অসমৰ পৰা সৰবৰাহ কৰা বুলি সন্দেহ কৰা প্ৰায় দুই কোটি টকা মূল্যৰ সোণৰে সৈতে কেৰালাৰ দুজন লোকক শিলিগুৰিত গ্ৰেপ্তাৰ কৰা হয়।
ডাইৰেক্টৰ অফ ৰেভিনিউ ইন্টেলিজেন্স (ডিআৰআই)য়ে মঙলবাৰে লোক দুজনক গ্ৰেপ্তাৰ কৰে।
গ্ৰেপ্তাৰ হোৱা ইউছুফ আৰু মিডলাজ নামৰ লোক দুজনক বুধবাৰে স্থানীয় এখন আদালতে জেৰাৰ বাবে সংশ্লিষ্ট বিভাগীয় জিম্মালৈ ১৫দিনৰ বাবে প্ৰেৰণ কৰিছে।
ডিআৰআইৰ বিষয়াসকলে লোক দুজনৰ জিম্মাৰ পৰা প্ৰায় ৩কেজি ওজনৰ ৩০খন সোণৰ বিস্কুট জব্দ কৰিছে।
বাতৰি অনুসৰি, এখন বিলাসী গাড়ীত সোণখিনি সৰবৰাহৰ বাবে নিয়াৰ সময়তে অভিযুক্ত দুজনক গ্ৰেপ্তাৰ কৰা হয়।
উল্লেখ্য যে যোৱা ১০ নৱেম্বৰতো পশ্চিমবংগ-বিহাৰ সীমান্তত ২১.৫৭কেজি ওজনৰ ১৩০খন সোণৰ বিস্কুট ধৰা পৰিছিল। সেই ঘটনাত তিনিজন সৰবৰাহকাৰীক গ্ৰেপ্তাৰ কৰা হৈছিল।
চোৰাংচোৱা সূত্ৰই জানিবলৈ দিয়া মতে অসমৰ পৰা আমদানি কৰা এই সোণ শিলিগুৰি-দাৰ্জিলিং পথেৰে সৰবৰাহ কৰাৰ চেষ্টা কৰা হৈছিল।
জানিব পৰা মতে, চলিত বছৰৰ জানুৱাৰিৰ পৰা এতিয়ালৈকে শিলিগুৰিৰ পৰা প্ৰায় ৬০ কেজি অবৈধ সোণ জব্দ কৰা হৈছে।
