শনিবাৰে পুৱা অসমৰ শ্রীভূমি জিলাৰ শ্রী গৌৰী অঞ্চলত এক শোকাৱহ পথ দুৰ্ঘটনা সংঘটিত হয়। পুৱা প্ৰায় ৬ বজাত এখন তীব্ৰবেগী ডাম্পাৰে এখন যাত্ৰীবাহী ট্ৰেভেলাৰ বাছক প্ৰচণ্ড জোৰে খুন্দা মাৰে। ইয়াৰ ফলত বাছখন নিয়ন্ত্ৰণ হেৰুৱাই ৰাস্তাৰ কাষৰ দ খাৱৈত সোমাই পৰে। এই ঘটনাত থিতাতে দুজন যাত্ৰীৰ মৃত্যু হয়। মৃত ব্যক্তি দুজনৰ নাম নিৰোদ দাস আৰু তপন বিশ্বাস বুলি চিনাক্ত কৰা হৈছে।
দুৰ্ঘটনাটোৰ পিছতে ডাম্পাৰখনৰ চালকজনে পলায়ন কৰিবলৈ চেষ্টা কৰিছিল যদিও স্থানীয় ৰাইজে তেওঁক ধৰিবলৈ সক্ষম হয়। এই দুৰ্ঘটনাত জড়িত ডাম্পাৰখনৰ পঞ্জীয়ন নম্বৰ টি আৰ ০৫ এইচ ১৭৩৮ আৰু ট্ৰেভেলাৰ বাছখনৰ নম্বৰ এ এছ ১০ চি ৬৬৬৭ বুলি জানিব পৰা গৈছে। ঘটনাৰ খবৰ পোৱাৰ লগে লগে স্থানীয় ৰাইজে উদ্ধাৰ অভিযান আৰম্ভ কৰে আৰু আহতসকলক চিকিৎসালয়লৈ প্ৰেৰণ কৰে।
বাছখনত থকা যাত্ৰীসকল এটা তীৰ্থযাত্ৰী দলৰ সদস্য আছিল বুলি জানিব পৰা গৈছে। এই দুৰ্ঘটনাত মুঠ ১৭ জন যাত্ৰী গুৰুতৰভাৱে আহত হৈছে। এজন সংকটজনকভাৱে আঘাতপ্ৰাপ্ত যুৱকক উন্নত চিকিৎসাৰ বাবে শিলচৰ চিকিৎসা মহাবিদ্যালয়লৈ প্ৰেৰণ কৰা হৈছে। আনহাতে বদৰপুৰ আৰক্ষীয়ে ঘটনাস্থলীত উপস্থিত হৈ বাকীসকল আহত যাত্ৰীক স্থানীয় চিকিৎসালয়ত ভৰ্তি কৰোৱায়। আৰক্ষীয়ে ইতিমধ্যে দুৰ্ঘটনাগ্ৰস্ত বাহন দুখন জব্দ কৰি তদন্ত আৰম্ভ কৰিছে।
আহতসকলৰ ভিতৰত ৰীণা মালাকাৰ, সজল মালাকাৰ, ৰঞ্জিতা মালাকাৰ, প্ৰদীপ ৰয়, বীৰেন্দ্ৰনাথ তালুকদাৰ, ৰণধীৰ দাস, প্ৰণৱ ৰয়, মানস ৰয়, চন্দন দে, কৃষ্ণা সূত্ৰধৰ, সুপ্ৰাণ দাস, লিপিকা দাস, সুমতি বিশ্বাস, অতীয়ালী দাস ৰয়, প্ৰদীপ ৰয়, পম্পম ৰয় আৰু মনীষা বিশ্বাস আছে। বৰ্তমান আৰক্ষীয়ে সমগ্ৰ ঘটনাৰ তদন্ত অব্যাহত ৰাখিছে।
