই পৰ্বতাৰোহীসকলৰ মাজত নতুনকৈ চিন্তা আৰু উদ্বেগ বৃদ্ধি কৰিছে। অৱশ্যে ইয়াৰ মাজতে এই বছৰ ভাৰতীয় পৰ্বতাৰোহীসকলৰ সফলতাৰ বহু ভাল খবৰো পোহৰলৈ আহিছে। অলপতে মাত্ৰ ২১ বছৰ বয়সতে এভাৰেষ্ট জয় কৰিবলৈ সক্ষম হৈছে ছানিকা শ্বাহ নামৰ এগৰাকী যুৱতীয়ে। ইয়াৰ উপৰিও সীমান্ত সুৰক্ষা বাহিনী অৰ্থাৎ বিএছএফৰ সম্পূৰ্ণ মহিলাৰে গঠিত এটা পৰ্বতাৰোহী দলেও সফলতাৰে এভাৰেষ্ট শৃংগ স্পৰ্শ কৰিবলৈ সক্ষম হৈছে।
এই বছৰৰ পৰ্বতাৰোহনৰ বতৰত এভাৰেষ্টত পৰ্বতাৰোহীৰ ভিৰে এক নতুন ৰেকৰ্ড গঢ়ি তুলিছে। কেৱল বুধবাৰৰ দিনটোতে নেপালৰ দিশৰ পৰা ২৭৪ গৰাকী পৰ্বতাৰোহীয়ে এভাৰেষ্টৰ চূড়াত ভৰি থৈছে। খুম্বু আইচফলত কিছু পলম হোৱাৰ বাবে এইবাৰৰ অভিযান অলপ দেৰিকৈ আৰম্ভ হৈছিল। যোৱা ১৩ মে’ত ৰোপ ফিক্সিং অৰ্থাৎ জৰী বান্ধি পথ তৈয়াৰ কৰাৰ কাম শেষ হোৱাৰ পিছত আনুষ্ঠানিকভাৱে এই বৰ্ষৰ ক্লাইম্বিং চিজন আৰম্ভ হৈছিল।
উল্লেখ্য যে, নেপাল চৰকাৰে এইবাৰ এভাৰেষ্ট অভিযানৰ বাবে ৪৯৩ টা পাৰমিট বা অনুমতি পত্ৰ দিছে, যিটো এতিয়ালৈকে সৰ্বাধিক। ১৯৫৩ চনত তেনজিং নৰগে আৰু চাৰ এডমণ্ড হিলাৰীয়ে প্ৰথমবাৰৰ বাবে সফলভাৱে এভাৰেষ্ট জয় কৰাৰ পিছত ইমান বৃহৎ সংখ্যক পাৰমিট কেতিয়াও দিয়া হোৱা নাছিল।
