আজি (দেওবাৰে) পুনৰ NEET অনুষ্ঠিত হ’ব। কিন্তু তাৰ আগতে অব্যাহত আত্মহত্যাৰ ঘটনা। এইবাৰ উত্তৰ প্ৰদেশৰ গাজিয়াবাদৰ পৰা উদ্ধাৰ হৈছে এগৰাকী NEET পৰীক্ষাৰ্থীৰ মৃতদেহ। পৰীক্ষাৰ মাত্ৰ দুদিন পূৰ্বে তেওঁৰ মৃতদেহ উদ্ধাৰ হয়। ইন্দোৰৰ পৰা আন এগৰাকী যুৱতীৰো মৃতদেহ উদ্ধাৰ কৰা হৈছে। তেওঁৱো পৰীক্ষাত অৱতীৰ্ণ হ’বলৈ প্ৰস্তুতি চলাইছিল।
৩ মে’ত অনুষ্ঠিত হোৱা মেডিকেল প্ৰৱেশ পৰীক্ষা প্ৰশ্নকাকত ফাদিল হোৱাৰ বাবে বাতিল কৰা হৈছিল। ইয়াৰ বাবেই ঘোষণা কৰা হ’ল যে নতুনকৈ ৰাষ্ট্ৰীয় যোগ্যতা-ও-প্ৰৱেশ পৰীক্ষা (NEET) অনুষ্ঠিত হ’ব। পৰীক্ষা বাতিল হোৱাৰ পিছত বহু পৰীক্ষাৰ্থীয়ে আত্মহত্যা কৰিছে।
বুধবাৰে তামিলনাডুৰ কইম্বাটুৰৰ পৰা NEET পৰীক্ষাৰ্থীৰ মৃতদেহ উদ্ধাৰ কৰা হয়। ইয়াৰ আগদিনা উত্তৰাখণ্ডৰ ডেৰাডুনত উদ্ধাৰ হৈছিল এগৰাকী প্ৰতিভাৱান ছাত্ৰৰ চিপ লোৱা অৱস্থাত মৃতদেহ। ৰিয়া কুমাৰী থাপা নামৰ সেই যুৱতীগৰাকীও Re-NEET ৰ বাবে অৱতীৰ্ণ হোৱাৰ কথা আছিল।
আৰু এই পৰীক্ষাৰ মাত্ৰ দুদিন পূৰ্বে গাজিয়াবাদত আন এগৰাকী পৰীক্ষাৰ্থীয়ে আত্মহত্যা কৰে বুলি আৰক্ষীয়ে জানিবলৈ দিয়ে। শনিবাৰে আৰক্ষীয়ে জনোৱা মতে, যতীন কুমাৰ (২২) নামৰ ছাত্ৰগৰাকীৰ মৃতদেহ তেওঁৰ ঘৰৰ পৰা উদ্ধাৰ কৰা হয়। তেওঁ বিজয়নগৰ থানাৰ অন্তৰ্গত প্ৰতাপ বিহাৰৰ এটা বাসগৃহৰ এইচ ব্লকত বাস কৰিছিল।
ইয়াৰ আগতেও তেওঁ কেইবাবাৰো পৰীক্ষাত অৱতীৰ্ণ হৈছিল। তেওঁ সফল হোৱা নাছিল যদিও এইবাৰ পুনৰ পৰীক্ষাৰ বাবে যতীনে প্ৰস্তুতি চলাইছিল। অঞ্চলটোৰ এচিপি উপাসনা পাণ্ডেই কয় যে পৰীক্ষাৰ্থীগৰাকীয়ে আত্মহত্যা কৰাৰ পূৰ্বে মোবাইলত এটা ভিডিঅ’ ৰেকৰ্ডিং কৰিছিল। তাতে পৰীক্ষাৰ্থীগৰাকীয়ে NEET উত্তীৰ্ণ হ’ব নোৱাৰাৰ পিছত হতাশ হোৱা বুলি জনায়। তেওঁৰ পৰিয়ালৰ লোকে কয় যে যতীনে হতাশ হৈও দেওবাৰৰ পৰীক্ষাৰ বাবে প্ৰস্তুতি চলাইছিল।
আনহাতে, মধ্যপ্ৰদেশৰ ইন্দোৰত NEETৰ আন এগৰাকী পৰীক্ষাৰ্থীয়ে আত্মহত্যা কৰে। এটা ওখ অট্টালিকাৰ পৰা জপিয়াই আত্মহত্যা কৰে অৱন্তিকা মৌৰ্য (২১) নামৰ পৰীক্ষাৰ্থীগৰাকীয়ে। আৰক্ষীৰ সূত্ৰ অনুসৰি যোৱা কেইমাহমানৰ পৰা তেওঁ মানসিক বিকাৰগ্ৰস্ত হৈ আছিল। NEET-UG বাতিল হোৱাৰ পিছত তেওঁৰ হতাশা বাঢ়িল। ইয়াৰ বাবেই শুকুৰবাৰে নিশা অৱন্তিকাই চৰম সিদ্ধান্ত গ্ৰহণ কৰে। পৰিয়ালৰ লোকেও কয় যে অৱন্তিকা ডাক্তৰ হ’ব বিচাৰিছিল। যোৱা তিনি বছৰত NEET ক্লিয়াৰ কৰিব নোৱাৰাৰ বাবে হতাশ হৈ পৰিছিল। ধৰ জিলাৰ যুৱতীগৰাকীয়ে ইন্দোৰত ভাড়াঘৰ লৈ পৰীক্ষাৰ বাবে প্ৰস্তুতি চলাইছিল।
ইফালে, দেওবাৰে দেশৰ ৫৫১খন চহৰৰ ৫৪৪০টা কেন্দ্ৰত পুনৰ NEET অনুষ্ঠিত হ’ব। এইবাৰ যাতে প্ৰশ্নকাকত ফাদিল বা আনুষংগিক কোনো ঘটনা নহয় তাৰ বাবে কেইবাটাও পদক্ষেপ গ্ৰহণ কৰিব বুলি কৰ্তৃপক্ষই জনাইছে।
আনহাতে, পৰীক্ষা বাতিল আৰু প্ৰায় এশজনৰ আত্মহত্যাৰ বাবে দায়ী কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবীত শনিবাৰে কংগ্ৰেছ আৰু ককৰোচ জনতা পাৰ্টিয়েও প্ৰতিবাদ সাব্যস্ত কৰে। তথ্য অনুসৰি বিগত ৩৭ দিনত ১২ গৰাকী নিট পৰীক্ষাৰ্থীয়ে আত্মহত্যা কৰাৰ ঘটনা ঘটিছে।
